Hebrews 2 - Muklom

Ajong lunwan

¹ Eshirangma hiqtang aa tat ti raaq tang sho ahan tin kot ching, irimal ang ajo hiqtang adak lam náng ka mi ang ni.

² Bari raaq raa rangkamwa tang tungkang o batta, esha asing ta takhi ta etho eshi raaq sho tong moqtey etho tat moqtey tang aa tharo tasam kapta.

³ Irimal ang ajo hiqtang aa iri tan ajong lunwan sho tin kot mi ang ijo chamal eq jin lun ni? Eshi lunwan sha jakho Teyhungwa tatat ta etho utattey tang eq ira asing ta í aa bat ti.

⁴ Shkewa tho adak adak umaal, uphan phan tarong jaksom, etho patja jaksom tungkang o etho Asang Tsija aa jakkot tang bara utinthin o phal kotta, irima miikkhi kochey ta.

Lunwan lam konáng solkat tey

⁵ Ukat ang pha mingkang barima hiqtang wan tit chey i, esha Shkewa rangkamwa tang jakkhung o shing moq angta.

⁶ Asang likwit chamtey haqna chamtey eq irimal miikkhi kota. “Shkewa ning ma tathin ching rangma, miqna shi chamlang aa? Shkewa piq rimrang rangma, miqna sa chamlang aa?

⁷ Nang aa piq sha rangkamwa tang wang amaan sa hun anim na huntu; Nang aa piq o phun amun nia rangka cha khopok shing tu.

⁸ Nang aa thaji sha ujaa khungna shing chak tu.” Thaji sha piq jakkung na shingchak ta tho, piq jakkhung na shing moq ta chamtho ahung angta. Etharin hiqtang aa thanga náng thula thaji sha piq jakkhung na khi mi.

⁹ Etharin hiqtang aa Jesu sha khi i, bara rangkamwa tang wang amaan sa hun thanim eq chomwey rangma hunta. Piq aa utik tsamnang nan tungkang o piq ma phun amun nia rangka cha khopok tapok kota, irimal ang eq Shkewa ráng manchan o piq thaji miqtang rangma ti na.

¹⁰ Thaji sha Shkewa rangma etho piq tungkang o hunta. Eshirangma baluk o piq aa daqhan miqwasa nia miqnusa tang ma phun amun tathuk ta tho Shkewa ning rangma lunwan kottey ma tsamnang nan tungkang o hun khakla angta.

¹¹ Tasang tey nia bara tasang sey ta, thaji rangma Uwa ashey hun. Eshirangma Jesu aa ning sha ino nia ina ta hal rangma rakri moq.

¹² Piq aa bat aa, “Nga ba miing ino nia ina tang ma bat náng, Thaji thajoq tong ajo nga nang tasapsey eq sungsey pha náng.”

¹³ Etho irimal tho bat eq aa, “Nga piq sho tungmang shing náng.” Etho irmal tho bat eq ta, “Shkewa ngama kota, eshi nijangmay tang jamoq nga irina.”

¹⁴ Nijangmay tang hanngam nia tahi jamoq rum aa, eshirangma piq ning mal angta, irimal ang eq piq tik tungkang o piq aa utik tarong shingtey sha tathun chak na, bara thangwa.

¹⁵ Chamtan miqtang salwet utik ma cho eq tong chey aa, ning sha qhap ma tho piq utik angta.

¹⁶ Chammatakoi piq rangkamwa tang ma ang moq, Abraham phi aa lí ma nong aa.

¹⁷ Eshi tungkang o, phanrip raaq sho piq sha ning no miqwasa mal ang ching angta; irimal ang eq piq Shkewa jaksom o ashey tinshit nia ukam eq ching ajong tingwa tang solwa cham ang aa etho miqtang ngarey tolchak rangma, piq ni piq shi pinthong cham kot aa.

¹⁸ Etho piq aa tari tsamnang kapta tho, piq aa tari kaptey ning sha jin nong eq aa.