Hebrews 13 - Muklom

Shkewa tasungrang

¹ Ashey eq ashey ma saphona mal tatinmat ang chey ching.

² Winwa tang rimrang sha lakchak ching ang moq, chammatakoi chamtey miq eq irimal som eq sam hunga rangkamwa tang tha nongta.

³ Chuk wang tongtey tang jamoq nim tho chukna tong aa thimal ning shi tasik inn. Bari miq req tahikham kot aa, nim tho tsamnang ang inn thimal ning shi tasik inn.

⁴ Rungsat sha thaji eq rangka raaq ta tathin ching, etho himteywa nia himteynu shey ashey eq ashey sha han ching; chammatakoi Shkewa sathuk tang nia lajak tang sha khaphung na.

⁵ Nim rollung sha ngin ma ngikjuktey shimal ang ching ang moq, etho bara nim jak na, esha hun lali ang ching, chammatakoi Shkewa batta, “Nga nim baluk o tho shingchak pha mong ang phanáng etho nga nim baluk o tho lakchak pha mong ang phanáng.”

⁶ Eshirangma í aa cho hung aa bat i, “Teyhungwa sha nga nongtey, Nga cho mong ang náng, Miqna eq i jamoq chamlang jin som na?”

⁷ Nim aa solwa tang shi tasik inn, barey nim ma Shkewa raaq tatat taphin. Ning chamal tong ta etho tita eshi tasik eq ning kam jiphan inn.

⁸ Jesu Khristo sha baja, thaney, etho salwet arum.

⁹ Uphan phan anal tatal shey nim sha asing lam wang nak cham tachung phin. Lingphaksat thòng wang ang moq ang eq ráng manchan wang nim tin tharong sha aqhal. Irimal thòng phantey tang ma eshi thóng shey nong moq.

¹⁰ Hiqtang ma ashey rongthung atha, bulang taap sho nongtey tingwa tang eq eshiwang phaksat sha jin phaksat moq.

¹¹ Barey jatngam tahi raa ajong tingwa tang solwa aa ngarey rangma pinthong kot eq ajong asang katáng shináng som kat aa, eshi jatngam hanphung sha bulang taap phey na so chak aa.

¹² Iri tungkang o, Jesu atho miqtang sha utahi tungkang o tasang rangma samhaq pheyna tsamnang nan ta.

¹³ Eshirangma piq junnam shi hiqtang khom o som eq bulang taap tang pheynáng, piq relnáng thalat ka i.

¹⁴ Mingkang na hiqtang rangma pattuk samhaq ahung, hiqtang aa ashey uthok ang pha mung sha ban i.

¹⁵ Iri rangma hiqtang Jesu tungkang o Shkewa sha tasapsey pinthong kochey ro eq i, bara piq sha Teyhungwa ta hiqtang nungbil wang wungbat ching.

¹⁶ Jaqhal jaksom nia ashey eq ashey nong shi nak lakchak inn, chammatakoi Shkewa irimal pinthong shima sungrang aa.

¹⁷ Nim aa solwa tang raaqkhat tat inn, etho ning jiphan inn. Chammatakoi ning sha Shkewa jakho na nim rangma wetwaltey thimal nim sha ban chey aa. Nim aa ning raaq tat inn jo ning aa sungrang eq somlo na etha ang moq o ning tinshi eq somlo na etho eshiwang nim aa nong kap min ang nin.

¹⁸ Í rangma romtam chu inn. Í thung asang ta í aa usam eq i; chammatakoi í thaji raaq na jaqhal jaksom som ma tathin i.

¹⁹ Nga kalo nim relnáng wey kat angma, nim aa romtam rangma nga nim ma tinthanin eq bat phang.

Uthun romtam

^20-21 Nungmay kottey Shkewa aa hiqtang Teyhungwa Jesu ma bara kelwut tang ajong rimrangtey, pattuk raaqkhak tahi tungkang o amáng wang thawel solta. Thanga Shkewa utinnuk mal som ma thaji jaqhal phan nim ma cham kophin etho Jesu Khristo tungkang o piq tasungrang sha hiqtang o cham ang aa. Etho Khristo phun amun pattuk cham ang aa. Amen.

Uthun raaq

²² I pho ni no tang, nga nim ma tin thanin eq bat phang, itin tharong raaq tang ri jaqhal eq tat inn; chammatakoi nga nim ma alo liklo wit mong angtáng.

²³ Hiqtang no Timothy chuk wang thalat sey angta ta nim aa usam eq inn etho piq kalo uthok ang pha jo, nga piq nia nim jamoq tachong ma thupha náng.

²⁴ Nim aa thaji solwa tang nia thaji Teyhungwa miqtang ma jaktachap kot inn. Italy uhantey tang aa nim ma jaktachap kot aa.

²⁵ Nim thaji ma ráng manchan cham ang aa.