Hebrews 12 - Muklom

Shkewa hiqtang wa

¹ Eshi tungkang o miikkhi kottey ajong waan shey eq hiqtang sha tim tungkang o, thaji utángtey tangwang shi etho hiqtang thaman ngarey sha hel eq, hiqtang jakho na shing aa tatut sha tinthanan eq jol i,

² Hiqtang kam taphang tey etho khakla ma shingtey Jesu shi siin inn; piq jakho na angta eshi sungrang rangma, piq rakri shima tathin hunga, bólq tsamnang sha nan ta; etho Shkewa lungwang tongching jakqha kona tong ta.

³ Eshirangma piq shi tasik chey inn, barey ngarey miqtang ching kowang daqhan miiksuk sha nan ta. Irimal ang ajo nim tin jungnáng min ang nin etho shingchak min ang nin.

⁴ Nim ngarey miiksuk tharal na tahi tasal náng thula ang min ang tin.

⁵ Shkewa nim ma uwa umiqwasa ma bat aa thimal tintharong bat raaq sha nim aa lakchak sey tin; “I miqwasa, Teyhungwa tatsamnang phin jo banlam raaq ta nak tathin inn, etho piq aa nim ma khaba phin jo nan shi nak shingchak inn.

⁶ Chammatakoi Teyhungwa utang ma tinmat aa, piq sha tal aa; Etho utang usa miqwasa ma shing aa, piq ma tasamnáng aa.”

⁷ Nim aa tsamnang shi tatal ta tathin eq nan inn; Shkewa nim usa miqwasa ta tathin eq nim jamoq irimal dangjang aa. Eshi miqwasa utang aa, bara uwa tatal moq i?

⁸ Thaji sa tang sha tatal aa, nim aa tatal sha kap min ang inn jo, nim samay ang min, etharin sathuk miqwasa tang!

⁹ Hiqtang miqna wa tang eq tho hiqtang tatal phi etho hiqtang aa ning sha rangka i. Irimal ang ajo hiqtang tsija wa jakkhung na chamtan jaqhal tong ching.

¹⁰ Hiqtang miqna wa tang eq ning ni ning jaqhal thung o chomwey rangham rangma hiqtang tatal taphi, etharin Shkewa hiqtang rangma jaqhal ang rangma irimal som aa, irimal ang ajo hiqtang aa piq asang shiwang phal cham kap i.

¹¹ Thaji tatal sha kap rangham o sungrang ma takhi moq, etharin jungnáng raaq ta takhi aa. Etharin barey eshi tsamnang sha nan ta, ning rangma jio esha nungmay jamoq asing tingo kap na.

Talal bat nia tintharong

¹² Nim ma anung jak nia rongmoq jaa shi tachal inn.

¹³ Nim qhing lam shi tachal inn irimal ang ajo jakung tang sha manthan ti moq angna, etharin uqhal angna.

¹⁴ Thaji jamoq nungmay eq tong ma tathin inn etho asang angma tathin inn; chammatakoi utang eq asang ahung na Teyhungwa sha khi moq angna.

¹⁵ Shkewa ráng manchan wang ngik moq angma rangtun eq tong inn etho utang tho akha bangchíng wang thalattey akha bang mal ang moq angma etho iri tungkang o daqhan miq thanan moq angma jaqhal eq siin inn.

¹⁶ Sathuk miq etha ang moq o Esau mal rangwa nuktey ang ching ang moq, piq aa jukshey phaksat rangma phokho wa sunmaan sha shingchak ta.

¹⁷ Jio piq aa sunmaan kap ma tathin atho piq tha shingchak sey ta, etho miikshit takhong eq tin kaley eq tat tathin ta jo tho piq aa chamlang somlo ta tha jin kaley moq sey angta.

¹⁸ Nim eshi haqkan relna thuwey min bara jin lot eq aa etho wal eq ukham ang aa, eshina anak, etho phun, etho rangpong chey.

¹⁹ Eshina lirong tung tom, etho uraaq angtey atha angta. Raaq tat tey miqtang eq batta, “Thang wang í ma nak batphin.”

²⁰ Chammatakoi ning ma Shkewa iri raaqkhat sha rapney halta, “Chamtey jatngam ang ajo tho kan sha thak lo ajo, esha long ti eq pat ching.”

²¹ Eshi limtham sha rapney miqcho miqpan angta, eshirangma Moses aa tho ubat eq ta, “Nga ucho nia ubal ang táng.”

²² Etharin nim Zion haqkan relna, bara atharang Shkewa ajong samhaq etho mungtan Jerusalem, eshi relnáng thu taphin. Nim hayat rangkamwa tang sungrang shina thajoq tin.

²³ Phang chang tey tang thajoq, bari miing sha mungtan na wit chol ning relnáng nim thu taphin. Thaji sha khaphung tey Shkewa relna etho jaqhal miqtang bari tang raa khakla ma angta ning tsija relnáng thu taphin.

²⁴ Nim Jesu relnáng thu taphin bara hiqtang jamoq anal raaqkhak shing ta etho Abel tahi wang jaqhal eq waktey, eshi uwak tahi relnáng kataphin.

²⁵ Rangtun eq tong inn, etho raaq battey raaq shi nak shingchak inn, chammatakoi ning aa mingkang raaqtey sha shingchak tey tang sha lun moq ang ta jo, hiqtang mungtan wang raaqtey chingko náng ngik ijo chamal eq jin lun ni?

²⁶ Eshi rangham tho piq raaq eq mingkang sha thamot ta. Etharin thanga piq aa rangtum ta, “Jukshey nga mingkang chen ang moq, rangkan sha tho thamot eq náng.”

²⁷ “Jukshey” ta iri raaq raa takhi aa, bari tang sha uhun eq ta eshi tang sha umot ang eq thalat angna, irimal ang ajo bari tangwang raaq jin thamot moq, eshi tang sha udak angna.

²⁸ Eshirangma bara jin thamot moq eshi mungtan mung sha kap tungkang o hiqtang aa kechu ajong kot ching. Etho hiqtang aa Shkewa sha rangka jamoq etho cho eq tasapsey eq tasungrang ni.

²⁹ Chammatakoi hiqtang Shkewa sha tathom tey wal.