Hebrews 11 - Muklom

Kam

¹ Hiqtang aa tungmang raaq sha ang ang aa ta tathin sha kam ta raaq aa, etho kam wang khimi phan sha takhi na ta sam i.

² Kam tungkang o nimpang ning wang miqtang aa Shkewa shumnuk sha kapta.

³ Thaji mingkang phanghun Shkewa raaq tungkang o angta ta kam eq hiqtang aa sam i, irimal ang eq bara jin khi eq i, esha takhi moq phan tangwang wang hunta.

⁴ Kam tungkang o Abel aa Cain phey náng eq jaqhal pinthong Shkewa rangma dan kota; kam tungkang o Abel asing miq ta shingta chammatakoi Shkewa piq dan tang tung aa raaq ma miikkhi kota; etho kam tungkang o Abel raa utik angta jo tho thanga náng thula wantit aa.

⁵ Kam tungkang o Enoch aa utik khi moq angta. Piq sha khi moq angta chammatakoi Shkewa piq tha tunsol chuwan ta, etho piq aa Shkewa sha tasungrang ta ta piq tunsol chuwan wey moq jakho piq tung aa raaq miikkhi kota.

⁶ Kam ahung o Shkewa sha jin tasungrang moq, chammatakoi utang tho Shkewa relnáng ka ajo Shkewa atha ta kam ching, etho piq aa piq bitey shima kongpha kot aa.

⁷ Kam tungkang o Noah aa Shkewa raaq tat eq waqwan hunta. Eshi rangham tho takhi moq angta raaq tat eq ning himtey tang sha thalun rangma Noah irimal somlo ta. Eshi kam tungkang o piq aa mingkang sha aja ta shingta etho bara asing sha kam tungkang o kap aa, esha Noah aa kapta.

⁸ Kam tungkang o Abraham Shkewa piq tha hal eq rangtum ta haq shináng ka u ta bat atho piq tat eq qhing chuwang ta. Banáng kaching sha sam moq ang ajo tho uhaq sha shingchak eq qhing chuwang ta.

⁹ Kam tungkang o piq aa rangtum ta mung shina adak mungtey mal tong ta. Piq bulang taap na tong ta, Isaac nia Jacob tho irimal tong ta, bara piq aa rangtum sha kapta.

¹⁰ Chammatakoi piq aa eshi pattuk ang phan samhaq sha banta, eshi ajong samhaq takhong dangtey nia huntey sha Shkewa.

¹¹ Kam tungkang o Sarah wiku ang ajo tho susa hol rangma tarong kapta; chammatakoi piq aa rangtum tey shima kam ta.

¹² Eshirangma Abraham utik koko ang jo tho eshi miq ashey dang tungkang o rangwang taset mal nia jung wang longphangsa mal jin wet moq susa tang khong ta.

¹³ Iri miqtang raa kam o tita; etho ning aa rangtum ta tangwang tang sha kap moq angta; etharin ning aa mingkang ro winwa etho adak mungtey ta bat eq alo wang iri tang raa siin eq banta.

¹⁴ Irimal battantey eq, ning ni ning mung rangma ban aa ta takhi aa.

¹⁵ Bari mung raa ning aa shingchak eq thalat thuta pha, ning aa eshi mung tung aa raaq tathin ta jo ning uwel ang wang ta.

¹⁶ Etharin ning aa iri phey náng jaqhal mung sha banta bara mungtan na. Eshirangma Shkewa ning Shkewa ta raaq ma rakri moq, chammatakoi Shkewa ning rangma ashey ajong samhaq kacha shingta.

¹⁷ Kam tungkang o Abraham aa tari rangham na, Isaac tha pinthong kota. Abraham aa rangtum kapta jo tho usa ashey dang sha pinthong kotma kacha angta.

¹⁸ Shkewa piq ma batta, “Isaac wang ba susa tang ta thamiing na.”

¹⁹ Utik wang jin thalun ma Shkewa tarong atha ta Abraham aa usam eq ta, eshirangma bat ajo piq aa Isaac sha utik jio o thawel kapta.

²⁰ Kam tungkang o Isaac aa Jacob nia Esau ma ipangning tung aa raaq sunmaan kota.

²¹ Kam tungkang o Jacob aa utik rangham tho Joseph miqwasa ni shima ashey ashey ma sunmaan kota, etho ukantha tarong o Shkewa tha shumnuk ta.

²² Kam tungkang o Joseph utik angma ta atho, Israel tang Egypt haq sha shingchak tung aa raaq batta, etho uking urang chamal bingching tung aa raaq batta.

²³ Kam tungkang o Moses nu nia wa shey piq tha, uchang jio japitom náng duk tapu shing ta; chammatakoi ning ni aa nijang raa shamqhal ta takhi ta etho ningni lungwang raaqkhat ma cho moq angta.

²⁴ Kam tungkang o Moses uchat sey angta tho lungwang Pharaoh miqnu sa miqwasa ta hal sha shingchak ta.

²⁵ Chammatakoi ngarey o chomrey saal sungrang phey náng eq Shkewa miqtang jamoq tsamnang sha piq aa tal ta.

²⁶ Khristo tungkang o tsamnang sha Egypt tang lik aa ngin phey náng eq ahan thangchan ta tathin ta chammatakoi piq aa ukongpha ma jakho náng siin chey ta.

²⁷ Kam tungkang o lungwang tinqhat ma cho hunga Moses Egypt haq tha shingchak ta; utang eq tho khi moq Shkewa sha khi aa thimal ang eq piq uwel angma thamjam chey roq angta.

²⁸ Kam tungkang o piq aa ulit nia tahi wak kut aa kan sho han ta, irimal ang eq tatiktey eq Israel tang phang miqwasa nak cham tatik aa.

²⁹ Kam tungkang o Israel tang qhangkhung o qhing aa thimal Ashang jungshi sha kan ta; etho Egypt tang aa eshimal som ma tat tathin atho, ning thaji jung tho ngapti eq utik angta.

³⁰ Kam tungkang o Israel miqtang Jericho wangthuk sha tim eq saal sanat qhing atho wangthuk tha ngakwang ta.

³¹ Kam tungkang o sathuk nu Rahab tha Shkewa raaq hanmoq tey jamoq tatik chak moq angta; chammatakoi piq aa Israel wang hutsi tey wani tha jaqhal eq tatong chey ta.

³² Thanga chamlang ta wey raaq ang? Gideon, Barak, Samson, Jepthah, David, Samuel etho rangsamal tang raaq bat ma iching na rangham tha ahung sey.

³³ Kam tungkang o ning aa mung tang sha jin ta, jaqhal jaksom somlo ta, Shkewa rangtum ta tangwang tha kapta, shaq tang nung tha kip chak ta.

³⁴ Ning aa walkhu tang tha taki ta; jantong thiwang ulun angta, ning anung tang wang arong ma kalik ta; thamol hit wang ujintey angta etho adak mung wang ralkoltey tha phanchakta.

³⁵ Miqnu tang aa ning juntey utik angta tha ning aa atharang wey kapta; chamtey tsamnang eq tita, ning jaqhal eq weylun ma nuk moq ang eq aqhap kap ma nuk moq angta.

³⁶ Miqdak tang tha junnam, tikbukwat etho qhak shing etho chuk náng shak eq thak tari ta.

³⁷ Ning tha long eq pat eq tikwat chakta; jantong eq ani ma thaduk chak ta, etho jantong eq tiksu chakta; ning tangshit ang eq tahikham etho tsamnang kap eq kelwut etha ang moq o kel hanngam khup sam eq lingqhing ta.

³⁸ Jat tang na, kan tang na, etho kanbing tang na etho mingkang haq mong tang na manthan ti eq lingqhing ta. Mingkang sha ning rangma qhal moq angta.

³⁹ Kam tungkang o ning kam tung aa raaq ma jaqhal miikkhi kota jo tho ning ma chamlang rangtum ta tha kap moq angta.

⁴⁰ Chammatakoi Shkewa hiqtang rangma jakho wang iri phey náng eq jaqhal raaq shingta, irimal ang eq ning hiqtang jamoq o hun khakla jin angna.