Hebrews 10 - Muklom

¹ Thong sha uthok ang pha jaqhal raaq tang jakhang hun; esha asing raaq ang moq. Eshirangma eshi pinthong sha bara pangwet eshimal hun kot aa, shumnuk kattey sha baluk otho khakla miq ma jin hun moq.

² Shumnuk tey tang sha jukshey lam o hun pattuk rangma sang ajo, ning ngarey rangma baluk o tho ajat ta tathin moq angna etho irimal ang eq pinthong kot sha tatáng na.

³ Etharin eshi pinthong tungkang o pangwet ngarey tang sha tasik i.

⁴ Maanpong tang nia kel tang tahi shey ngarey tang sha baluk o tho jin tasang moq.

⁵ Iri tungkang o Khristo mingkang náng kat rangham o piq aa batta, “Pinthong nia dan ma nang nuk mu ang tu, etharin i rangma ashey hanphung kacha shing tu.

⁶ Jatngam so eq etho ngarey rangma dan kot shima nang sungrang mu angtu.

⁷ Iri jio nga bat taphang, Thong likdap kol na i tung aa raaq thawit ang aa thimal, Shkewa, ba tinnuk tahom rangma nga irina.”

⁸ Piq aa jakho batta, “Pinthong, dan, jatngam so eq etho ngarey ma dan kot shima nang nuk mu angtu etho sungrang mu angtu.” Iri tang raa thong na bat aa thimal somlo ta jo tho piq aa imal eq bat aa.

⁹ Eshi jio piq aa batta, “Shkewa, ba tinnuk mal som rangma nga irina.” Piq aa aking sha thamat chak ta etho eshi katáng sho adak sha shingta.

¹⁰ Piq tinnuk wang Jesu Khristo uhanphung sha jukshey pinthong kot tungkang o hiqtang thaji sha asang sey.

¹¹ Aking raaqkhak shina thaji tingwa tang sha usaal saal o lang eq ning jaksom sha somlo aa, etho jukwet wet ashey pinthong hun kot chey ro eq ta, eshey ngarey sha baluk o tho jin tasang moq.

¹² Etharin Khristo aa ngarey kaley o pattuk rangma jukshey pinthong kota etho eshi jio Shkewa jakqhat kot na tong wang ta.

¹³ Eshi rangham wang piq ral tang sha ujaa khung o tatong ma ban chey aa.

¹⁴ Piq aa jukshey pinthong kot tungkang o salwet rangma ning sha khakla ma hunta bara asang rangma angta.

¹⁵ Etho Asang Tsija eq tho hiqtang ma miikkhi kota; piq aa phang tho batta,

¹⁶ Teyhungwa bat aa, “Eshi rangham jio nga ning jamoq shing táng raaqkhak sha ira. Nga i thong tang sha ning tinmong shina shing náng, etho nga ning thung shina wit náng.”

¹⁷ Piq aa wey bat aa, “Nga ning ngarey tang nia jashit jaksom tang sha thang wang tasik mong sey ang náng.”

¹⁸ Req ning ngarey tang sha tolchak sey ta jo ngarey rangma pinthong wey kot sha ráa moq.

Kam jamoq Shkewa jamnáng kat

¹⁹ I pho nia na tang, eshirangma hiqtang Jesu tahi tungkang o ajong asang katáng shináng tinthajong eq jin nop sey ang i.

²⁰ Khatlo tungkang o bara uhanphung umong náng nop rangma hiqtang ma anal nia atharang lam lak kotaphi.

²¹ Eshirangma Shkewa him siintey shimal hiqtang ma ajong tingwa atha.

²² Req hiqtang asing tin jamoq, kam tintharong jamoq Shkewa relnáng ka i. Aja tinthin wang hiqtang tin shi tasang eq etho asang jung wang hiqtang hanphung shi tasang i.

²³ Hiqtang aa bara tungmang tung aa raaq bat i tungmang shi aching eq shing inn, chammatakoi bara Shkewa rangtum ta sha jin kam eq i.

²⁴ Ashey eq ashey ma tinmat takhi rangma etho jaqhal jaksom rangma ashey eq ashey ma tinthajong roq eq inn.

²⁵ Chamal chamtey eq som aa thimal hiqtang shumnuk rangma thajoq shi, nak shingchak inn. Shkewa saal sha ahan arel náng kat khi tungkang o ahan ashey eq ashey tin shi wey thajong chey roq eq inn.

²⁶ Asing sha sing sam jio hiqtang aa sam eq ngarey som chey ijo, ngarey rangma adak pinthong ahung sey.

²⁷ Irimal miqtang ma uthok ang pha khaphung chopan etho Shkewa ral tang tathun ma wal thajung sha hun dak shing aa.

²⁸ Moses thong tat moqtey miq sha ashey etha ang moq ang jo atom miqtang eq miikkhi kot ajo, tinshit hunga tatik chak ta.

²⁹ Irimal ang ajo, barey Shkewa Miqwasa sha shingchak etho piq usang angta eshi raaqkhak tahi sha anaan ta tathin tey, etho ráng manchan Tsija sha junnam tey shima chamtan tharo tsam kapna ta tathin inn.

³⁰ Irimal utang eq bat aa sha hiqtang aa usam eq i, “Mangkho chuk sha i jaksom, nga hun thawel náng.” Piq aa irimal tho ubat eq ta, “Teyhungwa umiq tang sha khaphung na.”

³¹ Atharang Shkewa jak tang na qhak sha rapney chopan raaq.

³² Nim aa alit alang kap tin saal tang shi tasik inn, eshi saal tang sho nim aa rapney ajong tsamnang kap eq tho arong ang tin.

³³ Nim sha miq jakho na junnam taphin etho tahitham taphin, etho irimal tsamnang kap tin jo tho nim ning jamna rokrum tin.

³⁴ Nim chukna tongtey tsamnang jam shina rok tsamnang tin, nim lik aa ngin sungrang eq tasom tin; chammatakoi nim relna jaqhal etho salwet ang phan alik aa ngin atha ta usam eq tin.

³⁵ Nim arong thung aa atal shi nak shingchak inn chammatakoi irimal som inn jo ajong kongpha kap nin.

³⁶ Shkewa tinnuk mal som rangma etho urangtum sha kap rangma nim tin thanan ching.

³⁷ Asang likwit na batta thimal, “Thanga chomrey sa rangham mong o, ukat tey sha ukat ang phana, etho piq sha karel moq angna.

³⁸ I asing miqtang sha han eq atharang tong na, etharin chamtey jináng wel ajo, i tin piq rangma sungrang moq angna.”

³⁹ Etharin hiqtang jináng wel eq uthom ang tey miq mal ang mi. Etharin hiqtang kam shingtey etho ulun kaptey tang.