Galatians 1 - Muklom

¹ Iri likwit raa nga Paul iching kowang. Nga apostle ang rangma miqtang ching kowang tho takat pha mong angta phang etho miqtang tungkang o tho takat phamong angta phang, etharin Jesu Khristo nia Shkewa ching kowang takat ta, barey piq tha amáng wang wey thajey ta.

² Etho thaji ino nia pho na tang eq, bara ijamna, ning Galatia mondoli tang ma jak tachap kot aa.

³ Hiqtang Shkewa nia Teyhungwa Jesu Khristo ching kowang, nim ma ráng manchan nia nungmay cham ang aa.

⁴ Hiqtang Shkewa tinuk wang mal hiqtang ma iri thaney nap jashit mingkang wang thalun ma, Khristo aa piq ni piq tha hiqtang ngarey rangma kochak ta.

⁵ Shkewa phun amun shi pattuk rangma cham ang chey aa! Amen.

Ashey dang hun tungtang qhal

⁶ Nga nim tung aa raaq ma rapney patja ang! Barey nim Khristo ráng manchan wang hal taphin, piq ching kowang nim itan kalo ngik eq adak ko tungtang qhal sha kam inn.

⁷ Etharin esha tungtang qhal ang moq, chamtey eq nim sha tungnung náng shing phin etho Khristo tungtang qhal sha kaley ma tathin aa.

⁸ Etharin í ang ijo tho etha ang moq o rangmuntan rangkamwa eq tho, í aa nim ma phanchan ti tungtang qhal sha dakchak eq, adak tungtang qhal sha phanchan ajo, ning khom o Shkewa manthun cham ang aa.

⁹ Chammal í aa jakho bat chol, eshimal hun nga thanga wey bat phang: nim ma barey tungtang qhal raa phanchan ta, eshi tungtang qhal sha dakchak eq, chamtey adak tungtang qhal phanchan ajo, piq khom o Shkewa manthun cham ang aa.

¹⁰ Thanga nga miqtang ching kowang rangka kap ma tathin ang i? Irimal ang moq. Nga Shkewa ching kowang rangka kap ma nuk ang. Nga miqtang sha tasungrang ma tathin ang i? Nga thanga tho miqtang sha tasungrang ma tathin táng jo, nga Khristo sanga ang mong.

Paul tha Shkewa hal aa

¹¹ Ipho nia na tang, nga nim ma bat phang, bari tungtang qhal raa nga phanchan kot taphang, esha miqna ching kowang phang ang moq angta.

¹² Esha nga miqtang ching kowang kap mong ang táng etho ngama utang eq tho tatal kot moq angta. Esha Jesu Khristo aa ngama takhi bat kot taphang.

¹³ Jakho o nga chammal eq Jehudi phan na tong táng tha nim aa utat eq tin; nga Shkewa mondoli tang tha rapney tasam táng etho tathun eq chak ma tathin táng.

¹⁴ Etho nga i rol adak Jehudi tang phey náng eq Jehudi phong sho tacha lot eq chey táng etho í tey aa wa thong tang na thung atal kot táng.

¹⁵ Etharin Shkewa inu wok wang hun nga raa hal taphang etho uráng manchan wang nga raa tal taphang.

¹⁶ Etho nga o usa Miqwasa tha takhi rangma, etho nga Gentile tang ma tungtang qhal phanchan rangma piq aa tathin ta tho, nga miqtang ma chamli som táng tha pit moq angta.

¹⁷ I phey náng jakho apostle angtey tang jamoq tachong ma Jerusalem haq náng tho kamong ang táng. Etharin nga Arab haq náng katáng etho eshiwang Damascus haq náng wel táng.

¹⁸ Pang tom jio nga Cephas jamoq tachong rangma Jerusalem haq náng katáng etho piq jamoq saal asi saal banga náng thula tong táng.

¹⁹ Nga Teyhungwa no miqwasa James tha chen kap chong táng etho apostle tang wang adak utang jamoq o tho tachong mong ang táng.

²⁰ Bari raaq raa nga nim ma witphang esha asing. Shkewa usam eq aa, eshi tang tha alik ang moq.

²¹ Eshi jio nga Syria nia Cilicia mung náng katáng.

²² Judea mondoli tang bara Khristo na angta, ning aa nga raa sam moq angta.

²³ Ning aa i tung aa raaq chen tat ta, “Barey jakho hiqtang tahikham taphi, piq aa thanga eshi kam tung aa raaq phanchan aa, bara jakho o piq aa tathun ma tathin ta.”

²⁴ Etho ning aa i tung aa raaq ma Shkewa sha tasapsey ta.