Ephesians 1 - Muklom

¹ Iri likwit raa Paul ching kowang bara Shkewa tinuk wang Khristo Jesu apostle. Ira Ephesus haq wang Shkewa asang miqtang ma wit aa, bara Khristo Jesu o kamtey rollung ma ang aa.

² Hiqtang Wa Shkewa nia Teyhungwa Jesu Khristo ching kowang, nim aa ráng manchan nia nungmay cham kap aa.

Khristo o Tsija sunmaan

³ Hiqtang Teyhungwa Jesu Khristo Shkewa nia Wa ma kechu ajong cham ang aa. Piq aa hiqtang ma Khristo o mungtan na uphan Tsija sunmaan kot taphi.

⁴ Hiqtang umiik siin na asang nia jamoq angma, piq aa hiqtang sha mingkang phanghun jakho wang Khristo jamoq kara eq tal taphi. Utinmat tungkang o,

⁵ Shkewa aa Jesu Khristo tungkang o hiqtang susa tang ang rangma shing taphi, ira usungrang nia umongtham wang piq aa jakho somlo ta.

⁶ Eshi phun amun ráng manchan shi cham tasapsey aa; iri ráng manchan raa piq aa hiqtang ma utinmat Miqwasa tungkang o thanghung wang kot taphi.

⁷ Hiqtang sha Khristo tahi tungkang o taqhap taphi, etho ngarey tang wang tolchak kapti; Shkewa ráng manchan shi chamtan ajong aa!

⁸ Eshi ráng manchan sha piq aa hiqtang ma daqhan kot taphi. Piq thunglam nia thung wang,

⁹ piq aa Khristo tungkang o chamlang somlo ma tathin ta, eshi apu ashum raaq tha piq aa hiqtang aa sam ma kot ta.

¹⁰ Iri tinthin raa thaji phanghun wang bara mungtan na etho bara mingkang na, eshi thaji sha Khristo jakkhung na shing ma ang aa, bara khakla rangham o tahom na.

¹¹ Shkewa thaji sha utinthin mal somlo aa; etho Khristo o hiqtang umiqtang ang rangma utinthin mal tal talphi; piq aa phang wang tathin ta mal sha somta.

¹² Irimal ang eq hiqtang barey Khristo o phang tungmang shingti, hiqtang aa uphun amun sha tasapsey ni.

¹³ Etho nim aa baluk o asing raaq sha tat tin tho, nim tho Shkewa miq ma ang tin; eshi tungtang qhal tungkang o nim aa lunwan kap tin; nim aa Khristo o han tin, etho Shkewa aa urangtum Asang Tsija kot eq, nim piq ràng ta tamaal taphin.

¹⁴ Shkewa umiqtang rangma chamlang rangtum ta esha hiqtang aa ukap hun eq ni ta Asang Tsija eq takhi kot aa. Irimal ang eq hiqtang aqhap sey angni ta Asang Tsija aa tintharong kot aa. Uphun amun shi cham tasapsey aa.

Kechu ajong nia romtam

¹⁵ Iri tungkang o, Teyhungwa Jesu o nim kam tung aa raaq etho thaji Shkewa miqtang shima nim tinmat tung aa raaq sha nga tatat rangham wang,

¹⁶ nga nim rangma Shkewa ma kechu ajong kot shingchak mong, etho i romtam tang chuk o nim sha tasik phang.

¹⁷ Hiqtang Teyhungwa Jesu Khristo Shkewa bara phun amun wa, piq aa nim ma thunglam Tsija nia takhi khang Tsija shi cham kophin, irimal ang eq nim aa piq qhalmay shi jaqhal eq cham sam inn.

¹⁸ Nim tin eq uphang sha khi rangma cham thalak aa ta nga romtam chu ang, irimal ang eq piq aa nim chamlang tungmang rangma halta phin esha nim aa usam eq nin, etho piq aa umiqtang rangma talta rangtum ta sunmaan thangchan sha tho nim aa usam eq nin,

¹⁹ etho kamtey hiqtang rangma piq tarong sha chamtan jong sha usam eq nin. Eshi ajong tarong wang,

²⁰ piq aa Khristo sha amáng wang thajey ta etho mungtan na ujakqha o tatong ta.

²¹ Eshina Khristo aa thaji jaktáng o shingtey tang etho authority tang etho tarong etho tangteywa tang sha ujakkhung na shing aa; etho umiing sha iri mingkang wang chen ang moq, etharin uthuk ang pha mingkang authority miing tang wang tho ajong.

²² Etho Shkewa thaji sha uja khung o shingchak ta etho mondoli na thaji sho piq sha Teyhungwa ta shing ta.

²³ Mondoli sha Khristo hanphung. Etho iro piq tahom ang aa, bara thaji na thaji o tahom ang aa.