Colossians 2 - Muklom

¹ Nim rangma etho Laodicea na tongtey tang rangma etho nga khi wey mongtey ning thaji rangma nga chammal tsamnang eq somlo ang ta nim aa usam eq ma nga tathin ang.

² Ning tin tang na tharong kap ma, etho ning tinmat wang ashey jaktung na kara eq tong rangma, etho ning aa thaji asam utol sha kap rangma, etho Shkewa apu ashum raaq bara Khristo, singsam rangma nga irimal somlo ang.

³ Piq o thunglam nia tallam thaji sha tapu ang aa.

⁴ Utang eq tho nim sha aqhal takhi eq alik raaq bat eq nim sha nak cham dip phin ta nga ira bat phang.

⁵ Nga hanphung wang nim relwang alo ang jo tho, tsija o nim relna, etho nim chammal tong ching eshimal hun tong inn ta etho Khristo o nim sha achíng ta khi eq nga sungrang ang ang.

Khristo jamoq tong

⁶ Chammal nim aa Khristo Jesu sha Teyhungwa ta han tin eshimal hun piq o kara eq tong inn.

⁷ Piq o taching lo inn etho chalo inn; etho chammal nim ma tatal ta eshimal hun kam chey ro ang inn, etho salwet kechu ajong kochey inn.

⁸ Rangtun eq tong inn, chamtey eq nim aja thung etho dip tungkang o qha ma nak cham hun phin, bara miqna thong alí etho mingkang thung mal ang aa, Khristo wang ang moq.

⁹ Chammatakoi Khristo o Shkewa thaji dangjang sha miqna hanphung na ang aa.

¹⁰ Etho ning aa Khristo na kara eq pattuk rollung kapta. Piq tha thaji jaktáng o shingtey nia authority wang ajongwa.

¹¹ Piq jamoq kara eq nim ma irimal hankhup qhan ta, bara jak wang ang moq, etharin eshi hankhup qhan sha Khristo aa qhanta, eshey ngarey hanphung sha qhap chak aa.

¹² Baluk o nim aa junglam tin, nim piq jamoq bungta phin, etho Shkewa tarong sho kam eq, bari tarong wang piq aa Khristo tha wey thajey ta, nim sha tho piq jamoq wey thajey ta.

¹³ Etho piq aa nim sha tho, bara ning ngarey tang etho ning hanphung hankhup qhan hunga amáng mal angta, Shkewa piq jamoq nim sha thalun ta. Piq aa hiqtang ngarey thaji tha tolchak ta.

¹⁴ Thong tang na mal hiqtang ngarey chamtan angta bara í miing o etho í miiksuk tey angta, eshitang sha piq aa thamat chak ta; etho piq aa bólq na eshitang sha khili bot eq hiqtang relwang tathet chak ta.

¹⁵ Etho piq aa jaktáng o shingtey tang nia authority tang tha piq relwang thanim chak eq miqtang ma takhi eq tharakri ta etho bólq tungkang o ujin raaq tang tatat ta.

¹⁶ Eshirangma phaksat etha ang moq o kut aa kan etha ang moq anal jappi etha ang moq o Sabbath tung aa raaq na utang eq tho nim sha nak cham phung aa.

¹⁷ Iri tang raa uthok ang pha raaq tang ma jakkhang, etharin raaq asing tha Khristo na kap aa.

¹⁸ Chamtey miq tinin eq takhi etho rangkamwa tang shumnuk eq ching ta bat eq nim tatut jol kongpha wang alo na nak cham shing phin. Irimal miq eq ning ni ning máng na khita raaq tang tung aa raaq o rapney raaq aa, etho ning ni ning raaq o rapney tharangka aa.

¹⁹ Ning Khristo sha lo eq tong moq, bara hanphung kho, piq wang hanphung sha umuk etho king arang jamoq kara eq rimrang kap eq etho kashey thajoq khak eq, Shkewa ching kowang chalo aa.

Khristo jamoq atharang nia utik

²⁰ Nim Khristo jamoq mingkang jaktáng o shingtey tsija tang ching kowang utik sey ang tin jo, mingkang rollung na tongtey mal irimal thong aa ley jakkhung na chamma tong aa?

²¹ “Jak eq nak somlo inn”, “Eshi nak thak tal inn”, etho “Eshi nak thak lo inn.”

²² Iri tang tangwang raa jaksom ma thok somlo eq uthun angna chammatakoi ira miqna raaqkhat etho tatal tang mal.

²³ Irimal thong aley thaji sha thunglam mal takhi aa, eshina rangkamwa tang sha shumnuk ching, alik takhitey etho hanphung jashit na somlo aa, etharin iritang rey hanphung anaan ngikjuk sha jin táng moq.