Colossians 1 - Muklom

¹ Shkewa tinuk wang Khristo Jesu apostle Paul etho hiqtang no miqwa Timothy ching kowang.

² Colossi na tongtey Shkewa asang miqtang ma, bara Khristo na asing pho na tang. Hiqtang wa Shkewa ching kowang nim aa ráng manchan nia nungmay cham kap inn.

Kechu ajong romtam

³ Í aa nim rangma baluk o romtam chu ijo, í Teyhungwa Jesu Khristo Shkewa ma salwet kechu ajong kot i.

⁴ Chammatakoi Khristo Jesu o nim kam etho thaji Shkewa miqtang ma nim tinmat sha í aa utat eq ti.

⁵ Eshi kam nia tinmat sha nim rangma nim ma mungtan na tashing aa, ira tungmang wang kap inn etho eshi tungmang sha nim aa tungtang qhal asing raaq na utat sey tin.

⁶ Iri tungtang qhal raaq raa nim jaktung na phanchan ta etho ira thaji mingkang na sunmaan kot eq taphal ang aa, etho cha chey ro ang aa; eshimal hun bari saal wang nim aa tat tin etho asing wang Shkewa ráng manchan tha singsam tin, nim jaktung na tho irimal hun angta.

⁷ Iri ráng manchan raaq raa hiqtang tinmat sanga Epaphras wang sam tin, bara í rangma Khristo o asing sanga.

⁸ Piq aa nim tinmat tung aa raaq í ma batta, bari tinmat sha Tsija eq nim ma kot ta.

⁹ Eshirangma bari saal wang nim tung aa raaq tat ti, nim rangma romtam chuk shingchak mi angti. Nim aa Tsija wang thaji thunglam nia usam tha kap eq Shkewa tinuk thaji sha sam rangma salwet í aa Shkewa ma romtam chu i.

¹⁰ Irimal ang ajo, nim Teyhungwa miiksiin na jaqhal rollung tong nin, etho thaji sho piq ma sungrang jin kot eq nin. Nim o uphan jaqhal jaksom tang tingo na, etho nim Shkewa singsam sho chalo ro ang nin.

¹¹ Piq phun amun tarong mal uphan aching wang rong chey inn, irimal ang eq nim ma uphan unan etho tinthanan angna.

¹² Etho nim aa Wa ma sungrang jamoq kechu ajong kot chey ro eq nin, barey nim ma alit rangmuntan miqtang ma chamlang shing aa esha kap rangma lam lak kot ta.

¹³ Piq aa hiqtang sha anak jaktáng wang thalun eq utinmat Miqwasa rangmuntan náng thok sol taphin.

¹⁴ Piq tungkang o hiqtang sha lunti etho eshiwang hiqtang aa ngarey wang tolchak kapti.

Khristo jaksom

¹⁵ Miqwasa sha jin khi mi Shkewa ujaq mal etho uphan phanghun wang phang khongdang ta.

¹⁶ Piq tungkang o thaji sha phanghun ta, mungtan rang ang ajo etha ang moq o mingkang rang ang ajo tho, jin khi phan etha ang moq o jinkhi moq, lungwang tongching, tarong tang, jaktáng o shingtey tang, thaji authority tang, eshi thaji sha piq tungkang o etho piq rangma hunta.

¹⁷ Piq sha thaji tangwang tang jakho na angta etho thaji tangwang tang tha piq o arum eq tong aa.

¹⁸ Piq sha uhanphung mondoli ma ukho; piq sha hun uphang etho utik wang weyjey tey wang phang khongdang ta, irimal ang eq thaji tangwang tang na piq sha thaji phey náng eq ajong angna.

¹⁹ Miqwasa sha Shkewa mal hun ang ching ta Shkewa sungrang wang tathin ta.

²⁰ Etho Miqwasa tungkang o mingkang ro ang ajo tho, mungtan ro ang ajo tho thaji tangwang sha ujamoq wey kara ma Shkewa tathin ta. Miqwasa bólq o tasal ta tahi tungkang o piq aa irimal somlo ta.

²¹ Nim phang tho Shkewa wang alo na ang tin etho anaan jaksom tang nia tinthin tungkang o nim piq ral tang ang tin.

²² Etharin thanga Umiqwasa hanphung o tik tungkang o Shkewa nim sha unokwa ma hun ta, irimal ang eq nim ujakho na asang nia chamtho nan moq etho jashit wang aqhap tey ang nin.

²³ Nim kam sha thóng mal achíng ang ching, etho eshi tungtang qhal tungmang shiwang nim mot ching ang moq. Eshi tungtang qhal sha nim aa tat tin etho esha rangkan anim thaji phang shina phanchan ta etho eshina nga Paul sanga ma ang táng.

Mondoli rangma Paul jaksom

²⁴ Thanga nga eshi tsamnang tungkang o sungrang ang ang, bara nim rangma nan ang, etho Khristo tsamnang tang na bara akum angta esha uhanphung bara mondoli rangma ihanphung o tahom somlo ang.

²⁵ Nga Shkewa eshi raaqkhat sanga ang táng, bara nim rangma nga raa kot ta, irimal ang eq nga Shkewa raaq thaji sha jin phanchan náng.

²⁶ Eshi apu ashum raaq sha bara jakho rangham tang nia upat ujat wang tapu ta, etharin thanga piq aa iri raaq raa asang miqtang ma takhi ta.

²⁷ Ning ma Shkewa ira takhi ma tathin ta, Gentile tang rangma iri apu ashum raaq raa chamtan thangchan aa. Etho apu ashum raaq ira, Khristo bara phun amun tungmang, piq nim tinmong na tong aa.

²⁸ Esha phanchan eq í aa thaji miqna tang rangtun eq tong ma tatat i, etho thunglam wang thaji miqtang ma tatal kot i, irimal ang eq í aa thaji miq Khristo na khakla ang eq jin takhi eq ni.

²⁹ Eshirangma ngama bara tarong kot ta, eshi tarong jamoq nga tsamnang eq ahan somlo ang.