Acts 3 - Muklom

Jakung wa tha taqhal aa

¹ Saal shey, Peter etho John Rangnuk him náng romtam chuk ma ka chey ta esha rangja atom rangham angta.

² Etho miqtang aa ashey uchang wang hun jakung wa tha thok som eq rangnuk him náng kattey tang ching wang dantun ma salwey rangnuk him palkalung shina tatong ta. Eshi palkalung tha daqhal thun palkalung ta tamiing aa.

³ Piq aa Peter nia John rangnuk him náng ka aa tha khita tho, piq aa ning ni ching wang ngin chuta.

⁴ Peter nia John aa jakung miqwa ching thináng siingsiin ta etho Peter aa batta, “Ini ching náng siin phu!”

⁵ Piq aa ningni ching konáng chamli lang kap ma tungmang eq siinta.

⁶ Peter aa piq ma batta, “I ching na hun aa cha ahung, etha otho bara i ching na atha nang ma kot phang; Nazareth Jesu Khristo miing o nang tunshat eq qhing u!”

⁷ Piq aa jakqha ko o lo eq piq tha thalang ma nok lota. Kalo hun ethi miqwa ja tho tarong thuta.

⁸ Piq jaa wang langta etho qhingta. Piq uja wang qhing eq ningni jamoq Rangnuk him himthal náng kata etho qhing eq wuk eq Shkewa miing tha thajong ta.

⁹ Miqtang aa piq uqhing etho Shkewa tasapsey atha khita.

¹⁰ Etho ethi miqwa tha rangnuk him “Palqhal” ta thamiing ta kalung na tong eq ngin jin chuktey ta sing sam atho, chamal eq angta ta ning tha rapney patja ta.

Rangnuk himna Peter raaq aa

¹¹ Eshi miq tha Peter nia John jamna tong eq Solomon wohimbuk na angta tho miqtang rapney patja eq ning relnáng jol eq thuta.

¹² Baluk o Peter aa miqtang tha khita, piq aa batta, “Israel miqtang! Nim chamma patja inn, etho nim aa í ching náng chamma siin phin? Nim aa chamta tathin inn, í tarong wang ang moq tia í kam wang iri miqwa raa qhing ma taqhal ti?

¹³ Abraham, Isaac etho Jacob Shkewa bara í aa tey aa wa Shkewa, piq aa usanga Jesu ma uphun amun sha kot ta. Etharin nim aa piq sha jaktáng o shingtey tangma thalo tin, etho Pilate aa piq sha qhap ma nukta etharin nim aa ràa moq ta raaq tin.

¹⁴ Piq sha asang etho asing angta, etharin piq tha nim aa shingchak tin, nim aa Pilate ma adak miqwa sha qhap ma chu tin, bara miq tatiktey angta.

¹⁵ Nim aa rollung soltey tha tikwat chak tin, etharin Shkewa piq tha utik wang wey thalun ta, etho í raa iri raaq ma miikkhi kottey.

¹⁶ Iri miing wang hun iri jakung wa jana tarong thuta. Nim aa chamli khi tin etho tat tin, iri tang thaji raa iri miing wang han eq angta; nim thaji aa khi tin mal Jesu ma kam tungkang wang angta.”

¹⁷ “Ipho notang, nga sam eq ang, nim nia nim walang tang aa chamtho sam hunga iritang raa somlo tin.

¹⁸ Jakho wang Shkewa urangsamal tang thaji tha takat eq Messiah tsamnang kapna ta batta; etho piq aa irimal angma kot ta.

¹⁹ Irimal ang ajo nim kaley ang inn, etho Shkewa relnáng ngik inn, piq aa nim ngarey sha tolchak na,

²⁰ etho Teyhungwa nángtong rangham kot na etho piq aa Jesu tha takat na, bara nim rangma jakho wang talchol Messiah.

²¹ Shkewa jakho wang piq aa rangsamal tang nung wang raaq ta thaji tangwang anal ang wey moq nángduk piq mungtan na tong ching.

²² Chammatakoi Moses aa batta, ‘Nim Shkewa Teyhungwa eq nga mal ashey rangsamal takat na, etho piq sha nim miq angna. Piq aa nim ma chamta bat aa nim aa piq raaq sha tat ching.

²³ Utang eq eshi rangsamal raaq tat moq, piq sha Shkewa miqtang wang adak som eq tathom chakna.’

²⁴ Thaney nap aa chamli sey angna, iri raaq raa Samuel etho piq jina thuta rangsamal tang aa batta.

²⁵ Shkewa rangsamal tang tungkang o rangtum ta tha nim rangma, etho piq aa tey aa wa jamoq raaqkhak hunta shina nim tho urum ang inn. Piq aa Abraham ma batta, ‘Nim phi aa lí tungkang o nga mung wang chamtan miqtang ma sunmaan kot náng.’

²⁶ Etho nim ngarey lam wang kaley eq nim ma sunmaan kot ma Shkewa usanga nim jamnáng jakho takat tapha.”