Acts 22 - Muklom

¹ “I aa Israel miqtang, nga ni nga thalun ma chamlang raaq bat phang shi tat inn!”

² Ning aa piq Hebrew raaq o raaq tha kap tat atho, ning tha shu shu sey angta. Etho Paul aa batta,

³ “Nga Jehudi miqwa, Cilicia mung Tarsus samhaq wang, etharin Gamaliel jiphantey ang eq iri Jerusalem na chalo táng. Í tey aa wa tang aa kot ta thong sha nga ma tatal kot ta. Nim aa chamal Shkewa ma thanga han inn eshimal nga tho irimal hun han eq thu taphang.

⁴ Iri Lam phantey miqtang sha nga tahikham eq tatik táng. Nga miqnu nia miqwa otho lo eq chuk náng saktáng.

⁵ Ajong tingwa tang solwa etho thaji Rong wang miqtang aa sam eq nga asing batphang. Damascus na tongtey Jehudi phan tang ma kotma liklo nga kap táng, etho ning sha lo eq Jerusalem náng tharo tatsam kotma thoksol ma nga chuwang táng.”

Paul aa chamal eq han ta raaq tha bat kot aa

⁶ “Nga Damascus náng thu ang tho, photla rangney mal o rangkang wang alang hal phang ka eq nga timchak taphang.

⁷ Nga haq náng wolti táng etho raaq kap tat táng, ‘Saul, Saul nang aa chamlang ma nga ri tahikham phu?’

⁸ Nga pit táng, ‘Teyhungwa, nang ri utang aa.’ Piq aa nga ma batta, ‘Nga Nazareth Jesu, bara nang aa tahikham u.’

⁹ Miqwa i jamna angta they uphang tha ukhi eq ta, etharin ijamoq wantey raaq tha tat moq angta.

¹⁰ Nga pit táng, ‘Teyhungwa, nga chamlang somlo ching aa?’ Etho Teyhungwa nga ma bat taphang, ‘Shat eq Damascus náng ka u, etho nang ma chamlang jaksom ching ta eshina nang ma bat kot phanu.’

¹¹ Nga uphang thiwang chamtho jin khi moq sey angtáng ethirangma ijamna kattey tang they ijak tha lo eq Damascus náng solkat taphang.”

¹² “Eshi samhaq sho Ananias ta thamiing aa washey angta. Piq thong somtey miqwa angta etho eshina tongtey Jehudi tang aa piq tha rangka ta.

¹³ Piq i relnáng lang ka eq bat taphang, ‘Ino Saul, wey khi eq nu.’ Etho nga kalo hun kap khi táng etho piq tha tho kap khi táng.

¹⁴ Piq aa batta, ‘Hiqtang tey aa wa tang Shkewa eq piq tinthin sha sam ma etho piq asing sanga angma etho piq raaq sha tat eq miqtang ma batma nang sha tal taphu.

¹⁵ Nang aa chamlang khitu etho chamlang tat tu shima miqtang ma miikkhi tey angnu.

¹⁶ Etho thanga nang chamlang ma ban u? Shat eq junglam u etho ba ngarey shi cham tolchak aa ta piq jamoq romtam chu u.’”

Gentile tang ma phanchan kot ma Paul tha hal aa

¹⁷ “Nga Jerusalem náng weltáng, etho rangnuk himna romtam chu táng tho nga màng khi táng.

¹⁸ Nga Teyhungwa tha khi táng, piq aa nga ma bat taphang, ‘Kalo Jerusalem ri shingchak u, chammatakoi iri wang miqtang rey ba miikkhi sha han moq angna.’

¹⁹ Nga thawel bat táng, ‘Teyhungwa, ning aa usam eq aa, nga synagogue náng katáng etho nang ma hantey tang sha khak eq wat táng.

²⁰ Ba miikkhi kottey Stephen baluk o tatik ta nga ni nga hun eshina angtáng etho piq tikwat shina nga rokrum angtáng etho utikwat tey khat tha nga tun shing táng.’

²¹ Etharin, Teyhungwa nga ma bat taphang, ‘Ka u chammatakoi nga nang raa Gentile phan tang jamnáng takat phang.’”

²² Iri raaq raa bat nángduk miqtang they piq raaq tha tatta. Etharin ethi jio ning tha ringta, “Piq ni tathey chak inn! Piq ni tatik chak inn! Piq raa utong rol ang moq.”

²³ Ning tha ringta, etho ning aa khat tha ching ta etho buk tha wonta.

²⁴ Rome ralkoltey tang solwa eq umiqtang thima Paul tha pangpong thung náng solkat ma raaqkhat kot ta. Etho chamlang rangma Jehudi tang aa piq tha tikring aa ta sam ma wat eq pit ma raaqkhat kot ta.

²⁵ Ning aa uwat eq ma khak atho, Paul aa eshina lang aa ashey ajongwa thima pitta, “Ashey Rome miqwa ma chamtho aja kaplo hunga piq sha wat shi thong na khakla i?”

²⁶ Ajongwa they ira tat eq, piq ralkoltey tang solwa jamnáng ka eq pitta, “Nang aa chamlang somlo u? Iri miqwa raa Rome miq!”

²⁷ Req ralkoltey tang solwa they Paul jamnáng ka eq pitta, “Batphu, nang raa Rome miq i?” Paul aa thawel batta, “Inn.”

²⁸ Ralkoltey tang solwa aa batta, “Daqhan lik aa ngin tathun eq nga iri Rome miq ma ang táng.” Paul aa thawel batta, “Etharin nga uchang wang hun Rome miq.”

²⁹ Iri raaq raa tat eq bari miqtang Paul watma angta ning tha jináng welta, etho ralkoltey tang solwa tha ucho angta chammatakoi Paul Rome miq angta etho piq aa Paul tha janru thiwang khak shingta.

Paul Rongh jakhona

³⁰ Paul ma Jehudi miqtang eq chamlang ma jashit kot aa ta ralkoltey tang solwa they jaqhal eq sam ma tathin ta. Ethirangma saal dak tho piq aa Paul khak ta janru tang tha lak chakta, etho ajong tingwa tang nia Rongh wang thaji miqtang tha thajoq ma raaqkhat kot ta. Ethi jio piq aa Paul tha thaji miqtang jakho na thalangta.