Acts 2 - Muklom

Asang Tsija thok

¹ Pentecost saal thu tapha tho, thaji uhantey tang tha haq ashey o thajoq ta.

² Photla, rangkang wang ashey tharaaq ta; eshi tharaaq tha achan rangpong tharaaq mal angta; etho ethi raaq tha him thaji o barina ning thajoq tong ta, ethina ushey angta.

³ Etho ning aa phali tang mal wal thuta tha khita, etho eshina tongtey miqtang thaji tha thak lota.

⁴ Ning thaji tha Asang Tsija wang sheyta, etho ning thaji tha adak raaq tang o wanta, bara Asang Tsija eq ning tha tharaaq ta.

⁵ Etho mingkang uphan phan haq wang Shkewa samtey Jehudi tang Jerusalem na tong ta.

⁶ Baluk o ethi tharaaq tha tatat atho daqhan miq thajoq ta. Uhantey miqtang eq ning raaq na raa aa tha tat eq ning thaji patja tita.

⁷ Etho ning thaji patja eq raaq ta, “Siin inn! Iraa raaqtey miqtang raa Galilee miq ang moq i?

⁸ Etho chamma hiqtang aa miq mama raaq tat i?

⁹ Ira ro hiqtang Parthia, Media, Elam, Mesopotamia, Judea, Cappadocia, Pontus, Asia wang,

¹⁰ etho Phrygia, Pamphylia, Egypt etho Cyrene relna Libya mung wang. Hiqtang Rome mung wang tho atha thuti.

¹¹ Hiqtang jaktung na Jehudi phan tho atha, etho Gentile phan wang Jehudi phan ma kaliktey tang tho atha, etho Crete mung wang etho Arab mung wang tho atha. Etha otho Shkewa chamtan ajong jaksom somlo ta ta ning hiqtang raaq tang o raaq aa ta kap tat ti!”

¹² Ning patja ta etho thamjam ti eq, ning aa ashey eq ashey miq ma pitta, “Iri chamlang aa?”

¹³ Etharin adak miqtang eq uhantey tang tha tikngit kung eq batta, “Iri miqtang rey ahan kham ling ta.”

Peter raaq

¹⁴ Peter adak asi ani apostle tang jamoq lang ta etho ning ma jujong aa batta: “Jehudi miqtang etho Jerusalem na tongtey thaji miqtang, nga nim ma chamlang batphang shi tat inn.

¹⁵ Nim aa chammal tathin inn mal, iri miqtang raa kham mok moq. Thanga ira rangnap akhu wey hun.

¹⁶ Etharin iri raaq raa, Joel rangsamal aa batta.

¹⁷ ‘Shkewa bat aa, Uthun saal tang o nga irimal som náng, I Tsija eq nga thaji miqtang ma qhan kot chak náng. Nim miqwa etho miqnu susa tang aa raaqtóng na; etho nim jaro tang thaji eq máng khina. Etho nim tikang tang aa máng khina.

¹⁸ Inn, i miqnu sanga etho i miqwa sanga tang ma tho, eshi saal tang sho i Tsija eq nga qhan kot chak náng, etho ning aa raaqtóng na.

¹⁹ Aluk rangkang na nga rapney patja takhi náng, etho anim mingkang sha tho umal angna. Tahi, wal, etho walkhu phun angna.

²⁰ Teyhungwa ajong nia phun amun saal thok jakho o, Rangsal sha anak angna, etho jappi sha tahi mal ashang angna.

²¹ Etho, utang eq Teyhungwa miing hal ajo, ning sha lunna.’”

²² “Israel miqtang, iraaq tang ri tat inn! Shkewa Nazareth wang Jesu sha daqhan patja jaksom, rapney patja, etho umal takhima nim jaktung na somma takat ta. Iri tang raa Shkewa piq tungkang nim jaktung o somlo ta. Iri raaq raa usam eq inn.

²³ Iri Jesu raa, nim jaknáng kot chak sha Shkewa jakho wang tathin ta, etho irimal hun angta. Etho piq sha nim aa gentile miqtang ma kot eq bólq o tatik chak tin.

²⁴ Etharin Shkewa piq sha utik wang thalun ta etho utik tarong wang qhap ta; chammatakoi utik eq piq sha chukna tongtey mal jinqhak moq angta.

²⁵ Chammatakoi David aa piq tung aa raaq batta, ‘Nga Teyhungwa sha salwet i jakho na khi táng; piq ijakqha kona ang tungkang o nga tsamnang kap mong ang náng.

²⁶ Ethirangma itin sungrang angta, etho iphali eq sungrang raaq raa aa, Etho ihanphung tho, tungmang na tong na.

²⁷ Chammatakoi nang aa irollung sha utik mingkang o shingchak mu ang nu; etho nang aa uhantey ba sanga, nga sha haq mong o shal ma kot mu ang nu.

²⁸ Nang aa ngama rollung lam takhi kot ta phu, etho nang aa takhi tungkang o nga sungrang eq sey náng!’”

²⁹ “Ipho notang, nga nim ma jaqhal eq jin batphang, hiqtang tey aa wa lungwang David utik etho ubung eq ta etho piq bung ching tha tho thaney náng thula irina atha.

³⁰ Piq sha rangsamal angta, etho Shkewa piq jamoq rangtum ta ta piq aa usam eq ta. Piq phi aa lí tang wang ashey lungwang tongching o tatong na ta Shkewa piq jamoq rangtum ta.

³¹ David aa Shkewa chamlang som na tha ukhi eq ta, ethirangma Messiah Khristo ti eq lun raaq tha David aa batta, ‘Piq sha utik mingkang na shingchak moq angta, Piq hanphung sha haq mong na shalti moq angta.’”

³² “Iri Jesu raa Shkewa thalun ta etho iri raaq ma í raa miikkhi kottey.

³³ Shkewa piq tha ujak khak kona tun eq tatong ta, etho piq aa Uwa chingko wang rangtum mal Asang Tsija kapta. Etho thanga nim aa chamli khi tin etho tat tin sha ukongpha, bara piq aa hiqtang ma shat kot ta.

³⁴ Chammatakoi David mungtan náng wang moq angta; etharin piq aa batta. ‘Teyhungwa i Teyhungwa ma batta:

³⁵ “Nga ba ralwa tang ba jaa khung na shing mong nángduk, ijak qhaq ko na tong u.”’

³⁶ “Israel miqtang aa ira jaqhal eq samching, nim aa iri Jesu raa bólq na tatik tin, etharin Shkewa piq tha Teyhungwa nia Messiah ma hunta.”

³⁷ Ira tat eq ethina tongtey thaji miqtang tin tashit eq Peter etho adak apostle tang ma batta, “I pho no tang, í aa chamlang somlo i?”

³⁸ Peter aa ning ma batta, “Nim thaji ngarey tolchak ma kaley inn etho Jesu Khristo miing o thaji eq junglam inn; etho nim ma jakkot mal Asang Tsija sha kap nin.

³⁹ Chammatakoi iri rangtum raa nim ma, etho nim susa tang ma, etho alo wang miqtang ma tho ang ang aa. Ning thaji sha hiqtang Shkewa Teyhungwa urel náng kat ma hal na.”

⁴⁰ Peter aa daqhan miikkhi raaq tharong eq batta, “Iri Jashit miqtang wang nim ni nim shi thalun inn.”

⁴¹ Daqhan miqtang eq piq raaq tha tat eq hanta etho junglam ta, etho ethi saal tho hayat tom miqtang tan rol ning waan o rumta.

⁴² Ning aa apostle tang tatal tha tat eq, etho rok rum eq, etho ban phak eq etho romtam chuk eq tong ta.

Uhantey tang chammal eq tong aa

⁴³ Apostle tang aa patja jaksom nia rapney patja jaksom somta etho thaji miqtang rapney chota.

⁴⁴ Etho uhantey tang sha kashey o tong ta, etho ning tangwang thaji sha thaji rang angta.

⁴⁵ Ning aa lik aa ngin etho tangwang sang eq chamtey ma ràa ajo ning ma kot ta.

⁴⁶ Ning salwet ashey tin ang eq rangnuk him himthal na thajoq ta. Etho ning him him o sungrang nia tin nin eq phaksat phaksa ta.

⁴⁷ Etho ning aa Shkewa tha tasapsey ta etho thaji miqtang ning ma ramta; etho barey ulun kapta Teyhungwa salwet ning waan shina tharum ta.