Acts 17 - Muklom

Paul nia Silas Thessalonica na

¹ Paul nia Silas Amphipolis etho Apollonia wang ka eq Thessalonica náng thuta. Eshina Jehudi synagogue angta.

² Jukwet jin ka aa thimal Paul synagogue náng kata. Eshina, saltom Sabbath saal o ning jamoq tong eq Asang likwit wang raaq thabat tanta,

³ etho Messiah tsamnang kap eq etho utik tey tang wang wey thajey na ta Asang likwit wang lat bat eq takhi ta, “Iri Jesu bari tung aa raaq nga nim ma raaq batphang sha hun Messiah.”

⁴ Chamtey miq aa tat sey ta, etho Paul nia Silas jamoq kara ta. Ning jaktung na ajong alang miqnu tang etho daqhan Shkewa ma chotey Greek miqtang angta.

⁵ Etharin Jehudi miqtang ngeljo ta. Etho lam na tongtey lajak kalpak tang tha thajoq eq, ning aa tharing rak ta. Etho ning aa Paul nia Silas tha bi eq Jason him tha qhimta etho Paul nia Silas tha miqtang thim na thalkhung náng solkat ma tathin ta.

⁶ Ning aa baluk o Jason himna ningni kap moq angta tho Jason nia adak uhantey tang tha lo eq samhaq ajong miqtang thim o hum katta, etho ring eq batta, “Thaji haq na tsamnang kottey miq irináng tho uthok angpha.

⁷ Etho Jason aa ningni tha uhim na shing ta. Iri miqtang rey Rome ajong lungwang raaqkhat tang tha dan aa etho Jesu tamiing aa adak lungwang atha ta bat aa.”

⁸ Etho ira tat eq miqtang nia samhaq authority tang tinkha ta.

⁹ Samhaq authority tang aa Jason nia miqdak tang ching wang ngin som eq ning tha shingchak ta etho ning tha takat ta.

Paul Berea na

¹⁰ Rangpal sey thu atho, uhantey tang aa Paul nia Silas tha Berea náng takat ta. Ning eshináng thu eq, Jehudi synagogue náng kata.

¹¹ Iri miqtang raa thessalonica Jehudi miqtang wang utat tey angta chammatakoi ning rapney ram eq Paul raaq tatta etho piq raaq raa asing ta salwet Asang likwit na bita.

¹² Daqhan miqtang aa han ta; miqnu o tho miqwa ang o tho, daqhan Greek miqwa tang aa hanta.

¹³ Etharin Thessalonica wang Jehudi miqtang aa Paul Berea samhaq náng thu eq Shkewa raaq bat aa ta tat atho, ning eshináng thu eq miqtang tin tha takey ta etho ning tha polrik ta.

¹⁴ Etho uhantey miqtang aa Paul tha jungkang ko náng takat ta; etharin Silas nia Timothy, Berea haq na tong ta.

¹⁵ Etharin miqtang Paul jamoq ka eq piq tha Athens náng solkat ta, etho Paul aa ning ma batta, “Kalo Silas nia Timothy shi ijamnáng thok ma bat inn.”

Paul Athens na

¹⁶ Baluk o Paul aa Athens na Silas nia Timothy banchey ta tho, Athens samhaq na daqhan shila tha khi eq piq tin shitta.

¹⁷ Eshirangma piq synagogue náng ka eq Jehudi tang etho Shkewa shumnuk tey Gentile tang jamoq wantit ta etho salwet samhaq na utang miq kap chong ajo tho, ning jamoq tho wantit ang ta.

¹⁸ Chamtey miqtang Epicurean etho Stoic tataltey jamoq tho thadan ta. Chamtey miqtang eq batta, “Iri rapney raaqtey miq ri chamlang batma tathin aa?” Adak tang eq thawel batta, “Piq aa adak rangwa tang raaq batma ta aa!” Ning aa ira batta chammatakoi Paul aa Jesu etho weyjey tung aa raaq phanchan aa tha ning aa tat ta.

¹⁹ Req ning aa Paul tha Areopagus rongh náng solkat eq pitta, “Ira anal tatal nang aa tatat u sha í aa usamtol eq ma nuk i.

²⁰ Chammatakoi nang aa arong raaq í ma tatat u, ethirangma raaq tang shi chamli aa ta sam ma nuk i.”

²¹ (Chammatakoi thaji Athens miqtang etho eshina tongtey adak mung miqtang anal raaq tang bat ma etho tat ma nuk ta.)

²² Areopagus rongh sho lang eq Paul aa batta, “Athens miqtang, nim rangwa nuknap samtey ta nga siin ang.

²³ Chammatakoi nga ling qhing eq nim shumnuk thaji katáng khi tang tho ‘Sam min rangwa rangma’ ta bat eq witchol ashey rongthung khi táng. Eshirangma nim aa samtol min tangwang sha shumnuk inn, nga nim ma iri tung aa raaq tatat phang.

²⁴ Shkewa mingkang etho iri mung ro thaji tangwang hunta, piq mungtan nia mingkang Teyhungwa etho piq miq jak wang hun aa rangnuk him na tong moq.

²⁵ Etho piq ma utang eq tho somlot kotching ràa moq. Chammatakoi piq aa hun thaji ma rollung nia takhum etho thaji tangwang kot aa.

²⁶ Piq aa ashey miq wang miqtang thaji phan sha iri thaji mingkang ro tong ma hunta. Piq aa ning ma atharang tongching rangham tho shing eq ta etho ning tongching jatri tang tha hun kota.

²⁷ Piq aa irimal somlo ta chammatakoi piq aa irimal somlo ajo ning aa piq sha tho bina etho piq tung aa raaq khi ajo ning aa piq sha kapna. Shkewa hiqtang thaji wang tho alo na ang moq.

²⁸ Chamtey irimal batta, ‘Hiqtang piq o hun atharang moqmak i etho utong ang i.’ Nim wang sungsey wittey tang chamtey batta, ‘Hiqtang raa tho piq susa tang hun.’”

²⁹ “Hiqtang piq susa tang ang ijo Shkewa miq jak wang hun aa cha, chiing, etho long wang miqtang asam atol tinthin eq hunta shila mal ta hiqtang aa tathin ching ang moq.

³⁰ Iri rangma Shkewa sam moq rangham na piq sha siin tan moq angta, etharin thanga Shkewa thaji miqtang ma ning ngarey wang kaley ma raaqkhat kot ta.

³¹ Chammatakoi piq aa talta ashey miq tungkang o iri thaji mingkang ro asing o khaphung ma saalshey shingta. Piq aa iri miq raa utik wang thalun eq thaji miqtang ma takhita!”

³² Baluk o ning aa utik wang weyjey raaq tat eq, chamtey miq eq piq tha tikngit ta, etharin adak miqtang aa batta, “Í aa iri raaq raa baching wang wey tat eq ni.”

³³ Etho Paul aa Areopagus rongh tha shing chak ta.

³⁴ Chamtey miqtang piq jamoq kara eq hanta. Ning wang Dionysius bara Areopagus rongh miq angta etho Damaras ashey miqnu angta etho adak miqtang tho atha angta.