Acts 15 - Muklom

Jerusalem na raaq wan aa

¹ Judea wang chamtey miqtang Antioch náng thu eq uhantey miqtang ma tatal ta: “Moses thong na bat aa thimal nim aa hankhup qhan wey min ling nim lun min ang nin.”

² Baluk o Paul nia Barnabas iri raaq rima rapney thadan eq wanta tho mondoli miqtang aa Paul nia Barnabas etho chamtey ning wang miq tha Jerusalem náng ka eq apostle tang etho miqlang tang jamoq tachong eq iri tung aa raaq tang raa wan ma talta.

³ Ethirangma mondoli miqtang aa ning tha tachuwan ta; etho ning Phoenicia etho Samaria lit eq, Gentile tang chamal Shkewa relnáng thuta ta ning ni aa ning ma batta. Iri tungtang raaq tat atho uhantey miqtang rapney sungrang ta.

⁴ Baluk o ning Jerusalem náng sey thu atho, eshiwang mondoli miqtang apostle tang etho miqlang tang aa wangphin ta halta. Etho ningni aa ning tungkang o Shkewa chamlang jaksom somlo ta tha batta.

⁵ Etharin Phorisi waan wang chamtey uhantey tang lang eq batta, “Gentile tang atho hankhup qhan ching etho Moses thong tat ma raaqkhat kot ching.”

⁶ Iri raaq raa kara ma apostle tang etho miqlang tang kashey o thajoq ta.

⁷ Etho daqhan raaq wan jio Peter tunshat eq ning ma batta, “Ipho notang, Gentile tang tho tat eq han ma ning o tungtang qhal phanchan ma phang wang hun Shkewa nim wang nga tal taphang ta nim aa usam eq inn.

⁸ Etho thaji tinthin samtey Shkewa aa Gentile tang ma tho chamal hiqtang ma kot taphi thimal piq Asang Tsija kot eq ning ma tho tinmat ang aa ta takhita.

⁹ Piq aa hiqtang jamoq tho etho ning jamoq tho chamtho adak adak tal moq; piq aa ning ngarey tolchakta chammatakoi ning aa uhan eq ta.

¹⁰ Irimal ang ajo, hiqtang tey aa wa tia hiqtang aa tho jin hol mi hollit tha uhantey tang sukang o shing eq, nim aa chamlang ma Shkewa tari chey inn?

¹¹ Irimal ang ching ang moq, Teyhungwa Jesu manchan tungkang o hiqtang thalun phi ta hiqtang aa uhan eq i. Eshimal ning atho ukap eq aa.”

¹² Paul nia Barnabas tungkang wang Shkewa Gentile tang jamoq ahan umal nia patja jaksom somlo ta ta raaq tha tat eq thaji miqtang shu shu angta.

¹³ Ningni raaq wan thun jio James lang eq batta: “Ipho notang, i raaq tat inn!

¹⁴ Shkewa Gentile tang wang chamtey miqtang tha umiing rangma chamal jakho talta tha Simon aa batta.

¹⁵ Rangsamal tang aa raaq tang tho iri raaq ro kara aa, irimal thawit aa,

¹⁶ Teyhungwa bat aa, ‘Iri jio nga wey kapha náng, etho David mung sha wey hun náng. Chamlang tatuk ta esha nga taqhal kot náng etho wey taching eq náng.

¹⁷ Iri rangma thaji miqtang imiing rangma hal na, Thaji Gentile tang aa Teyhungwa sha bina.

¹⁸ Jakho wang iri tang raa tasam kottey Teyhungwa hun bat aa.’”

¹⁹ “Iri rangma itinthin ira: Shkewa ching kot náng qhik tey Gentile tang ma hiqtang aa tatsam ching ang moq.

²⁰ Etharin shila ma dan kot eq thanan aa phaksat sha phak moq angma, sathuk ang moq angma, etho bot o nat aa ngam sha phak moq angma etho tahi phak moq angma lik wit eq ning ma kot inn.

²¹ Chammatakoi Moses thong sha thaji samhaq na nimpang ning wang phanchan aa etho thaji Sabbath saal o synagogue na esha phat chey aa.”

Gentile uhantey tang ma liklo

²² Req Apostle tang nia miqlang tang aa mondoli miqtang jamoq, kara eq ning wang chamtey miq tal eq Barnabas nia Paul jamoq Antioch náng takat ma tathin ta. Ning aa ning wang solwa ani tha talta; ningni Judas bara Barsabbas ta hal aa etho Silas tha angta.

²³ Liklo tha ningni jak o takot ta, “Nim apostle tang etho miqlang tang, thaji pho notang jamoq í aa Antioch, Syria, etho Cilicia na tongtey Gentile phan pho notang ma jak tachap kot i.

²⁴ “Í jaktung wang chamtey ka eq nim tatungnung taphin etho nim tin tashit ta ta í aa kap tat ti. Ning aa irimal somlo ma í aa raaqhak kot mi angti.

²⁵ Ethirangma, í aa raaq kara eq í jaktung wang chamtey thoksil tattey tal eq nim jamnáng takat ma tathin ti. Ning sha í tinmat pho no tang Barnabas nia Paul jamoq nim jamnáng takat phani.

²⁶ Ning aa ning rollung tha hiqtang Teyhungwa Jesu Khristo miing rangma utik ma tho cho moq miqtang.

²⁷ Ethirangma í aa nim relnáng Silas etho Judas takat taphi. Etho ningni nung wang tho iri liklo raaq tang raa batna.

²⁸ Iri tang phey náng eq nim han o rapney hollik shingchak moq angma Asang Tsija nia í aa jaqhal tathin i:

²⁹ Nim aa shila ma dan kot eq thanan aa phaksat sha phak ching ang moq, tahi phaksat ching ang moq; bot o nat aa ngam sha phak ching ang moq, etho sathuk nak somlo inn. Iri tang wang alo na tong inn jo nim aqhal ang nin. Jaqhal eq tong inn!”

³⁰ Ning aa thoksil tattey tang takat ta etho ning Antioch náng thuta, etho uhantey miqtang thajoq eq ning aa liklo tha kot ta.

³¹ Ning aa ethi liklo tha phat eq tinthajong raaq shima rapney sungrang ta.

³² Judas nia Silas rangsamal angta, ningni aa daqhan raaq wang uhantey tha tinthajong ta etho taching eq ta.

³³ Saal tom bali tong jio, uhantey tang aa ningni nungmay eq tachuwan ta. Ningni takattey ching náng wey welta.

³⁴ Etharin Silas eshina tong ma tathin ta.

³⁵ Paul nia Barnabas Antioch na chomwey rangma tong ta. Ningni daqhan miqtang jamoq Teyhungwa raaq tatal eq tungtang aqhal phanchan ta.

Paul nia Barnabas taphal aa

³⁶ Saal shey ni jio Paul aa Barnabas ma batta, “Hiqni aa bari samhaq na Teyhungwa raaq tat ti eshináng wey ka eq uhantey tang chamal aa shi siin ka i.”

³⁷ Barnabas aa ningni jamoq John Mark tha tho solma nukta.

³⁸ Etharin ning jaksom na tathun hunga Pamphylia náng weltey John Mark tha ningni jamoq sol kat ma Paul tha nuk moq angta.

³⁹ Ningni iri tung aa raaq ma rapney thadan ta, etho ningni taphal angta. Barnabas aa Mark John tha sol eq waqwan o Cyprus náng kata.

⁴⁰ Etho Paul aa Silas tha talta, etho uhantey miqtang eq Teyhungwa ráng manchan náng ningni sha shing chak jio ningni eshiwang qhing chuwang ta.

⁴¹ Piq Syria etho Cilicia wang qhing eq mondoli miqtang ma tin taching kot ta.