Acts 12 - Muklom

Ahan tahikham

¹ Eshi rangham tho Herod lungwang aa mondoli wang chamtey miqtang tha tahikham ta.

² Piq aa John no James tha jantong wang tatik chakta.

³ Jehudi tang irima sungrang ang aa tha piq aa khita tho piq aa Peter tha tho lota. Ethi saal tha wung moq phan banlo kut aa kan angta.

⁴ Herod aa piq tha lo eq chuk náng sakta, etho bali ralkoltey bali waan shingta. Herod aa Peter ma Ulit kut aa kan jio miqtang relna solkat ma tathin ta.

⁵ Eshirangma Peter tha chukna shingta, etharin mondoli miqtang aa piq ma Shkewa ching wang romtam chuta.

Peter chuk wang lat aa

⁶ Herod aa piq tha inap miqtang thim o solkat eshi rangpal tho Peter ubantey ani jaktung na ujip ang chey ta. Piq tha ani janru eq qhakta, etho ubantey kalung kang na langta.

⁷ Photla Teyhungwa ashey rangkamwa eshina langta etho chuk mong na ulit phang ta. Rangkamwa aa Peter tha sukkang tho thamot eq tasil wang tathing ta etho kalo shat u ta batta. Takshey lam o hun janru tha Peter jak wang taqhang eq tachon ta.

⁸ Etho rangkamwa aa batta, “Khing kit ni tachak u etho jaakhong ni qhong u.” Peter aa eshimal hun somta, etho rangkamwa aa Peter ma batta, “Khatnup ri sam u etho ijio kaphu.”

⁹ Peter chuk wang thalat eq piq jio kata; etharin rangkamwa bara somta tha asing ta Peter aa sam moq angta. Piq aa máng khi angta tathin ta.

¹⁰ Ning ni aa jakho ubantey waan tha lit eq adak waan tha tho janta etho jankalung náng thuta bari kalung raa samhaq náng thuta. Eshi jankalung tha piq ni piq thalak ta, etho ningni tha ran náng thalat ta. Ningni lam na kachey atho tasam hunga ethi rangkamwa aa Peter tha shingchak ta.

¹¹ Etho Peter aa chamli angta tha samta, etho batta, “Thanga asing ta nga usam eq ang! Teyhungwa urangkamwa tha takat eq Herod jakwang nga thalun ta etho Jehudi tang tungmang tha tathun chakta.”

¹² Thanga chamli ang atha ira sam eq, piq Mary him náng kata, bara John Mark nu angta, daqhan miqtang eshina thajoq eq romtam chu chey ta.

¹³ Peter aa kalung thara dokta etho Rhoda ta miqnu sanga kalung relnáng kata.

¹⁴ Piq aa Peter raaq tha sing eq piq sungrang wang kalung tha lak hunga kalung himmong náng thong wang ta etho batta, Peter tha kalung kang na lang aa.

¹⁵ Ning piq ma raaq aa, “Nang raa ajat.” Etharin piq aa ira asing hun ta batta. Ethirangma ning aa batta, “Ira piq rangkamwa!”

¹⁶ Etharin Peter aa kalung tha dok ro hun eq ta. Ning aa kalung tha lakta tho piq tha khi eq rapney patja ta.

¹⁷ Piq aa ujak thamot eq ning ma shu shu angma batta etho ethi jio ning ma Teyhungwa chamal eq nga chuk wang ináng sol kat taphang ta lak eq batta. Piq aa irimal tho bat eq ta, “James etho adak uhantey tang ma iri tang raa tho ubat eq inn.” Etho piq ethi wang thalat eq adak haq náng kata.

¹⁸ Rangnap sey ang atho, ralkoltey tang waan tha tungnung ta, “Peter chamlang angta?”

¹⁹ Herod aa piq tha bi eq kap moq angta. Req piq ralkoltey tang ma pit pita etho ning tha tatik chak ma raaqkhat kot ta. Ethi jio, Herod aa Judea tha shing chak eq Caesarea na chomwey rangma tong kata.

Herod tik

²⁰ Herod Tyre nia Sidon miqtang ma rapney khata. Ethi rangma eshi miqtang tha Herod jamoq tachong ma thuta. Lungwang him siintan tey Blastus jamoq jakho wanta, ning Herod relnáng thu eq nungmay ang rangma batta. Chammatakoi ning mung na Herod mungwang phaksat kapta.

²¹ Utal saal tho Herod aa piq lungwang khat sam eq lungwang tongching na tong ta etho miqtang ma raaq batta.

²² Miqtang ring eq batta, “Ira miq raaq ang moq, etharin ira rangwa raaq!”

²³ Photla o Teyhungwa ashey rangkamwa piq tha watta, chammatakoi piq aa Shkewa tha rangka moq angta. Jongbal tang aa piq tha phakta etho piq tha tita.

²⁴ Etharin Shkewa raaq phochal ta etho chalo ta.

²⁵ Barnabas nia Saul aa ningni jaksom tha tathun eq Jerusalem náng welta, ningni jamoq John Mark tha tho sol eq ta.