3 John 1 - Muklom

¹ Phokho walang ching wang: Itinmat Gaius rangma, bari ma nga asing tinma ang.

² Inokwa, nang chamal Tsija na cha lo u shimal hun thaji shina cha lo u etho hanthing eq tong rangma cham tong u ta nga romtam chu chey ang.

³ Uhantey tang wang chamtey tang thu eq ba asing tung aa raaq shima miikkhi ko atho nga rapney sungrang táng. Salwet nang asing lam na jaqhal eq qhing tu.

⁴ Isa tang asing lamna hun jaqhal eq kachey aa ta tat eq nga thaji pheynáng eq sungrang náng. Iri pheynáng nga ma cham sungrang ahung.

Gaius tung aa raaq ma jaqhal ta raaq aa

⁵ I tinmat nokwa, nang aa phong miqtang ma jaksom kot shina rapney kamtey. Ning ba rangma sammitey ang ajo tho nang aa ning rangma eshimal hun som u.

⁶ Ning mondoli náng thu eq ba tinmat tung aa raaq batta. Shkewa chamal nuk aa irimal wang ning bari haq náng katma ta, ning ma eshi haq náng kat rangma jaqhal nong kot inn.

⁷ Ning aa Gentile miqtang jak wang nong chuk hung aa, Jesu khristo jaksom lot som rangma thalat ta.

⁸ Iri rangma hiqtang aa iri miqtang raa unong eq ching, irimal ang eq ning jamoq hiqtang atho asing jaksom shina arum aa somtey tang ang ni.

Diotrephes nia Demetrius

⁹ Nga mondoli tang ma athol liklo ka eq tahol táng, etharin Diotrephes, ning solwa angma nuk ta, etho nga chamlang ta bat táng tha piq aa tat moq angta.

¹⁰ Nga baluk o eshináng ka náng, piq aa chamlang somlo ta sha thaji relna bat náng; í tung aa raaq chamlang raaq batta etho jashit raaq tang batta, iritang raa nga bat náng. Piq aa ira chen som moq; piq aa adak uhantey tang piq rel náng thu ajo thawan moq. Etho piq aa chamtey uhantey eq ning tha thawan ma ang ajo tho ning sha táng aa etho ning sha mondoli wang latchak ma tathin ta.

¹¹ I tinmat nokwa, chamlang jashit shi nak kaling u, etharin chamlang aqhal aa iri hun somlo u. Utang eq jaqhal somlo aa, piq Shkewa wang etho utang eq jashit somlo aa, piq aa Shkewa sha khi moq.

¹² Thaji miqtang aa Demetrius jaqhal ta batta, esha asing raaq. Í atho piq tung aa raaq jaqhal eq miikkhi ko i, etho í aa chamlang ta bat i esha asing ta nim atho usam eq inn.

Uthun raaq

¹³ Nga nang ma daqhan tung aa raaq bat ma nuk ang, etharin cheylap ni uka wang witma nuk mong.

¹⁴ Nga kalo ba jamoq tachong ma tungmang shing ang, etho miikthim khangrim wan ma nuk ang.

¹⁵ Ba jamna nungmay cham ang aa. Banoknu wa tang thaji aa jaktachap kot aa. Eshina tongtey noknu wa tang ma ashey ashey miing o jaktachap kot inn.