2 Timothy 4 - Muklom

¹ Shkewa etho Khristo Jesu jakho na, bara atharang etho utiktey tang phung na, etho piq Lungwang ang eq kalo kat tungkang o nga nangma raaqkhat kota phang:

² Nang aa raaq phanchan u, rangham aqhal ang moq ang ajo tho thaji rangham sho kacha eq tong u, miqtang ma asing raaq tang shi tatal kot u, etho jaqhal lam shi takhi u etho tinthajong kot u. Iri raaq tang ri tinthanan eq tatal kot u.

³ Chammatakoi irimal rangham thu phana baluk o miqtang asing tatal ma nukmoq angna. Etharin ning tinuk o hun esha somlo na etho ning aa chamlang tat ma rapney tathin aa, eshimal tataltey tang sha ning aa thajoq na.

⁴ Ning aa asing tat sha shingchak eq tat ching ang moq manphan sha tat eq ngik na.

⁵ Etharin nang irimal raaq wang rangtun eq tong u, tsamnang nan u, tungtang qhal phanchan u etho Shkewa bajak o jaksom kota phu eshi thaji shi tahom u.

⁶ Chammatakoi i rollung sha pinthong mal ukot sey táng etho nga iri mingkang wang wáng ma rangham sey thupha.

⁷ Nga ashey jaqhal thamol sey ang táng, nga tatut jol tahom sey táng etho nga kam alam na utong sey ang táng.

⁸ Etho thanga irangma mungtan na ashey kongpha shing aa, esha asing rollung na tongtey ma shing aa cha khopok. Asing eq phung kottey Teyhungwa eq eshi cha khopok sha irangma piq wey kat Saal o kot na. Ngama chen ang moq, etharin utang eq piq jukshey weykat rangma tungmang shing aa, ning thaji ma tho kot eq na.

Paul aa Timothy ma uraaq bat aa

⁹ I jamnáng kalo katma tathin u.

¹⁰ Chammatakoi Demas aa iri mingkang ma tinmat eq nga shingchak eq qhing chuwang ta etho piq Thessalonica samhaq náng qhing chuwang ta. Crescens Galatia náng qhing chuwang ta, etho Titus Dalmatia náng qhing chuwang ta.

¹¹ Luke chen i jamna. Mark ni sol eq i relnáng thuphu, chammatakoi piq aa ijaksom na nga jin nong eq phanáng.

¹² Nga Tychicus Ephesus náng takat táng.

¹³ Troas samhaq na Carpus jakna nga i khat shingchak táng shi náng thuphu jo som kat phu, etho likdap shi tho bara maan khup wang kacha shing ta shi som kat phu.

¹⁴ Janngam somtey Alexander aa ngama daqhan tasunrum taphang, piq aa somlo ta shima Teyhungwa piq ma wey kot na.

¹⁵ Nang tho piq wang rangtun eq tong u chammatakoi hiqtang tung aa raaq tang tha piq aa rapney miiksuk ta.

¹⁶ Phang tho nga khaphung na lang táng tho utang tho ijamna ahung angta, thaji eq nga shingchak taphang. Shkewa ning sha tol cham eq chak aa.

¹⁷ Etharin Teyhungwa i jamna angta etho ngama tarong kotaphang, irimal ang eq itungkang o tungtang qhal phanchan ma etho thaji Gentile tang aa tat ma kota. Etho piq aa nga shaq nung wang thalun ta phang.

¹⁸ Etho Teyhungwa thaji jashit wang thalun phanáng etho piq rangmungtan náng nga hom eq sol chuwan phanáng. Piq rangma salwet phun amun cham ang aa. Amen.

Uthun raaq

¹⁹ Priscilla, Aquila etho Onisiphorus himtey tang ning thaji ma nga jak tachap kot ang.

²⁰ Erastus Corinth samhaq na dak tong aa, etho Trophimus atak angta, eshirangma nga piq tha Miletus na shingchak táng.

²¹ Rangsong tok angwey moq jakho chamal eq tho uthok angma tathin u. Eubulus, Pudens, Linus, etho Claudia nang ma jak tachap kot aa etho adak phong tang atho jak tachap kot aa.

²² Teyhungwa ba tsija jamna cham ang aa. Shkewa ráng manchan nim thaji ma cham ang aa.