2 Timothy 1 - Muklom

¹ Iri likwit raa Paul ching kowang. Shkewa tinuk wang nga Khristo Jesu apostle etho Khristo Jesu o hiqtang ma bara rollung kap ma rangtum ta, eshi tung aa raaq phanchan ma nga raa takat taphang.

² Isa Timothy, nga nangma iri likwit raa wit ang. Shkewa etho hiqtang Teyhungwa Jesu Khristo aa nang ma ráng manchan, tinshit etho nungmay cham kot aa.

Kechu ajong nia tin thajong

³ Nga Shkewa ma kechu ajong kot ang, i tey aa wa tang aa somta thimal nga asang tin o piq ma somlo ang. Nga rangpal rangwung salwet barang ma tathin eq romtam chu eq Shkewa ma kechu ajong kot ang.

⁴ Ba miikshit sha tasik eq nga ba jamoq tachong ma nuk ang, irimal ang ajo nga rapney sungrang náng.

⁵ Nga ba asing kam sha tasik ang. Irimal kam sha jakho bawi Lois etho banu Eunice na angta. Ba kam tho eshimal ta nga usam eq ang.

⁶ Eshirangma nga ba khom o ijak shing ang rangham tho Shkewa nang ma bara jakkot kot taphu, eshi jakkot sha ba ching kowang thalat moq angma jaqhal eq shing ma tasik u.

⁷ Chammatakoi Shkewa hiqtang ma bara Tsija kota, eshi Tsija shey hiqtang tacho phami, etharin Tsija shey hiqtang ma tarong, tinmat, etho hiqtang ni hiqtang tinthanan shing ma kot aa.

⁸ Eshirangma hiqtang Teyhungwa tung aa raaq miikkhi kot ma nak rakri u, etho nga piq rangma chukna ta tho nak rakri u. Etharin Shkewa bara nang ma tarong kota phu, eshi tarong wang tungtang qhal rangma i jamoq nang tho tsamnang ang ching.

⁹ Piq aa hun hiqtang thalun taphi etho asang rollung tong rangma hiqtang hal taphi. Hiqtang aa jaqhal jaksom somlo ti ta ang moq, etharin piq tinthin etho ráng manchan tungkang o piq aa irimal somlo ta. Iri ráng manchan raa Khristo Jesu o rangham phang jakho wang hun hiqtang ma kota phi.

¹⁰ Etharin thanga hiqtang thaluntey Khristo Jesu kat tungkang o hiqtang ma iri ráng manchan raa takhi taphi. Piq aa utik tarong sha tathun ta etho tungtang qhal tungkang o timoq phan rollung sha hiqtang ma takhi ta.

¹¹ Iri tungtang qhal phal kot rangma Shkewa nga apostle nia tatal kottey ma tal taphang.

¹² Eshirangma nga iri tang tsamnang raa tsamnang ang. Etha otho nga rakri mong, chammatakoi barima kam táng esha nga usam eq ang etho piq aa nga ma chamlang kota phang sha, piq jukshey wey kat saal nángduk jaqhal eq jin shing náng ta nga usam eq ang.

¹³ Bari raaq raa nang aa iching wang tat tu eshi asing tatal tang shi jaqhal eq somlo u etho kam nia tinmat na tong u, bara Khristo Jesu o hiqtang ma ang aa.

¹⁴ Asang Tsija tungkang o bara hiqtang tinmong na, nangma kota jaqhal tang shi ban u.

¹⁵ Nang aa usam eq u, thaji Asia mungtey tang aa nga shingchak eq taphang. Ning shiwang Phygelus nia Hermogenes tho atha.

¹⁶ Onisiphorus himtey tangma Teyhungwa tinshit cham takhi aa, chammatakoi piq aa juk daqhan ngama tin tharong kota taphang. Etho nga chukna ta piq rakri moq angta.

¹⁷ Etharin piq Rome samhaq náng thuta tho piq kalo hun tsamnang eq i jamoq tachong ma thuta pha.

¹⁸ Teyhungwa jukshey wey kat saal o piq ma utinshit cham takhi aa. Etho piq aa Ephesus na i rangma chamtan nong ta tha nang aa jaqhal eq sam u.