1 Peter 5 - Muklom

Shkewa kelwut wan

¹ Nim miqlang tang, nga nim ma likwit phang, nga nim mal miqlang etho Khristo tsamnang miikkhi kottey etho bara phun amun takhina eshina nga tho atha angnáng.

² Shkewa kelwut waan, bara nim jaktáng na, ning shi kelwut rimtey mal siin tan inn etho rimrang inn; kachang chang aa ang moq etharin Shkewa tinuk mal sungrang wang irimal somlo inn. Etho ngin ma nukma ang moq, etharin tin kot eq rimrang inn.

³ Bari miqtang raa nim ma kot ta, ning shi kachang chang aa jaktáng o nak shing inn, etharin ning aa tinkot eq nim ji cham phan aa.

⁴ Etho Ajong Kelwut rimtey takhi ajo, nim aa phun amun khopok sha kap nin, eshi rangham alip sha baluk otho munti moq angna.

⁵ Irimal hun jaro tang, nim tho miqlang tang jaktáng o tong inn. Nim thaji ashey eq ashey nong rangma tinmang ang inn, chammatakoi Shkewa tharangkatey ma miiksuk aa, etharin tinmang tey ma tinshit aa.

⁶ Iri rangma nim Shkewa ajong tarong jakkhung na tin thaman eq tong inn, ira ang ajo piq aa nim khakla rangham o tashat pha nin.

⁷ Nim thaji tinthin shi piq ma kot inn, chammatakoi piq aa nim rimrang eq phin.

⁸ Rangtun eq kacha eq tong inn, chammatakoi nim ralwa thangwa shaq mal lingqhing eq ngil aa etho utang sha chung wang táng ta bi chey aa.

⁹ Kam alam na arong tong eq piq shi táng inn, chammatakoi iri mingkang adak hantey tang tho irimal hun tsamnang chey aa ta nim aa usam eq inn.

¹⁰ Etharin nim chomrey tsamnang kap inn jo, tinshit tey Shkewa bara Khristo jam moq kara eq nim ma pattuk phun amun ma hal taphin, piq ni piq aa hun nim ma tarong, tinthajong etho jaqhal tatsing kot phanin.

¹¹ Pattuk piq rangma tarong cham ang aa! Amen.

Uthun raaq

¹² Nga Silas nong tungkang o iri athol liklo raa wit phang. Piq aqhal uhantey. Nim tintharong ma etho Shkewa asing ráng manchan miikkhi kot rangma nga wit ang. Iri tinshit roq tunshat inn.

¹³ Babylon mondoli miqtang, bara Shkewa nim jamoq tal taphin, ning aa nim ma jak tachap kot phin etho isa miqwasa Mark atho jak tachap kot aa.

¹⁴ Tinmat jamoq ashey eq ashey ma jak tachap kot inn. Bara Khristo na nim thaji ma nungmay cham ang aa.