1 John 1 - Muklom

Rollung kot Raaq

¹ Í aa nim ma rollung Raaq raa batphi, bara thaji ahung angta jakho wang hun angta. Í aa esha utat eq ti, etho í aa í miik wang khiti; ang ang aa, í aa sing siin eq ti etho í jak eq hun loti.

² Baluk o iri rollung raa takhita, í aa esha khiti; ethi rangma í aa eshi tung aa raaq ma miikkhi ko chey i, etho í aa nim rangma baluk otho thun moq iri rollung tung aa raaq bat chey phi, bara hiqtang wa jamna angta etho í ma takhi taphi.

³ Í aa chamlang khiti etho tat ti, eshi raaq sha í aa nim ma bat ko chey phi; irimal ang eq nim í jamoq rok rum pha nin. Í rok rum sha wa nia usa Jesu Khristo jamna.

⁴ Í sungrang tahom angma í aa nim ma eshi raaq sha wit chey i.

Shkewa raa alit

⁵ Thanga tungtang raa usa Miqwa ching wang í aa tat ti sha í nim ma bat ko chey phi, eshi raaq sha irimal; Shkewa raa alit etho piq mong na chamtho anak ahung.

⁶ Hiqtang aa bat i, hiqtang piq jamoq rok rum i, etharin hiqtang rangnak mong na tong i ta ang ajo, hiqtang aa hut bat i etho asing jaksom som mi.

⁷ Etharin piq alit na tong aa thimal hiqtang tho alit na tong ijo, hiqtang ashey aa ashey jamoq rok rum ni, etho Shkewa Miqwasa Jesu tahi wang, hiqtang ngarey tha tasang kota phi.

⁸ Í ngarey ahung ta hiqtang aa bat i jo, hiqtang ni hiqtang thadip i etho hiqtang tin mong na chamtho asing ahung.

⁹ Etharin hiqtang aa Shkewa jakho o hiqtang ngarey sha wungbat kot i jo piq aa hiqtang thaji ngarey sha tolchak phani etho hiqtang thaji jashit tang sha tasang phani chammatakoi piq uhan eq ching asing miq.

¹⁰ Hiqtang aa ngarey somlo mi angti ta bat i jo hiqtang aa Shkewa sha alik ma hun i, etho piq raaq hiqtang tinmong na ahung.