Na Saurongo Talana Te Marea Ia Luk 9 - Teha-Malango

Ia Jisas e sau diara e sangavulu ruka hana duli

¹ Tahuna te solo saira ia Jisas e sangavulu ruka hana duli, ia e sau vanira na susuliha ma na susulihana ni huru tarunga ma na vani maurisi tinoni oche.

² Me sau diara ma kara kori lengaa nina baravata ia God ma kara maurisira na tinoni ocheoche.

³ Ma ia Jisas e kori vahai vanira de, “Kamu mui laka tahaa siki lomiu omea tana diadia nia, vahai na radilomiu, na kei, na hahani, na golo, ma na oliolilomiu.

⁴ Tahuna ta kamu laba tatana chikai na vera, me tina kara solo lohamu kamu toha tatana chikai na vale, kamu toha lohamu tana vale nia me ke chau tahuna ta kamu dia choni lohamu tana vera nia.

⁵ Mi tina kamu laba tana vera tara hoso tahanilohamu, ma kamu basiaa na vera nia ma kamu chapu chonia na pasana na pera tualomiu tana vera nia, me ke tihisi labatia e picha limalomiu lohamu tina ke mailira na rota ira na tinonina na vera nia.”

⁶ Mara dia hana duli nira ia Jisas tana vera ma na vera, mara kori labatia na Saurongo Talana mara maurisira loera ira tara oche tatana visa na vera tara liuvia ira.

Ia Herod e tugaleta tana saurongona ia Jisas

⁷ Tana tahuna nia ia Herod te tinoni leho vanira ira i Galili, e valingea visa na omea taengana tara laba. Me tugaleta ia matengana kesana ara koria te mauri visu laka ia Jon Lesovitabu,

⁸ mi kesana ara koria te mauri visu soha ia propet Elaeja, mi kesana lakabaa ara kori vahai ia e chikai lakabaa vidadira na propet ni sau nira te mauri visu laka nia.

⁹ Me kori vahai soha ia Herod de, “Ia Jon u tohi pichu nohaa nau na liona. ?Misei laka tinoni tu valingea nau na kokorina de?” Ma ia Herod e ngangavina ke morosi matana ia Jisas.

Ia Jisas e tuva hana e chehe toha na tinoni

¹⁰ Mi tahuna tara visu mai nina tinoni ni saurongo ia Jisas, ira ara kori lenga vania ia visa na omea tara agosia ira. Ma ia Jisas e udungira mara dia tovosidira tana vera i Betsaeda.

¹¹ Ma na toha na tinoni ara valingea te dia ia i Betsaeda, mara buke ira, ma ia e mamahela na haera me valagu tana rongona nina baravata ia God, me vani maurisira ira tara oche.

¹² Mi tana sungata au-au, mara mai ira na sangavulu ruka hana duli ia Jisas mara kori vahai vania de, “Ko raira na tinoni nira kara dia tana vera varangi nira inge, ma kara dai hadira hahani ma na malengana ta kara biku, matengana ide na malengana te mangu.”

¹³ Ma ia Jisas e kori vahai vaniloera de, “Kamu tuva hadira siki hahani.” Mara kori vahai tinoni loera de, “Ihami ami tamani bamua e chehe na bred me ruka na cheche de. ?Teha mo padaa hoe kami dia hami na pelu hahani laka me ke ni tuhura na toha matadu de?”

¹⁴ Me tihilana ke chehe toha na mane tana tahuna nia. Ma ia Jisas e kori vaniloera hana duli nira kara votara na tinoni nira ma kara tohotuu ke chehe sangavulu tinoni tatana chikai na ala-ala.

¹⁵ Mara agosi taonia ira na hua te koria ia mara tohotuu tinoni nira i pari.

¹⁶ Ma ia Jisas e kapukua e chehe na bred me ruka na cheche me moro dato i heven me kamaa ia God. Kode, me ngitia na bred ma na cheche nira me sau vanira hana duli nira mara vatasa vanira na toha na tinoni.

¹⁷ Mara hahani mara masu kalavata. Mi bukena, hana duli nira ia Jisas ara chako kokolura na tirenge ni hahani nira, me danga e sangavulu me ruka na kei.

Ia Pita e kori lengaa ia Jisas na Mesaea

¹⁸ E chikai na dani tahuna te toha tovosi ia Jisas me nonginongi, ma na hana duli nira ara mai tatana ia. Ma ia Jisas e gesuara, “?Vahai vei? ?Visa kode na tinoni ara padaa kovahai isei nau?”

¹⁹ Mara kori vahai hana duli nira de, “Kesana ara koria kovahai hoe ia Jon Na Tinoni Lesovitabu. Mi kesana ara kovahai hoe ia Elaeja, mi kesana laka ara kovahai hoe e chikai lakabaa na propet tuali ni sau te mauri visu laka.”

²⁰ Me gesuloera ia Jisas, “?Mi lohamu amu padaa kovahai sei inau?” Me kori vahai ia Pita de, “Ihoe kalavata na Mesaea te sau maia ia God.”

²¹ Ma ia Jisas e kejaliloera kara mui na kori vani lakaa ke chikai.

Ia Jisas e kori lengaa nina matemate

²² Me kori vahai vaniloera laka de, “Inau na Dalena Tinoni, mi ngeni ba ku vajangi savi nomu, ma kara hoso tahaniu ira na tinoni leholeho ira na Jiu, ma nidira lehona nira ira na tinoni ni kere, mi ira na tinoni toto manasa tana nina keja ia Mosis. Ngeni ba kara labu mateu, mi bukena ke tolu na dani nau ba ku mauri visu soha.”

²³ Ma ia Jisas e leleo dia tatadira na toha me kori vahai vanira de, “Misei te ngavina ke mai bukeu nau, me ke lianga tovosia me ke maoni na kasoa nina kros me ke bukeu nau visa na dani.

²⁴ Rongona isei te pada solehanaa na mamaurina tovosi ngeni ba ke teha na tamania na mamauri sali. Misei te mate tana rongogu nau ngeni ba ke tamania na mamauri sali.

²⁵ Ba ke teha siki pepeluna tina chikai ke tamania na pari matadu de me ke luvu volo na mamaurina ia.

²⁶ Me tina chikai na tinoni ke vahamaa tana rongogu nau ma na nigu valagu nau, mi ngeni ba nau, na Dalena Tinoni, ba ku vahamaa vania tahuna tu ku laba mai nau tana mararagu nau mi tana mararana na Tohagu ma nina enjol tabu nira.

²⁷ Minau ku kori vanihamu na tutunina kalavata, kesana hamu tamu tutuu de ngeni ba kamu teha vata na mate po kamu morosia nina baravata ia God.”

E oli na hihilona ia Jisas

²⁸ E tihilana ke kode alu na dani te valagu vahai ia Jisas ia, me laba ia me udungiloera ia Pita ma ia Jon ma ia Jemes, mara dato tatana e chikai na vungavungana kara ni nonginongi.

²⁹ Mi tahuna te nonginongi ia Jisas, me tavonga ni oli na hihilona ia, me sere makamaka na kalekona.

³⁰ Mara ko tavonga ni laba ia Mosis ma ia Elaeja mara ko valagu kolua ia.

³¹ Me laba na marara ni heven tatakodira. Mi koera ko valagu kolua ia Jisas tana rongona tana nina matemate te ke hadovia ia i Jerusalem, me ke manalia visa na omea te kori naho nohaa ia God vania ia.

³² Ma ia Pita ma na hana duli koera ara biku, mi tahuna tara rerei na tinoni loera mara morosia na mararana ia Jisas me ruka na tinoni tara ko tutuu kolua ia.

³³ Mi tahuna ia Mosis ma ia Elaeja ko tuturiha na dia basia ia Jisas, me kori vahai ia Pita de, “!Taovia, e talana solehana tami toha lohami de! Ngeni ba kami lohoa ke tolu na vale halahala de. Ke chikai vaniho hoe, me ke chikai vania ia Mosis me ke chikai vania ia Elaeja.” Ma ia Pita e teha vata manasana nina valagu te koria nia.

³⁴ Tahuna vahai te vavalagu ia Pita me sivo mai na parako me kopiloera, mi loera ara sola tara matahu.

³⁵ Me tangi chikai na valagu tana lalona na parako nia me kori vahai de, “Ide na borongana Dalegu nau tu vili nohaa. !Kamu valingea na hua te koria ia ma kamu rongo mangana!”

³⁶ Mi tahuna te tangi kode na valagu nia, mara hae bamua ira ia Jisas te toha tovosi. Mara mui loera mara teha na kori lenga vania siki tinoni na omea tara haea nia.

Ia Jisas e maurisia e chikai na garimane te hadoa na tarunga

³⁷ Tana dani ngana chikai, ia Jisas me tolu hana duli loera ara basiaa na vungavunga nia mara sivo mai mara laba tuhua na toha na tinoni.

³⁸ Me chikai na tinoni tana lalodira na toha nia e huu dato me kori vahai de, “!Taovia, inau nongiho hoe ko sangaa na dalegu nau. !Ia pelelee kiki bamu dalegu nau ia!

³⁹ E chikai na tarunga te hanaa sivolia ia, me vahania me huu leho me harihariri me chulu ubena. Ma na tarunga nia e maravia ke sekoli savaliua me utu laka na basiana.

⁴⁰ Mu nongira hamu duli nira hoe kara huru chonia tarunga nia mara teha na tangomana.”

⁴¹ Ma ia Jisas e valagu vanira me kori vahai vanira de, “Ihamu tinonina tahuna de e seko solehana nimiu naunau mamu voo na donua ia God. ?Ke vahai laka vei okana tu ku toha koluhamu nau? Me utu nau na toha koluhamu tana mamauri vahai nia.” Me kori vahai laka ia de, “Tahaa dalemu ko mai.”

⁴² Tahuna te maimai na garimane nia tatana ia Jisas, me laba na tarunga nia me vahania ia me ruchu sivo i pari me harihariri. Ma ia Jisas e kejalia na tarunga ke dia choni tatana garimane nia me mauri visu gari nia. Me sau visua garimane nia vania na tohana.

⁴³ Mi ira kode ara makai kodea nina susuliha ia God. Tahuna tara mamakaia ira visa na omea nira te agosia ia Jisas, ma ia e valagu vanira hana duli nira me kori vahai vanira de,

Ia Jisas e valaguna laka na mateana

⁴⁴ “Kamu valinge vataa hamu na hua tu ku kori vanihamu nau. Inau, na Dalena Tinoni, ngeni ba kara sau diau nau tana limadira ira nigu hala.”

⁴⁵ Ma na hana duli nira ara teha na manasana nina valagu ia Jisas. E toha koku vanira ma kara ni teha na pada hadovia. Mara matahu ira na gesuaa ia Jisas na hua na papadana nina valagu ia.

Isei ngeni ba ke leho pichakae tana nina baravata ia God

⁴⁶ Me laba chikai na vaisuhuni tana levuhadira hana duli nira ia Jisas, tana rongona isei tana vidalodira loera te leho pichakae.

⁴⁷ Ma ia Jisas e hanaa na hua tana tobadira ira me tahaa ia chikai na gari pepechi me tuchaua lilihina.

⁴⁸ Bukena, me kori vahai vanira hana duli nira de, “Isei te talana vania gari de tana asagu nau, ia e talana vani lakamuu inau, misei te talana vaniu nau, ia e talana vani lakamua isei te sau maiu nau. Matengana isei te pada sivo tovosia tana levuhalomiu lohamu ia kalavata te leho pichakae nia.”

Ia Jisas e kori labatia isei na ninana ia

⁴⁹ Ma ia Jon e valagu dia vahai vania ia Jisas de, “Taovia, ihami ami morosia e chikai na tinoni te huru tarunga tana asamu hoe, mami tongo vania hami, rongona ia e teha na sanga toha tana nida saikolu hita.”

⁵⁰ Me kori vahai ia Jisas vaniloera hana duli loera de, “Kamu mui lohamu na tongo vania ia, rongona isei te teha na halatilomiu lohamu ia te papi kolulomiu lohamu.”

Ara hoso tahania ia Jisas i Samaria

⁵¹ Ia Jisas e hanaa te mai varangi nina tahu ke dato i barahata, me mai susuliha manasana ia ke dia i Jerusalem.

⁵² Me sau nahoa ia kesana tinoni saurongo, mara laba tatana chikai na vera i Samaria mara vangarau vania visa na omea pitua ia.

⁵³ Mi ira na vangana na vera nia ara teha na mamahela vania ia Jisas ke mai tana vera nia rongona tara hanaa ira ia e diadia i Jerusalem.

⁵⁴ Mi tahuna hana duli koera ia Jisas, ia Jemes ma ia Jon, ara ko morosia na omea te vahai nia, mara ko kori vahai koera de, “?Taovia, hoe ngavina ko soloa kohami na lake te ke vota mai i heven me ke beho sekolira ira vahai te gonia ia Elaeja i sau?”

⁵⁵ Ma ia Jisas e leleo dia tatakodira me rapachikoera matena tana kodira kori nia.

⁵⁶ Mi bukena, mara basiaa ira na vera nia mara dia laka tatana chikai na vera.

E tolu na tinoni tara ngavina bukea ia Jisas

⁵⁷ Tahuna tara diadia ira i sala me kori vahai chikai vidalodira de, “Taovia, inau ngeni ba ku bukeho visa meana to ko dia hoe.”

⁵⁸ Ma ia Jisas e valagu visu vania me kori vahai de, “Na pai achi e tamania na babana, mi ira na manu ara tamania na nikudira. Minau na Dalena Tinoni u teha tamani siki malengagu tu ku jaro mu ku mango tatana.”

⁵⁹ Ma ia Jisas e valagu vani lakaa chikai na tinoni me kori vahai vania de, “So, ko mai mo ko bukeu nau.” Me kori vahai tinoni nia de, “Taovia, ko talasangau nau ku visu luhi i veragu mu ku kokua na tohagu.”

⁶⁰ Me kori vahai ia Jisas vania tinoni nia de, “Ko livu vanira ira tara mate kara kokura ira tara mate. Mihoe ko dia mo ko kori lengaa nina baravata ia God.”

⁶¹ Me mai laka chikai tinoni me kori vahai vania ia Jisas de, “Taovia, inau ngeni ba ku bukeho hoe, mo ko tala vaniu nau ku dia mu ku vailivu luhira ira tana valegu nau.”

⁶² Me kori vahai ia Jisas de, “Na tinoni te tuu naho me momoro visu saliu e teha tihilana na agosia na ago tana nina baravata ia God.”