Na Saurongo Talana Te Marea Ia Luk 7 - Teha-Malango

Ia Jisas e vani maurisia nina tinoni ago tinoni lehona i Rom

¹ Me tahuna te kodea ia Jisas nina valagu nira vanira ira na tinoni, me tuu me dia i Kapaneam.

² Me toha tana vera nia me chikai na tinoni leho tana malahai tatadira ira na Rom. Me tamania ia chikai nina tinoni ago te hae kae solehanaa te oche me varangia ke mate.

³ Mi tahuna na tinoni leho ni Rom nia te valingea na korina ia Jisas, me sau dia kesana na tinoni leholeho ira na Jiu tatana ia Jisas kara ni nongia ke mai me ke vani maurisia nina tinoni ago ia.

⁴ Mi ira ara laba tatana ia Jisas mara nongi susuliha mara kori vahai vania de, “Na tinoni de e tihilana hoe ko sangaa,

⁵ rongona ia e talana vanihita na tinoni ni Jiu, me lohoa nimami vale lotu hami.”

⁶ Me tuu ia Jisas me bukera ira. Tahuna tara varangi noha ira na chau tana valena na lehona nia, me laba na tinoni nia me kejalira nina papi nira kara ni kori vahai vania ia Jisas de, “!Taovia, ko basia hoe na tataga na mai! E teha tihilau nau ko mai sahe hoe tana valegu nau.

⁷ Ia rongona vahai e vu teha tihilau nau na atu tatamu hoe. Me tuhu bamuho hoe ko valagu mai me ke laka nigu tinoni ago nau.

⁸ Inau u kori vahai ia rongona nau e chikai na tinoni tu ago vavana nigu taovia leho mu tamania nigu ala-ala ni malahai. Me tina ku raia ke chikai na tinoni malahai mu ku kori vahai vania de, ‘!Ko dia!’ me dia ia. Me tina ku soloa ke chikai mu ku kori vahai vania de, ‘!Ko mai!’ me mai ia. Me tina ku kejalia ke chikai nigu nonoru mu ku kori vahai vania de, ‘!Dia ko agosia na omea vahai de!’ me agosia ia.”

⁹ Me makai ia Jisas te kori vahai na tinoni lehona nia, me tu pililiu me kori vahai vanira na tinoni nira tara bubukea ia, “!Inau ngangavina ku kori vanihamu kode hamu, nau u teha vata chaulia tana lalona ira na tinoni ni Israel ke chikai te ke tamania na dodonu tatagu nau vahai na tinoni de!”

¹⁰ Mi tahuna tara visu ira na tinoni saurongo nira tana valena na tinoni lehona nia, mara morosi nohaa ira nina tinoni ago ia te laka noha.

Ia Jisas e vani maurisia na dalena chikai na daki chamu

¹¹ Mi bukena mai soha, me dia ia Jisas tatana chikai na vera, asana i Nain. Me duli kolura hana duli nira ma na ala-ala na tinoni.

¹² Mi tahuna tara chau ira lilihina na matana sala ni vera nia, mara chulu mai na ala-ala na tinoni tara voua chikai na garimane te mate mara diadia na giluana. Ma na garimane te mate nia, ia bamu na dalena mane e chikai na daki chamu, ma na ala-ala na tinoni tara dia kolua ia.

¹³ Mi tahuna te haea na Taovia na daki nia, me sahavi solehanaa me kori vahai vania de, “Ko mui hoe na ora.”

¹⁴ Ma ia Jisas e dia varangisia na kokorana na tinoni mate nia me chibelia na belabela nia, mi ira na tinoni tara voua na belabela nia ara tu mui, ma ia Jisas e valagu vania na garimane te mate nia me kori vahai de, “!Tugaho, inau u kejaliho hoe ko tuchau!”

¹⁵ Me tohotuu na garimane te mate nia me tuturiha na valagu, ma ia Jisas e sau visu vania na tinana.

¹⁶ Mi ira kode ara matahu mara livu kaea ia God mara kori vahai de, “E chikai na propet taengana te laba lenga tana levuhadada hita. Ia God te mai me sangara nina tinoni.”

¹⁷ Ma na kokorina tana rongona ia Jisas e tangi talihu laba tana vera matadu i Jiudia ma na vera nira lilihina i Jiudia.

Ia Jisas e tuhu visua nina gesugesu ia Jon na Tinoni Lesovi Tabu

¹⁸ Hana duli nira ia Jon Na Tinoni Lesovi Tabu ara kori vania ia Jon visa na omea kode te agosia ia Jisas. Me tuu ia Jon me solokoera e ruka na tinoni lalona hana duli,

¹⁹ me saukoera ko dia tatana na Taovia kara ko gesuaa, “?Vahai vei? ?Ihoe nomu na Mesaea te koria ia God ngeni ba te ke mai? ?Teha ma kami pitu vataa ke chikai tinoni tovosi?”

²⁰ Mi tahuna tara ko chau koera tatana ia Jisas mara ko kori vahai vania de, “Ia Jon Na Tinoni Lesovitabu e raikomami kohami kami ko mai na gesuaho hoe, ‘?Vahai vei, ihoe nomu na Mesaea te koria ia God ngeni ba te ke mai? ?Teha ma kami pitu vataa ke chikai tinoni tovosi?’ ”

²¹ Mi tana tahuna kalavata nia, ia Jisas e vani maurisira danga na tinoni te hadovira dangana na masahi vahai tara oche tatana ma ira te sivolira na tarunga seko me vahanira danga na tinoni dokodoko mara momoro.

²² Me kori vahai vanikoera nina tinoni ia Jon de, “Kamu ko visu kohamu kamu ko kori vania ia Jon visa na omea tamu ko haea mamu ko valingea kohamu de. Ira na tinoni dokodoko ara momoro, mi ira na tinoni tara lohu ara didia, mi ira na tinoni tara mudo e male na kokoradira, mi ira na tinoni tara mui na valingedira ara vavalinge, mi ira na tinoni tara mate ara mauri visu. Minau u kori lengaa na saurongo talana vanira ira na tinoni tara teha tamani siki omea.

²³ !Me talana solehana baa vanira ira tara tamani dodonu tatagu nau mara teha na tu pililiu na manasadira!”

²⁴ Mi tahuna tara ko visu hana duli koera ia Jon, ma ia Jisas e tuturiha na valagu vanira ira na toha na tinoni, me kori labatia ia Jon me kori vahai de, “?Na tinoni vahai vei tamu dia hamu morosiana tana talu mangu? ?Na tinoni te vahai na maloso ni ade te leo valegoa na hurihuri?

²⁵ ?Teha ma na hua tamu dia hamu morosiana? ?Na tinoni te sahelia na kaleko talana? !E teha vahai ia! Ira na tinoni tara sahelia na kaleko talana mara toha talana ngeni ba kamu morosira tana valena na tinoni taovia leho, me teha kamu morosira tana talu mangu.

²⁶ ?Teha mamu ngavina morosia chikai na propet? E mana, ihamu amu morosia chikai na tinoni te leho pichakae liungisia na propet nira i sau.

²⁷ Ma ia Jon na tinoni te kori labatia ia God tana Mamare Tabu, “‘Inau ngeni ba ku sau hidaa nigu tinoni saurongo vaniho, ma ia ke hida me ke hotosia na sala naho vaniho.’ ”

²⁸ Ma ia Jisas e kori vahai laka de, “Inau u kori vanihamu, ia Jon e pichakae liungisira ira kode na tinoni tara vasu hidara noha i sau. Me seisuge ke vahai ia, ma na tinoni te pechi tana nina baravata ia God te pichakae liungisia laka baa ia Jon.”

²⁹ Ma ira kode visa na tinoni, me seisuge ira na tinoni taha takisi ara valingea ia, mara valinge vagoa nina naunau ia God te hoto, mara tala me lesovi tabura ia Jon.

³⁰ Mi ira na Parasii ma na tinoni toto manasa tana nina keja ia Mosis ara hoso tahania nina talana ia God te vanira, mara hoso ira ia Jon ke lesovi tabura.

³¹ Ma ia Jisas e valagu vanira laka me gesuara, “?Ira na tinonina tana tahu de na tinoni vahai nomu vei?

³² Ira ara vahai na gari tara toha tana pakoka mara nenego, mara vaihuvihi mara kori vahai de, “Ihami ami uvi halevu vanihamu mamu hoso hamu na havai. Mami linge vanihamu na lingena sasahavi mamu hoso hamu na ora.

³³ “Ia te vahai kalavata tahuna te toha ia Jon Na Tinoni Lesovitabu. Ia e teha na hani bred ma na inu vuaeni, mamu kori vahai hamu ia e tamani tarunga.

³⁴ Mu mai nau na Dalena Tinoni, mu hani bred mu inu vuaeni, mamu hoso tahaniu mamu kori vahai de, ‘Kamu hae dia ba tinoni nia. Na hahani ma na inu bamu te leho vania, ma nina papi ia ira na tinoni taha takisi mi ira na tinoni sekoseko.’

³⁵ Mi ira tara hae vagoa nina valagu ia God ara tihisi lengaa na sasaha talana te hoto.”

Ia Jisas e hahani kolu chikai na tinoni Parasii

³⁶ Me chikai na tinoni Parasii e nongia ia Jisas ke dia hahani kolua ia, ma ia Jisas e dia tana valena na Parasii nia, me tohotuu me hahani kolua ia.

³⁷ Mi tana vera nia e toha chikai na daki te toha tana seko me valingea ia Jisas te mai hahani kolu na tinoni Parasii nia me taha maia chikai na lasa pepechi ni oela te sisihini talana.

³⁸ Me tohotuu sivo bukena tana lilihi ni tuana ia Jisas me tuturiha na ora, ma na kolo ni matana na daki nia e ruchu sivo me ragosia na tuana ia Jisas. Me tahaa na daki nia na pulu vungana me savulaa me uaa na tuana ia Jisas, kode me dora dia lakaa na oela sisihini nia tana tuana ia Jisas.

³⁹ Tahuna na Parasii nia te morosia na hua te agosia na daki nia, me kori vahai tovosina ia de, “Tina vahai na tinoni de na propet tutuni, ngeni ba ke hae vagoa ia na daki te chibelia ia na daki te toha tana seko.”

⁴⁰ Ma ia Jisas e kori vahai vania ia Saemon de, “Saemon, inau ngavina ku kori vaniho hoe chikai na agutu.” Ma ia Saemon e kori vahai vania ia Jisas de, “Baia Ticha, ko kori vaniu.”

⁴¹ Ma ia Jisas e valagu me kori vahai de, “E ruka na tinoni ara ko kabiu golo tatana chikai na tinoni tatamani. Me chikai vidakodira e kabiua e chehe sangatu na golo, me chikai e chehe sangavulu bamu.

⁴² Mi koera kode ara ko utu na tuhu visu vania nina golo tinoni nia. Ma na tinoni tatamani nia e pada purusahani bamua kodira kabiu tinoni koera nia. ?Me vahai vei? ?Isei vidakodira tinoni koera nia ngeni ba ke pada sulihaa na tinoni tatamani nia?”

⁴³ Me valagu visu vahai ia Saemon de, “Inau u pada vahania ia na tinoni te tamania na kabiu leho nia me kori vania ke mui tuhua nina kabiu.” Me kori vahai ia Jisas de, “Ihoe o kori mana.”

⁴⁴ Me leleo dia tatana daki nia me valagu dia vania ia Saemon, “?Ihoe o morosia na daki de? Inau u sahe mai lalona valemu hoe mihoe o teha sau vaniu nau na kolo ku vulia tuagu. Ma na daki de e vulia tuagu nau tana kolo ni matana, kolu me savulaa tana pulu vungana.”

⁴⁵ Mihoe o teha na uau nau tahuna tu laba mai nau, ma ia e teha na mango uana na tuagu inau.

⁴⁶ Mihoe o teha na hae kaeu nau mo ko ulia na oela tana vungagu nau, ma na daki de e hae kaeu nau me doraa na oela sisihini tana tuagu inau.

⁴⁷ Minau u kori vaniho ihoe, nina sasahavi leho daki de vaniu nau te tihisi labatia nina seko danga nira e kori kenihua kodea ia God. Misei tu kori kenihua nidira seko pepechi nira ba ke pepechi nina sasahavi.

⁴⁸ Ma ia Jisas e kori vania na daki nia, “Nimu seko nira hoe u kori kenihua kodea nau.”

⁴⁹ Mi ira tara sanga na hahani tana tahu nia ara vaikorihi mara kori vahai de, “?Isei numu tinoni de te hanaa na kori kenihua nina seko tinoni?”

⁵⁰ Ma ia Jisas e kori vahai vania na daki nia de, “God e taha maurisiho hoe rongona tana nimu dodonu hoe tatagu nau. Ko dia tana rapo.”