Na Saurongo Talana Te Marea Ia Luk 23 - Teha-Malango

Ira na lehona tana Jiu ara taha diaa ia Jisas vania ia Paelat

¹ Mi ira kode tara sai nia ara tuu mara taha diaa ia Jisas vania ia Paelat.

² Mara tuturiha ira na kori vania ia Paelat visa nidira lelekaha tara keli vania ia, mara kori vahai de, “Ami chaulia hami na tinoni de e udungi ruria visa nimami tinoni nira hami. Me tongo vanira na pelu takisi vania ia Sisa. Me kori tovosia ia na Mesaea, na king.”

³ Ma ia Paelat e gesuaa ia Jisas, “?Vahai vei, ihoe na nidira king ira na Jiu?” Ma ia Jisas e kori vahai de, “E mana nimu kori hoe ia.”

⁴ Me tuu ia Paelat me kori lenga vanira nidira lehona nira ira na tinoni ni kere mi ira na toha na tinoni, me kori vahai de, “Inau u teha na chaulia siki omea sekoseko te goni savia na tinoni de.”

⁵ Mi ira ara susuhu mara kori vahai de, “Ia e naho vanira visa na tinonina tana provins de kolu nina sasani nia, me vahanira ira na tinoni mara vaikorehi mara vailabuhi. Me tuturiha mai tana provins i Galili, mi tahuna de e chau mai noha de.”

Ia Paelat e sau diaa ia Jisas vania ia Herod

⁶ Mi tahuna te rongosi vahania ba ia Paelat ia me gesuara, “?Na tinoni de na vangana i Galili?”

⁷ Mi tahuna te rongosia ia Paelat ia Jisas te vota mai i Galili, na vera te toha vavana na tinoni taovia ia Herod, me tuu ia me saua ia me dia tatana ia Herod, te toha i Jerusalem tana tahuna nia.

⁸ E mamahela solehana ia Herod tahuna te morosi matana ia Jisas, rongona e oka mai noha te ngavina ia na morosia ia Jisas. E valinge korina, me amesia na morosia tina ke agosia ia siki valajaja.

⁹ Me gesu tulevoa e danga na omea, ma ia Jisas e mui me teha na tuhua nina gesugesu nira ia Herod.

¹⁰ Mi nidira lehona nira ira na tinoni ni kere mi ira na tinoni toto manasa tana nina keja ia Mosis ara tutuu tana tahu vahai nia, mara kore mara keli vania ia Jisas.

¹¹ Ma ia Herod ma na nina malahai nira ara kori sekolia ia Jisas mara chiria. Mara saheli vania na kaleko vahai nina kaleko na tinoni taovia leho, mara sau visu vania ia Paelat.

¹² Me tuu mai sau koera ko vaihalatihi, mi okana nia, mo ko vaitalana vanihi ia Herod ma ia Paelat.

Ia Paelat e pedea ia Jisas

¹³ Ma ia Paelat e solo kokolura nidira lehona nira ira na tinoni ni kere mi ira na tinoni leholeho mi ira na toha na tinoni,

¹⁴ me kori vahai vanira de, “Ihamu amu taha maia tinoni de tatagu nau, mamu keli vania ia e udungi ruria visa na tinoni. Mi tana matamiu hamu u gesuaa nau ia, mu teha nau chaulia siki omea seko ke goni savia ia, vahai noha tamu para vania hamu.

¹⁵ Ma ia Herod e teha lakamu morosia siki nina ruri ia, me sau visu mai vanihita laka hita. Me teha na goni savia siki omea tihilana ke ni mate.

¹⁶ Minau ba ku kejalia nigu malahai kara hulia, kode mu ku livua ke dia.”

¹⁷

¹⁸ Mi ira kode ara huu leho mara kori vahai vania ia Paelat de, “!Ko labu matea hoe tinoni nia! Mo ko talasangaa ia Barabas ke chulu.”

¹⁹ Ia Barabas ara livua ira tana vale peresini rongona ia e chikai na vidadira ira na tinoni tara pidura ira na gaumane me labu mate tinoni.

²⁰ Ia Paelat e ngavina ke chuaa ia Jisas me valagu dia vanira laka na tinoni nira.

²¹ Mara huhuu mai ira mara kori vahai de, “!Ko labu matea! !Ko labu matea tana kros!”

²² Ma ia Paelat e valagu vanira laka tana tolunina tahu me kori vahai de, “Kamu koria hamu na hua te goni savia tinoni de. U teha nau chaulia siki nina ruri ke ni tihilana na mate. Mu ku kori vanira nau nigu malahai kara hulia mu ku talasangaa ke dia.”

²³ Mara huu leho laka ba ira mara kori vahai de, “Talana nomu ke mate ia Jisas tana kros.” Me mana nomu hadira ira.

²⁴ Ma ia Paelat e pedea ia Jisas ke mate vahai tara nongia ira tatana ia.

²⁵ Me chuaa vanira na tinoni tara kilia ira, na tinoni te toha tana vale peresini rongona te pidura ira na gaumane me labu mate tinoni. Me sau diaa ia Jisas ma kara agosi vania na hua tara kilia ira.

Ara poha vuruna ia Jisas tana kros

²⁶ Mi ira na malahai ara udungi dia ia Jisas, mi sala mara vaituhuhi kolu chikai na tinoni, asana ia Saemon, na vangana i Saerin i Afrika, te maimai i Jerusalem. Mara taria mara kejalia ke kasoa na kros nia me ke bukea ia Jisas.

²⁷ Na ala-ala leho ni tinoni ara dia bukea ia Jisas. Mi tana levuhadira ira e kesana daki tara sasahavi mara ngangaisia ia.

²⁸ Ma ia Jisas e leleo dia tatadira me kori vahai vanira de, “!Ihamu na dakina i Jerusalem, kamu mui na orasiu nau! Kamu orasihamu tovosi kolu na dalemiu.

²⁹ Rongona te varangi noha ke chau na dani ni rota leho, tana tahu nia ira na tinoni ba kara kori vahai ke, ‘E kiki, e talana solehana vanira na daki tara teha na tamani gari mara teha na vasu daledira, mara teha na chuchu gari.’

³⁰ Tana tahu vahai nia, ira na tinoni ba kara nongira na vungavunga nira ma kara kori vahai ke, ‘!Kamu punuhami!’ ma kara nongira na tetena nira ma kara kori vahai ke, ‘!Kamu punuhami matadu!’

³¹ Rongona tina kara sau rota vaniu nau, tu vahai na hai te mamauri rongona inau u teha tamani seko, me ke vahai laka vei ihamu, tamu vahai na hai te mate rongona ihamu amu tamani seko.”

³² Mara tahakoera kolu e ruka na tinoni vailabu mara dia ma kara ni labu matekoera kolu ia Jisas.

³³ Mi tahuna tara mai chau ira tana meana tara solo vahania ira Na Sulivunga, mara poha vuruna ira ia Jisas tana kros. Mara poha vuruna koera lakamu e ruka na tinoni vailabu kolu ia Jisas, chikai tana madoana me chikai tana maulina.

³⁴ Ma ia Jisas e kori vahai de, “Tohagu, ko kori kenihua hoe nidira ruri ira, rongona ira ara voo na hua tara agosia.” Mi loera na malahai ara votaa na kalekona nira ia Jisas mara choni buloru matedira.

³⁵ Mi ira na tinoni danga ara tuu mara momoro. Mi ira na lehona ni Jiu ara tuu mara changi kiana ia Jisas mara kori vahai de, “Ia e taha maurisira na tinoni tovosi, baia, mi tahuna de ka haea hita, tina vahai ia na Mesaea te vilia ia God, me ke taha maurisi tovosia.”

³⁶ Ma na malahai nira ara tuu dato mara changi kiana ia mara tihisi dia vania na vuaeni toga

³⁷ mara kori vahai vania de, “Tina vahai hoe na nidira king kalavata ira na Jiu, mo ko sanga tovosiho.”

³⁸ Me chikai na mamare tara marea ira mara pohaa tohuna tana nina hai pirivavala ia, te iju vahai de, “ide na nidira king ira na jiu.”

³⁹ Me chikai na vidakodira na tinoni vailabu koera te lelelu lilihina ia Jisas, e kori sekolia ia me kori vahai vania de, “?Ihoe nomu na Mesaea nia? Tina ke vahai ia, ko sanga tovosiho, mo ko sangakohami lakamu.”

⁴⁰ Ma na tinoni vailabu chikai e rapachia me kori vahai vania de, “Hoe tihilana ko matahunia ia God, rongona hoe ba ko mate tuhutuhu vahai lakamu ia.

⁴¹ Ikohita e tihilana kara labu kohita nomu, rongona kohita ko agosia na omea te seko. Ma na tinoni de e teha na agosia siki omea sekoseko.”

⁴² Mi tahuna nia me valagu dia vania ia Jisas me kori vahai vania de, “Jisas, ko padau nau tahuna ko tinoni taovia leho.”

⁴³ Ma ia Jisas e kori vahai vania de, “Nau u kori vaniho na kori tutuni, i ngeni de ba ko toha koluu nau tana verana talana ia God.”

E mate ia Jisas

⁴⁴ Mi tana levuha ni dani, me mate na aso me puti roiroi na vera matadu nia po e chau tana tolu kiloko te ngulavi.

⁴⁵ Ma na kaleko daho te lelelu tana Vale Tabu Leho nia e tarochi ruka.

⁴⁶ Ma ia Jisas e huu leho me kori vahai de, “!Tohagu, tana limamu hoe u livu atua nau na tarungagu!” E kori vahai ba ia, me mate piju ia.

⁴⁷ Ma nidira tinoni lehona ira na malahai e morosia visa na omea te laba, me livu kaea ia God me kori vahai de, “E mana nomu, na tinoni de na tinoni hoto.”

⁴⁸ Mi tahuna ira na tinoni tara mai saikolu tana tahu nia tara morosia na hua te laba, ara sasahavi solehana mara tuhia na aseasedira, mara visu i veradira.

⁴⁹ Mi ira tara hanaa ia Jisas, kolu na daki nira tara buke maia ia vota i Galili, ara tuu haru ba inge mara morosi maia visa na omea kode te laba nia.

Ia Josep e kokua ia Jisas tana baba

⁵⁰ Tana tahu nia, e toha chikai na tinoni, asana ia Josep, na vangana i Arimetia tana provins i Jiudia. Ma ia na tinoni talana te hoto na mamaurina. Me ia chikai na vidadira ira na tinoni tana vale pede ira na Jiu.

⁵¹ Me teha na tala kolu na pede tara pedea ira ia Jisas mara labu matea nia, me pipitua na maimai nina baravata ia God.

⁵² Me dia ia tatana ia Paelat me nongia na kokorana ia Jisas.

⁵³ Me taha sivoa me pulua tana kaleko me livu sahea tatana chikai na baba tara heli sahea tana marahova. Ma na baba nia ara teha vata kokua siki tinoni tatana.

⁵⁴ Mi tana tahu nia, na dani ni vangarau na Sabat. Me varangi noha ke tuturiha na Sabat.

⁵⁵ Ma na daki nira tara buke maia ia Jisas vota ia Galili ara duli kolua ia Josep, mara haea na baba ma na kokorana ia Jisas te jaro lalona.

⁵⁶ Mara visu ira i vera mara vangaraua na oela te sisihini talana kara ni ulia tana kokorana ia Jisas. Mi tana Sabat mara mango ira, tara taonia nina keja ia Mosis.