Na Saurongo Talana Te Marea Ia Luk 19 - Teha-Malango

Ia Sakias na tinoni taha takisi

¹ Ia Jisas e chulu sahe tana vera i Jeriko me taonia na salana na vera nia me diadia.

² Me toha chikai na tinoni, asana ia Sakias, na nidira lehona ira na tinoni taha takisi. Ma ia na tinoni tatamani.

³ Me ngangavina ke morosia ia Jisas, me utu rongona ia e kumu me veikapili na toha na tinoni.

⁴ Me rahe nahonaho ia me ba dato tatana chikai na hai, me pitua ia Jisas ke liu mai me ke ni morosia.

⁵ Mi tahuna te laba mai ia Jisas tana hana tuhu nia, me moro dato me morosia ia Sakias me kori vahai vania de, “Sakias, ko sivo mai kesa. Inau ba ku toha tana valemu hoe i ngeni de.”

⁶ Me sivo mai ia Sakias me mamahela, me udungia ia Jisas me dia tana valena.

⁷ Mi ira kode na tinoni ara morosi vahania, ba mara ngungutu mara kori vahai de, “Ia e dia me sahe tana valena chikai na tinoni sekoseko.”

⁸ Me tuu ia Sakias me kori vahai vania na Taovia de, “Ko valingea hoe, Taovia. Inau ba ku saua busuna nigu tatamani vanira ira tara teha tamani. Misei tu lekasira nau mu taha kokua nidira golo, nau ba ku tuhu visu vanira ke vati tahu.”

⁹ Me laba ia Jisas me kori vahai vania de, “I ngeni de ia God e taha maurisia na vangana na vale de, rongona nina dodonu na tinoni de e tihisia ia na kukuana tutuni ia Ebraham.

¹⁰ Inau, na Dalena Tinoni, tu mai ku ni daira mu ku taha maurisira ira tara vasau tatana ia God.”

Ia Jisas e koria na titihila tana chikai na tinoni taovia me sangavulu na tinoni ago

¹¹ Mi ira na tinoni ara pada vahania tina ke laba ia Jisas i Jerusalem, teha oka me ke laba mai nina baravata ia God. Ia vahai e vu ni koria ia na kori titihila de, me ke ni hotosia nidira papada ira.

¹² Me kori vahai ia Jisas de, “Toha me chikai na tinoni taovia. Ia e dia tatana chikai na vera vasau me ke ni tabua na taovia boroha, me ke lia chikai na tinoni taovia leho me ke ni morosi taonia nina tinoni, kode me ke visu mai.

¹³ Uluhina ke vu dia ia, me sololoera e sangavulu nina tinoni ago, me sau vaniloera tango chikai na kei ni golo me kori vahai vaniloera de, ‘Kamu ago lohamu tatana nigu golo nira de po ku visu mai nau.’

¹⁴ “Mi ira na vangana verana tinoni taovia nia ara hoso tahania tinoni nia ke lia nidira taovia leho, mara sau kori bukea mara kori vahai de, ‘Ihami ami teha ngangavina tinoni nia ke lia na nimami taovia leho hami.’

¹⁵ “Ma na tinoni taovia nia ara tabu nomua ira me lia na taovia leho, me visu mai i verana. Mi tahuna te visu mai ia me sololoera nina tinoni ago nira te sau vanira na golo, ke ni hanaa visa na golo tara chaulia loera tana lodira ago.

¹⁶ “Me mai laba na chikainina tinoni ago me kori vahai de, ‘Taovia, nimu golo hoe u ago nau tatana mu taha mai lakaa e sangavulu.’

¹⁷ “Me laba nina taovia me kori vahai vania de, ‘Talana, ihoe na tinoni ago talana. Me rongona hoe o ago manasa kolu tana omea pepechi tu livua tana limamu, inau ba ku livu vaniho ko morosi taonia ke sangavulu na vera leho.’

¹⁸ “Kode, me laba na rukanina tinoni ago me kori vahai de, ‘Taovia, inau u ago tatana na golo to sau vaniu nau, mu taha mai lakaa e chehe.’

¹⁹ “Ma nina taovia e kori vahai vania de, ‘!E talana solehana! Hoe ba ko morosi taonia ke chehe na vera leho.’

²⁰ “Me mai laka chikai na tinoni ago me kori vahai de, ‘Taovia, ide nimu golo hoe. U livu kokua tana lalo ni kaleko me toha koku.

²¹ Mu matahuniho rongona ihoe na tinoni to teha hotua chikai. Mo hanaa na tahaa na omea te teha siki nimua mo ko churia na lakana na omea to teha na chukaa.’

²² “Me tuu nina taovia me kori vahai vania de, ‘!Ihoe na tinoni ago lahulahu! Na hua to koria hoe ba ke pede tovosiho. Ihoe o hana noha vahai nau na tinoni tu teha hotuana chikai, mu tahaa na omea te teha siki nigua, mu churia na lakana na omea tu teha chukaa.

²³ ?Me vahai vei o vu teha hoe na livuana nigu golo nau tana vale ni livu golo? Mi tahuna tu ku visu mai nau mu ku hanaa tahaa nigu golo kolu na papabona.’

²⁴ “Me laba na taovia leho nia me kori vanira ira tara tutuu tana tahu nia, me kori vahai de, ‘Kamu taha chonia na kei ni golo tatana ia ma kamu sau vania na tinoni ago te tamania sangavulu na kei ni golo.’

²⁵ “Ma ira ara kori vahai vania de, ‘Taovia, na tinoni nia e tamani nohaa e sangavulu na kei.’

²⁶ “Ma na taovia nia e kori vahai vanira de, ‘U kori vanihamu nau, isei te ago talana tana hua tara sau vania, ba kara pabo vani lakaa nina tatamani nira. Misei te teha agosia siki omea tana hua tara sau vania, ba kara taha choni kodea visa nina omea levo tatana.

²⁷ Mi tahuna de, kamu taha maira hagu hala nira nau tara teha ngavinau nau ku taovia leho vanira, ma kamu labu matesira tana matagu nau.’ ”

Ia Jisas e varangisia i Jerusalem

²⁸ Bukena te kori vahai ia Jisas ia, me hida dia vanira ia mara dia i Jerusalem.

²⁹ Mi tahuna tara varangia ira na chau tana vera koera i Betfeis mi Betani tana Vungavunga ni Olivi, ma ia e sau hidaa e ruka hana duli me kori vahai vanikoera de,

³⁰ “Dia kohamu tana vera ta hae dia inge, mi tahuna tamu ko chau kohamu ba kamu ko haea e chikai na dale ni dongki vaolu tara soria inge te teha vata chikai na sahe tatana. Chuaa kohamu ma kamu ko udungia ke mai tatagu nau de.

³¹ Me tina ke gesukohamu ke chikai, ‘?Ko chuaa kohamu vati hua ia?’ ma kamu ko kori vahai vania de, ‘Na Taovia te ngavinaa.’ ”

³² Mi koera ko dia mara ko morosi kalavataa visa na omea vahai te koria ia Jisas.

³³ Mi tahuna tara ko chuchua koera na dale ni dongki nia, mi ira na tamanina ara gesukoera, “?Kohamu, vahai vei amu ko vu chuaa na dale ni dongki nia?”

³⁴ Mi koera ko tuhua mara ko kori vahai de, “Na Taovia te ngavinaa.”

³⁵ Ba, mara ko udungia koera na dale ni dongki nia dia tatana ia Jisas, mara ko nabasia na pupulikodira tana bukena mara ko sangaa ia Jisas me tohotuu tatana.

³⁶ Mi tahuna te didia vahai ia i Jerusalem, mi ira na toha na tinoni ara chaboa na pupulidira tana sala te liu ia Jisas tatana.

³⁷ Mi tahuna tara taonia na sala te sivo dia tana Vungavunga ni Olivi, mi ira na ala-ala leho hana duli nira ia Jisas ara tuturiha na haila leho tana mamahela, mara livu kaea ia God matena na koemana nira te agosia ia Jisas.

³⁸ Mara kori vahai de, “!Ia God ke sangaho, na king to mai tana asana na Taovia! Ma na rapo ke toha i heven ma ka livu kaea na asana ia God i tohu.”

³⁹ Mara tuu kesana na Parasii i lalodira ira na ala-ala nia mara kejalia ia Jisas mara kori vahai de, “!Ko kori vanira hamu duli nira kara toha mui!”

⁴⁰ Ma ia Jisas e kori vahai vanira de, “Inau u kori vanihamu, tina kara toha mui ira, ba visa kode na makara nira de ba kara tuturiha na huhuu leho ma kara livu kaea ia God.”

Ia Jisas e orasia na vera i Jerusalem

⁴¹ Mi tahuna ia Jisas te varangisia i Jerusalem, me morosi diaa na vera leho nia, ia e sasahavi me orasia

⁴² me kori vahai de, “!E kiki, tina vahai ko morosi vago bamua hoe i ngeni de na omea to ko agosia ke ni laba vaniho na rapo! !Me utu vaniho ko morosi vagoa!

⁴³ Ba ke mai na dani nira tahuna hamu hala ba kara mai ma kara tuviho ma kara bara talihu labaho.

⁴⁴ Ngeni ba kara tuajiriho kolu ira na gari nira tara toha tatamu, me ke teha chikai pelelee na makara ni veramu ke tuu, rongona to teha na hae vagoa te mai ia God na taha maurisiho tana tahu de.”

Ia Jisas e hurura na tinoni chabiri levu kulina mai na Vale Tabu Leho

⁴⁵ Kode me mai ia Jisas me sahe kulina mai na Vale Tabu Leho me tuturiha na huru chonira na tinoni tara chabiri inge.

⁴⁶ Me kori vahai vanira de, “Tana Mamare Tabu e kori vahai ia God de, ‘Na valegu nau na vale na nonginongi,’ mihamu amu goni vahania na babarana na beli.”

⁴⁷ Visa na dani ia Jisas e sasanira na tinoni tana levu kulina mai na Vale Tabu Leho nia. Mi nidira lehona nira ira na tinoni ni kere mi ira na tinoni toto manasa tana nina keja ia Mosis mi ira laka kesana tinoni leholeho, ara ngangavina na labu matea ia Jisas.

⁴⁸ Ma ira ara teha tamania siki tahu ni tariana ia, rongona te danga na tinoni tara mai na valingea visa nina valagu ia Jisas.