Na Saurongo Talana Te Marea Ia Luk 17 - Teha-Malango

Ia Jisas e kori labatia na kori kenihua

¹ Ma ia Jisas e kori vanira hana duli nira, me kori vahai de, “Ba kara laba nomu visa na tovotovo te hanaa taha sivoa na mamaurina na tinoni. Ma na tinoni te agosia na tovotovo nira ba ke rota solehana nomu.

² Na tinoni te vahania chikai te pechi nina dodonu me goni savi, e tihilana kara soria na makara leho tana liona ma kara choni sivoa tana tasi gou.

³ Kamu parovata tana hua tamu agosia. “Me tina ke chikai na tasimu ke goni seko vaniho, mo ko rapachia. Me tina ke tuu pililiu ia tana hana seko, mo ko kori kenihua vania.

⁴ Me tina ke goni seko vaniho ke vitu na tahu lalona chikai na dani, me ke visu mai me tatemangana nina ruri ia e vitu na tahuna, Mihoe ko kori kenihua vania ia.”

⁵ Ma na nina tinoni ni saurongo nira ara kori vania na Taovia mara kori vahai de, “Me tina ke vahai ia, mo ko pabo laka baa nimami dodonu hami.”

⁶ Ma na Taovia e kori vahai de, “Seisuge nimiu dodonu hamu ke pechi solehana vahai na piu ni hai mastad, ba kamu tangomana hamu na kejalia na hai leho de, ‘Ko tavuti mo ko tuu dato i tasi,’ ma ia ba ke rongo mangamiu.

⁷ “?Me tina chikai vidamiu hamu ke tamani chikai nina tinoni ago te chuka uta se te morosi taoni sipsip me vasangana laba, ba ke kejalia tinoni ago nia ke tohotuu ke hahani?

⁸ !E teha! Ia ba ke kori vahai de, ‘Ko chaku mo ko vangaraua hagu hahani nau, kode mo ko sahelia na tivimu talana mo ko tuva hagua nau. Mu ku hahani mu ku inu, kode ko hahani hoe mo ko inu.’

⁹ ?Me vahai vei, ba ke mamahela vania nina tinoni ago nia rongona te agosia na hua te kori vania? E teha.

¹⁰ “Mihamu kamu vahai lakamu, tahuna tamu agosi kodea na ago te kejalihamu na Taovia na agosia, me tihilamiu kamu kori vahai de, ‘Ihami na tinoni sekomala ni ago bamu, mami agosi bamua na ago te kejalihami na agosia.’ ”

Ia Jisas e maurisira e sangavulu na mane nira tara mudo

¹¹ Ma ia Jisas e dia vahai i Jerusalem taonia na sala te liu levuhadira ira na Samaria ma na Galili.

¹² Mi tahuna te sahe dia ia tatana chikai na vera me laba tuhua ia e sangavulu na mane tara mudo. Ira ara tuu vasau

¹³ mara huu leho mai vahai de, “!Jisas, Taovia, ko sahavihami kiki hami!”

¹⁴ Mi tahuna te morosira ira ia Jisas me kori vahai vanira de, “Kamu dia ma kamu tihisihamu tovosi tatadira ira na tinoni ni kere.” Mi tahuna tara diadia vata ira i sala, me sagava na mudo nia me male soha na kokoradira ira.

¹⁵ Mi tahuna chikai vidalodira te haea te laka tana oche nia, me visu mai ia me huu dato me livu kaea ia God.

¹⁶ Me sivo tuturu me chuporu sivo i pari tana tuana ia Jisas me kamaa. Ma na tinoni nia na vangana ni Samaria.

¹⁷ Ma ia Jisas e kori vahai de, “E sangavulu mane tu maurisira nau. ?Mivei laka e siu?

¹⁸ ?Me vahai vei e vu chikai bamu na mane ni vera tovosi te visu mai me livu kaea ia God?”

¹⁹ Me kori vahai vania na tinoni nia de, “Ko tuu mo ko dia. Nimu dodonu hoe te vani maurisiho.”

Na mamaiana nina baravata ia God

²⁰ Me chikai na dani, mara laba na Parasii nira mara gesuaa ia Jisas ke ngisa ke laba nina baravata ia God. Ma ia Jisas e valagu vanira me kori vahai de, “Nina baravata ia God e utu ke vu laba mai vahai siki omea ta ka hanaa hita na morosiana.

²¹ E utu chikai ke vu kori vahai ke, ‘Ia noha de,’ se ‘Ia inge,’ rongona nina baravata ia God i tatamiu noha hamu.”

²² Kode, me valagu vanira hana duli nira me kori vahai vanira de, “Ngeni ba ke chau na tahu ta kamu ngangavina solehana na morosiana na dani te ke visu mai na Dalena Tinoni tahuna te lia na tinoni taovia leho, mi ngeni ba ke utu vanihamu nomu na haea.

²³ Mi ngeni ba kara tuu kesana ma kara kori vahai vanihamu ke, ‘!Morosia ia inge!’ se ‘!Morosia ia ide!’ mihamu kamu mui na rahe bukedira.

²⁴ Rongona na visu maiagu nau na Dalena Tinoni ba ke laba lenga talana vania visa na tinoni. Ia ngeni ba ke vahai na vitihia te maragasia na barahata tuu i tabana me chau i tabana.

²⁵ Minau ba ku rota leho luhi, ma kara hoso tahaniu na tinonina tana tahu de.

²⁶ “Tahuna tu ku visu mai inau na Dalena Tinoni ba ke vahai nina tahu ia Noa.

²⁷ Tana tahu nia, ira kode na tinoni ara hahani ma na inu, ma na vaitaulahanihi na mane ma na daki me chau tana dani te sahe ia Noa tana vaka. Me tave na obo leho me luvusira mara mate kode lalaka ira.

²⁸ “Me ke vahai soha nina tahu ia Lot. Ira na tinoni kode tana tahu nia ara hahani ma na inu, na pelupelu ma na chabiri, ma na ago uta ma na loho vale.

²⁹ Mi tana dani ia Lot te dia basiaa i Sodom, na lake ma na makara parapara e vahai na usa te vota i heven me sivo me matesira visa na tinoni kode lalaka.

³⁰ “Ia ba ke vahai kalavata tana danina tu ku visu mai inau, na Dalena Tinoni.

³¹ Mi tana dani nia, isei tinoni te ke toha tana vovotu ni valena ke mui laka na visu sivo ma na sahe valena me ke bolia nina omea levo. Me vahai soha tina isei ke toha tana nina uta. Ba ke utu visu i vale na tahaa siki nina omea levo.

³² !Kamu pada tuhua hamu na hua te laba vania na tauna ia Lot!

³³ Ira na tinoni tara tari ngachia na mamauridira ba kara teha tamania na mamauri sali. Mi ira tara saua na mamauridira tana pari de vania na Taovia ba kara tamania na mamauri sali.

³⁴ Inau u kori vanihamu, tana putina tu ku visu mai nau, koera ko ruka na tinoni ko bibiku kolukolu tatana chikai na mihe. Me chikai ba ku taha chonia me chikai ba ke toha.

³⁵ Me ke ruka na daki ko hohola kolukolu, me chikai ba ku taha chonia me chikai ba ke toha basia.”

³⁶

³⁷ Mi ira hana duli nira ara gesuaa ia Jisas, “?Taovia, ivei ke laba na omea vahai nia?” Ma ia Jisas e koria chikai na kori titihila me ke ni tihisia lengaa nina maimai ia ba ke teha ke vu koku, me kori vahai vanira de, “Tana malengana te toha kokorana chikai na omea te mate, ba kamu haera ira na manu tara hani poto kara vungu.”