Na Saurongo Talana Te Marea Ia Luk 10 - Teha-Malango

Ia Jisas e sau nahoa e vitu sangavulu ruka na tinoni

¹ Mi bukena tana tahu nia, na Taovia e vilia e vitu sangavulu ruka na tinoni laka me sau diara kara duli rukaruka ma kara hida vania ia tana visa na vera ma na vera te padaa ia ngeni ba ke dia tatana.

² Me kori vahai vanira de, “E mahutu noha na uta leho, ma na tinoni ago e teha danga. Kamu nongia ia God, na tinoni te tamania na uta ke sau maia na tinonina kara churia.

³ !Kamu dia hamu! Inau u sauhamu vahai tu saua chikai na dale ni sipsip te dia tana levuhadira ira na pai achi.

⁴ Ma kamu mui tahaa siki nimiu kei ni golo o siki kei o nimiu sadolo, ma kamu mui na tuu ma na valagu kolu siki tinoni i sala.

⁵ Mi tahuna kamu sahe siki vale, kamu kori vahai luhi hamu de, ‘Nina rapo ia God ke toha tana vale de.’

⁶ Tina ke chikai tana vale nia ke tamania na rapo, na rapo tamu koria hamu ba ke toha tatana ia. Me tina ia ke hoso, kamu taha visua hamu na rapo nia.

⁷ Kamu toha kalavata hamu tatana vale nia, ma na hua tara tuva hamiu kamu hania ma kamu inuvia, rongona na tinoni te ago ba ke tahaa na pepeluna na hua te agosia. Mui laka hamu na tuhu vale valego.

⁸ Tina kamu sahe hamu lalona siki vera leho mara mamahela vanihamu, ma kamu hania hamu na hahani tara tuva hamiu ira.

⁹ Ma kamu maurisira ira na tinoni oche tana vera nia ma kamu kori vahai vanira de, ‘Nina baravata ia God e mai varangisihamu noha.’

¹⁰ Me tina kamu laba tatana siki vera leho mara teha ira na mamahela ma na solohamu, ma kamu taonia hamu salana vera nia ma kamu kori vahai vanira de,

¹¹ ‘Seisuge na pasana volo bamu na veramiu hamu te toha tana pera ni tuamami hami, mami savula chonia hami te vahai chikai na paratanga vanihamu hamu.’ !Ma kamu hana talanaa hamu nina baravata ia God te mai varangisihamu hamu!

¹² Kamu valinge kodea hamu de, ngeni moho tana Dani ni Pede, ia God ba ke sahavia i Sodom liungisia na vera nia.

Ira na vera nira tara teha na donua ia Jisas

¹³ “!Mihamu i Korasin kamu kana! !Mihamu lakamu i Betsaeda kamu kana! Rongona tina na koemana te laba tatamiu hamu ke labatira ira i Taea mi Saedon, mi ngeni ba kara oli oka noha ma kara toha sivo, ma kara sahelia na turi ni kaleko ma kara uliuli tana tora ma kara leleo basiaa hadira seko.

¹⁴ Mi tana Dani ni Pede ia God ba ke sahavira ira i Taea mi Saedon liungisihamu hamu.

¹⁵ Me vahai lakamu hamu na Kapaneam, mui padaa ia God ba ke taha datohamu i heven. !Teha ia! Ia God ba ke choni sivohamu tana lake.”

¹⁶ Me kori vahai laka ia Jisas de, “Isei te rongomangamiu hamu, ia e rongomangagu nau, misei te hoso tahanihamu hamu, ia e hoso tahaniu nau. Misei te hoso tahaniu nau, ia e hoso tahania sei te sau maiu nau.”

Ara visu mai na vitu sangavulu ruka hana duli ia Jisas

¹⁷ Ara visu mai na vitu sangavulu ruka na tinoni mara mamahela solehana mara kori vahai vania ia Jisas de, “Taovia, seisuge ira na tarunga mara rongomangamami hami tahuna tami hurura hami tana asamu hoe.”

¹⁸ Ma ia Jisas e kori vahai vanira de, “Mana. Inau u haea ia Setan te ruchu sivo mai tuu i heven, vahai na vitihia te sivo mai tana parako.

¹⁹ Kamu vavalinge talana hamu, inau u sau vanihamu noha na susuliha hana kamu ni hanaa na dakehojaa na poli ma na tubutubuliva, ma na susuliha te liungisia na susulihana ia Setan, me utu laka siki omea ke tangomana ke sekolihamu.

²⁰ Me seisuge e vahai, mui hamu na mamahela matena na tarunga te rongomangamiu hamu. Ma kamu mamahela matena hamu matengana na asamiu tara mare nohaa i heven.”

Ia Jisas e mamahela solehana me livu kaea ia God

²¹ Tana tahuna nia na Tarunga Tabu e dangalia ia Jisas me mamahela solehana me kori vahai de, “God na Tohagu, ihoe na Taovia ni heven mi pari de. Nau u kama kaeho hoe matengana to kokura na omea nira vanira ira na tinoni tara sasani mara tamani manasa, mo tihisi lenga vanira ira tara teha sasani. E mana, Tohagu, ia na omea to ngavina hoe ke vahai.”

²² Ma ia Jisas e kori vanira ira tana tahu nia, “Na Tohagu nau e sau vani nohau visa na omea. Ma ia bamu te hanaa isei kalavata numu nau, na Dalena ia. Me teha chikai ke hanaa sei numu na Tohagu nau, minau bamu tu hanaa ia, kolu ira na tinoni tu vilira nau.”

²³ Ma ia Jisas e leleo dia tatana hana duli nira me valagu vanira tovosi me kori vahai de, “Kamu mamahela hamu, matengana tamu morosi nahoa hamu na omea taengana nira de.

²⁴ Mu ku kori vanihamu nau, e danga noha na propet ma na king tara ngavina kara haea na omea tamu morosia hamu mara teha na tangomana, ma kara valingea na omea tamu valingea hamu, mara teha na tangomana.”

Na kori titihila tatana na tinoni talana ni Samaria

²⁵ Me chikai na tahu e tuu chikai na tinoni toto manasa tana nina keja ia Mosis me tuchau me tovoa ia Jisas tatana chikai na gesu me kori vahai vania de, “?Ticha, na hua kalavata tu ku agosia nau ku ni tamania nau na mamauri sali?”

²⁶ Ma ia Jisas e gesu visu vahai de, “?Na hua te marea ia Mosis tana keja, mo manasana vahai hoe vei?”

²⁷ Me kori vahai na tinoni nia de, “‘Ko pada sulihaa na Taovia hamu God tana tobamu matadu mi tana tarungamu matadu, mi tana susulihamu matadu mi tana manasamu matadu, mo ko sahavia nimu papi vahai to sahavi tovosiho.’ ”

²⁸ Ma ia Jisas e kori vahai vania de, “Ihoe o kori mana kalavata. Ko agosi taonia mo ko tamania na mamauri tutuni.”

²⁹ Ma na tinoni toto manasa tana keja nia e ngavina ke tihisia ia na tinoni te hoto, me gesuaa na gesu de, “?Isei na nigu papi nau?”

³⁰ Ma ia Jisas e tuhu visua me kori vania chikai na titihila. Me kori vahai de, “E chikai na tinoni e vota i Jerusalem me sivo i Jeriko. Mi tahuna te sisivo ia, mara laba ira na tinoni belibeli, mara taria mara labua, mara taha chonia na kalekona, mara labua me varangi ke mate mara dia basiaa.

³¹ Tahuna te jajaro na tinoni nia i pari, me liu mai chikai na tinoni ni kere, me morosia na tinoni nia me liu salihia tana taba ni sala chikai.

³² Me mai soha chikai na Livaet, me haea na tinoni nia te jajaro, me liu salihi lakamua ia.

³³ Mi bukena, me liu mai chikai na tinoni vangana chikai na vera tovosi i Samaria, me haea na tinoni nia me sahavi solehanaa.

³⁴ Me dia tatana me doraa na oela ma na vuaeni tana kirana me pulua tana kaleko, kode me livu datoa tana nina dongki me taha dia tatana chikai na vale ni mango nidira ira na lalabana me ke ni hae taonia.

³⁵ Mi tana dani ngana chikai na tinoni nia e tahaa e ruka na golo me vania na tamanina vale nia me kori vahai vania de, ‘Ko morosi taoni odoa hoe na tinoni de, mi tahuna tu ku visu mai nau, ngeni ba ku tuhu visua nau visa na nimu sasanga hoe to sangaa na tinoni de.’ ”

³⁶ Ba, me laba ia Jisas me gesuaa na tinoni toto manasa tana keja nia, “?Tana papadamu hoe, isei tana vidalodira tolu na tinoni nia, nina papi kalavata na tinoni tara labua nia?”

³⁷ Me kori vahai de na tinoni toto manasa tana keja nia, “Ia na tinoni te tamani sasahavi nia.” Ma ia Jisas e kori vahai vania de, “E mana. Dia hoe mo ko agosi taonia.”

Ia Jisas e chihoa koi Mata ma koi Meri

³⁸ Tahuna vahai ia Jisas ma na hana duli nira tara taonia sala mara diadia, mara chau tatana chikai na vera. Me laba chikai na daki, na asana koi Mata, me kori mamahela vania ia Jisas ke dia valena ia. Mara sahe loera tana valena ia.

³⁹ Ma koi Mata e tamania chikai na tasina daki, na asana koi Meri, te tohotuu tana lilihi ni tuana ia Taovia me vavalinge matavia nina valagu ia.

⁴⁰ Ma koi Mata e toba sahata matena visa na ago tana vale nia me tuu me kori vahai vania ia Jisas de, “?Taovia, o teha hoe toba sahata kolu na tasigu nau te livu tovosiu nau na agosi kodea visa na ago tana vale de? Ko kori vania ke mai me ke sangau nau.”

⁴¹ Ma ia Taovia e kori vahai vania de, “Mata, Mata, ihoe o toba sahata mo pada solehanaa danga na omea.

⁴² Me chikai bamu na omea talana te toha. Ma koi Meri te vilia na omea talana nia, mi ngeni ba ke utu chikai ke taha chonia tatana ia.”