Yaɓooda 50 - Maktub Ta Kumkajir

¹ Jojep so kɨ takum bɔwɨnt, nõ kɨdɔat, na hɔ kuya kɨ ront.

² Jojep ndamber dɔktorg ngékɨlaɓerg lon kad kɨ wurɨn nin bɔwɨn kɨ kĩ kɔg nin ndum. Dɔktorg tɔ wurɨn Israel kɨ kĩ.

³ Ɗan mbã ndɔ dɔsɔɔ, kɨta titbe la i ndɔ wur nin de kɨ kĩ ye. Ejiptiag nõna ndɔ dɔtanãimɨta.

⁴ Lon ndɔ hɔndo tɔi oi ye, Jojep elta kɨ ngékɨɓe lo Paraõ, an: Ĩla m'ngaa maj takumsɨt a ne, m'kɔsɨ kad elɨn ta kɨ mbi Paraõt anan:

⁵ bɔwɨm adɨm m'nda yo an: Oo m'to m'oi Kam bulot lom'n murr kam dɔning Kanat, nu nõ la a i duwɨmt ye. Tajigla m'kɔi kɨ i nyam ad m'aw m'duw bɔwɨm, na m'a m'tel.

⁶ Paraõ el an: Aw, i duw bɔwi kɨgo yotɨn ad i nda.

⁷ Jojep aw kɨta duw bɔwɨn. Ɓerg lo Paraõ tube, kɨ bɨradɔg kɨ kuju loa, kɨ bɨradɔg tube kɨ dɔning Ejipt,

⁸ kɨ ngékɨɓe lo Jojep, tube kɨ ngankõa kɨ ngékɨɓe lo bɔwa tube awɨn nat sia: Na nyan ngandg kɨdu, kɨ ɓut batg lod kɨ ɓut mangg lod koon kam dɔning Gosent.

⁹ Pusɨg kɨ ngékal sɨndag awɨn nat sia i koosɨg kɨ toɓool.

¹⁰ Ɗen gar ndah nyakot lo Atad kɨ gid bah Jurdẽt. Nu la gan guud kɨ nõ kɨ kamkil. Jojep ad hɔn ndo bɔwɨn ndɔ tanãimɨta.

¹¹ Lon ngendɨ dɔning Kanat oon hɔndo'n non dɔ gar ndah nyakot lo Atad ye, elɨn anan: Oon hɔndo kɨngãi lo Ejiptiag Kɨtɔ 'nten la, kunɨn ne tɔ lon non hɔndo lo Ejiptiag kɨ gid bah Jurdẽt.

¹² Titbe la ngan Jakob ɗan ne kɨ bɔwd kɨgo tat'n bɔwd ndad mbera.

¹³ Nganag unɨn na awɨn sia dɔning Kanat, duwɨna kam bulombalt kɨ kam ndɔɔt lo Makpela, ĩn Abraham ndugo ji Epront kɨ Hetia, nyakagɓet, kad i lo duw ngékoig, kɨ i nõ Mamret.

¹⁴ Lon Jojep duw bɔwɨn oi ye, tel kɨ dɔning Ejipt't nat kɨ ngankõn kɨ tubeg'n awɨn sia kad duw bɔwɨn. Jojep sɔl kam ngankõn.

Go koi Jakobt

¹⁵ Lon ngankõ Jojep oon kad bɔwd oi ye, elɨn anan: Maj a ne, Jojep a ɔsɨd ta, na a tel bad majal tube'n n'ɗan sia.

¹⁶ Lan kɨla ro Jojept, anan: Bɔwi ndamber kete nõ koint an:

¹⁷ a elɨn Jojep titbe: I nyàgo tɔidɔtag lo ngankõig kɨ majalg lod kɔ kɨta ɗan sei majal Tajigla kɨ kɔi, i nyàgo tɔidɔta lo ɓerg lo Luwah lo bɔwi kɔ. Lon Jojep oo dɔ tag'n non ye, nõ.

¹⁸ Kamla ngankõa kɨdɔd aw son kɨnõat, elɨna anan: Oo jĩ ɓerg loi.

¹⁹ Jojep eld an: Ot ɓoolɨn, mĩ ye m'ga goot Luwah a?

²⁰ Ĩng, ɔjɨn ta kamsɨt kad i ɗamɨn majal, na kɔjta lo Luwah ad maj tee kamt, kɨtakad ajɨn deg ngãibe kad ndɨn kɨ dɔd dõ, tit'n hã ĩn ne ɓone.

²¹ Kɨtɔ 'nten, ot ɓoolɨn, m'a m'oo goosɨ kɨ ngansɨ. Titbe la eldɨn ta soolɨn kamd ye.

Koi Jojep

²² Jojep ndɨ Ejipt, ĩn kɨ ngékɨɓe lo bɔwɨn: Ɓal ndɨ kɨ dɔ dõ lo Jojep i ɓu kɨkɨlah.

²³ Jojep oo ngan Epraim mbã kɨ ngaka kɨ ngékõmɨta, ngan Makir ngon Manase tɔ oojɨnd ndand dɔ bing Jojept.

²⁴ Jojep el ngankõn an: M'to m'oi, na rota Luwah a ɗe rosɨt, a tee sesɨ kam dɔningt 'nten kɔ, kɨ n'aw sesɨ kɨ dɔningt'n unɨn kɔ'n kɨ yo kɨ nda yo ad Abraham kɨ Isaak kɨ Jakob.

²⁵ Kamla Jojep ad ngan Israel ndan yo adɨna, an: Rota, Luwah a ɗe rosɨt, na a unɨn kɨngam nẽ be awɨn ne nu.

²⁶ Jojep oi. Ɓala i ɓu kɨkɨlah. Wurɨna kɨ kĩ kɔg nin ndum, lana kes nint kam dɔning Ejipt't.