Yaɓooda 1 - Maktub Ta Kumkajir

Luwah ndah nyag tube

¹ Lo yaɓoodat Luwah ndah dɔrãg kɨ dɔning.

² Dɔning to kari, nya gotot. Til ut ta holɓe kɨ kokɨɓing, na Ndil Luwah ɔrr dõ dɔ mangt.

³ Luwah el an: Kɨ kunj tee Na kunj tee.

⁴ Luwah oo kunj i kɨmaj, ad Luwah gang kunj kɨ til nat.

⁵ Luwah ndah tɔ kunj lokɨkàda, na til lokɨndɔ. Lokɨkàda kɨ lokɨndɔ i ndɔ kɨdasa.

⁶ Luwah el an: Kɨ lokɨtat i mbɨna mangt kad gang maan nat kɨ maan

⁷ Luwah ɗa lokɨtat gangɨn mang kɨ ton girr lokɨtat't nat kɨ mang ĩn i dõ dɔ lokɨtat't tɔ. Na nya 'nten kɨ ɗa nya titbe.

⁸ Luwah ndah tɔ, lokɨtat dɔrã. Lokɨkàda kɨ lokɨndɔ i ndɔ kɨkõjoo.

⁹ Luwah el an: Kɨ maan kɨ girr dɔrãt kɨ kaw kɨnat lo kɨɗa, kɨ lokɨtut tee Na nya 'nten ɗa nya titbe.

¹⁰ Luwah ndah tɔ lokɨtut dɔning, maan kɨ kaw kɨnat ndah tɔa bahbo. Luwah oo ad i nya kɨmaj.

¹¹ Luwah el an: Kɨ dɔning ɓa mũ kɨmbool Kɨ mbikamg kɨ teen kɨ kumd Kɨ kagg teen kɨ kand'd kɨ kumd kɨ dang dang dɔningt Na nyan ten ɗa nya titbe.

¹² Dɔning ɓa mũ kɨmbool, kámg kɨ teen kumd kɨ dang dang, kagg teen kɨ kand'd kɨ kumd kɨ dang dang ho. Luwah oo i nya kɨmaj.

¹³ Lokɨkàda kɨ lokɨndɔ i ndɔ kɨkõmɨta.

¹⁴ Luwah el an: Kɨ kunjg in kam lot kɨ dɔrãt kɨtɔkad gangɨn lokɨkàda kɨ lokɨndɔ nat, na kɨ in nyakɔjg, kɨtɔ dɔnahg kɨtɔ ndɔg kɨ ɓalg,

¹⁵ na kɨ in kunjg kam lot kɨ dɔrãt kad unjɨn dɔningt. Na nya 'nten ɗa nya titbe.

¹⁶ Luwah ɗa kunj kɨbobo joo, kunj kɨbo kɨtɔ kõɓe dɔ lokɨkàdat, na kunj kɨdu kɨtɔ kõɓe dɔ lot kɨndɔ, ɗa kɨmẽg tɔ.

¹⁷ Luwah ndahd kam lot kɨ dɔrãt kad kɨ unjɨn dɔningt,

¹⁸ na kàd kɨ õnɓe dɔ lo kɨkàdat kɨ lot kɨndɔ na kad gangɨn kunj kɨ til nat. Luwah oo ad i nya kɨmaj.

¹⁹ Lokɨkàda kɨ lokɨndɔ i ndɔ kɨkõsɔɔ.

²⁰ Luwah el an: Kɨ man tee kɨ nyandahg kɨ kumkajir ad bɨlan kɨdɔtdɔt Kɨ yelg ɓain dõ kɨ bɔgd dɔningt kɨ kam nélt.

²¹ Luwah ndah dãg kɨbobo kam mant, kɨ nyandahg kɨ kumkajir kɨ dang dang, ĩgɨn ndɨ ɔdɨn rod kam mant, kɨ yelg kɨ dang dang tube'n ɓan bɔgd. Luwah oo ad i nya kɨmaj.

²² Luwah njang dɔd, an: Ĩn nyandahg kɨ mant, oojɨn na, i bɨlan kɨdɔtdɔt, i ɗoosɨn kam man kɨ bahbog Kɨ yelg bɨlan kɨdɔtdɔt dɔningt.

²³ Lokɨkàda kɨ lokɨndɔ, i ndɔ kɨkõmi.

²⁴ Luwah el an: Kɨ dɔning tee kɨ nyag kɨ kumkajir kɨgo kĩdt: Nyakulg, kɨ nyag kɨ kɔrr kɔd'd ber kɨ dãg kɨmut kɨ dang dang. Na nya 'nten ɗa nya titbe.

²⁵ Luwah ɗa dãg kɨmut kɨ dang dang kɨ nyakulg kɨgo kĩdt, kɨ nya kɨ kɔrr kɔd ber kɨ dang dang tube. Luwah oo ad i nya kɨmaj.

²⁶ Luwah el an: Ad kɨ ɗa de ɓakumtaj, kɨ titj kad õɓe dɔ kanjgt kɨ bahbot, kɨ dɔ yelgt kɨ dõ, kɨ dɔ nyakulgt, kɨ dɔ dɔningt kɨtaagbe, kɨ dɔ nyat kɨɗen kɨ ngékɔrr kɔdɨn ber.

²⁷ Titbe Luwah ndah de ɓakumtan, ɓakumta Luwah la ndaan ye, Luwah ndah kɨdɨngã kɨ kɨdẽ.

²⁸ Luwah njang dɔd, na Luwah eld an: Oojɨn na, i bɨlan kɨdɔtdɔt, i ɗoosɨn dɔning, na i lan dɔning girr tɔgsɨt Õnɓe dɔ kanjgt kɨ bahbot, kɨ dɔ yelgt kɨ dõ, kɨ dɔ kurt kɨɗen kɨ ɔd ron dɔningt

²⁹ Luwah el tɔ an: Oon m'adsɨ kám kɨɗen kɨ tee kɨ kumɨn dɔningt kɨtaagbe, kɨ kag kɨɗen kɨ aw kɨ kandɨn kɨ kumɨn kamt, a in nyasasɨ.

³⁰ Kun kɨɗen kɨ dɔningt, yel kɨɗen kɨ dõ, nya kɨɗen kɨ a ɔd ron, ĩn kò kumkajir i kamat, mad mũ kɨ mbool kɨɗen nyasat. Na nya'n non ɗa nya titbe.

³¹ Luwah oo nyag tube'n ɗa ye, oo ad i nya kɨmaj ngãi. Lokɨkàda kɨ lokɨndɔ i ndɔ kɨkõkɨbojidet.