Maktub'n Pol ndang ad Tit 3 - Maktub Ta Kumkajir

Ɗob nyaɗa lo ngétaata lo Krist

¹ Ad kam ngékawnag gah dɔt kad lan dɔd girr tɔgt lo ngarg kɨ ngékõɓeg. Maj kad telɨn rod gotat lod, kad ɗan go rod woi kɨta kɨla kɨmaj tube.

² Eld kad elɨn ta kɨmajal dɔ det mad al. Kad ĩn ngésahta al, kad ĩn deg kɨ sɔlɨn lom lom ho, kɨ ɔjɨn hal kɨ sayelɨl kɨtaagbe ro degt tube ho.

³ Kɨtɔ jĩ kɨɓe kɨdɔj, maɗi jĩ deg kɨ kurdɔj woi, jĩ ngétel roj go tat al, jĩ deg kɨ kud mut, jĩ ɓerg lo nyurkõg kɨmajal kɨ koomajrog kɨ dang dang, kɨ ndɨ kɨ dɔj dõ kam ndángt, kɨ jang kɨ deg, jĩ nyakɔsɨta kokɨro degt, na jĩ kaa, j'ɔsɨ ta deg ho.

⁴ Na lon Luwah Ngekaj'j tee kɨ kamkẽ kɨ tar lon hɔi kɨ ro degt ye,

⁵ aj'j. I kɨtakul nyaɗaj kɨdenesew hã aj'jɨn al, na i kɨta ɗamaj loa, kɨtakul man baptem lo koojt kij, teljɨn kɨ kijt kɨtakul Ndil Kɨkunjɗang.

⁶ Kɨtɔ Luwah ũ Ndil kɨ Kunjɗang dɔjt kɨ nõbe kɨtakul Jeju Krist Ngekaj'j.

⁷ Kɨtɔ kɔrrɨn ɔrr ta dɔjt kɨtakul kamkẽ lo Jeju Krist la j'asɨn ta ngah kumkajir kɨ mbãkɨnõt'n kɨ nda kamj dɔt.

⁸ Ta 'nten i ta kɨ jeje. M'ndig kad i hɔndo deg nyag 'nten kɨ tɔg kɨtakad ngétaata lo Luwah oon maj kad hɔn go ɗa kɨlag kɨmaj. Nyag 'nten ĩn kɨmaj; majd tot kɨta deg.

⁹ Maj kad i gong tag kɨ ndɨje kɨgo lo ɓoodt kɨ kɔrr girr kaag, kɨ gakɨnag dɔ Mberkɨndat lo Moij kɨta majd goto, ĩn nyag kɨ kɨndang pãbe.

¹⁰ I tuɓa de kɨ ngeɓai kɨ gangnag ku ngékawnat kɔ, go ndángt kɨdasa kɨ kɨkõjoo.

¹¹ I ger, de kɨ tit'n non tɔrr jin girr rotat kɔ, na ndɨ hɔɗa majal hɔn ron kɨ ta.

Ta kɔjg kɨ dɔboit

¹² M'a m'la Artemas ke Tisik, lon ten roit a ne, i sah tot be kad i ɗe i ngahm kam ɓet kɨ Nikopolis. Kɨtɔ m'nda kamt kad m'ndɨt nu kaglot kɨ ɓara.

¹³ I la roi kɨ nat kad i ɗa kɨ Jenas kɨ ngenaj dɔ deg kɨ Apolos tɔ, dɔ kaw mbaht lod kad nalɨn nya mad al.

¹⁴ Sumba kad deg kɨ ngétaata lo Krist ndoon ɗa kɨla kɨmaj, kɨtakad ɗan ne kɨ deg dɔ nya geegt lod. Ot kad ndɨn kɨ dɔd dõ kari kɨkanj ɗa maj kɨ deg.

¹⁵ Deg tube'n ĩn nat sem ɗain lapia. I ɗa lapia ngétar loj adj. Kɨ majkurr lo Luwah i nat sesɨ.