Maktub'n Pol ndang ad Tit 1 - Maktub Ta Kumkajir

¹ Mĩ Pol ɓer lo Luwah kɨ ngombangkɨla lo Jeju Krist, m'ndang maktub 'nten mad Tit ngonɨm kɨ jeje kam kadkam Luwaht'n jĩ dɔt. Luwah la kɨla jimt kad m'la mber ta kɨ ro degt'n mbed'd kad adɨn kamd Luwah. Luwah lam kad m'ad'd gerɨn rota kɨgo nyandoot loj tɔ.

² Kɨtɔkad ngahn ne kam kɨ ndadɔ kumkajirt kɨ mbãkɨnõt. Luwah'n a el takɨbal al, un kɔn adj kete nõ yaɓood kaglogt tube an: Na n'adj kumkajir kɨ mbãkɨnõt.

³ Na kaglot'n ɔj kete woi ye, Luwah tee kɨ ta lon kɨ tɨga kam tat'n la jimt, na m'ndɨ m'la mbera kɨgo mberkɨndat lo Luwah Ngekaj'j.

⁴ Kɨ Luwah kɨ Bɔw, kɨ Krist Jeju Ngekaj'j adɨn majkurr kɨ lapia.

Ta dɔ kɨlat'n Pol la ji Tit't kad ɗa kam ɓebot kɨ Kret

⁵ Kɨtɔ nya 'nten la m'nyain Kret't ye: M'nyai nu kɨtakad i ɗago ndeg nyag'n i kɨ ɗago al ɓaitɔ, kad i ndah kɨbog kam ngékawnagt kam ɓebot kɨɗen, tit'n m'ndain mbera.

⁶ Maj kad de kɨ ngekoogo ngékawna i kɨkanj ta mad kɨgang dɔnt, i ngedekɨdẽ kɨda, kɨ ngana ĩn ngekadkamd Luwah, kɨ tɔd ko kɨta ɗob nyaɗad kɨmajal al, ke kɨta telrogotat al.

⁷ Ngekoogo ngékawna ndɨ oo go nyag lo Luwah. Kɨtɔ 'nten sumba kad i kɨkanj ta mad kɨgang dɔnt. Sumba kad i ngedɔngang al, ke ngekɔsɨ wong rukɨ, ke ngekãi kasɨ, ke ngeɗɔɔ kɨ deg al, ke ngeɗa ta nya kɨngah dɔt kɨgoot al al.

⁸ Sumba kad i ngeɗa mbahg, kɨ ngetar maj kɨ ɗa. Sumba kad i ngehal kɨmaj, kɨ ngeɗa nya kɨgoɗobat, kɨ ngejaron ɓat kad majalt kɨ ɗa, kɨ ngekɔg ron ɗa majal.

⁹ Sumba kad hɔ go ta kɨ jeje'n i kɨgo nyandoot, kɨtakad asɨ ɗan kɨ deg madg kad awɨn kɨ ketekete kam kadkam Luwaht kɨtakul nyandoo kɨjaraw, kɨtakad hɔn ngémajtag'n ndɨ taanɗɔɔ rota kɨ taa,

¹⁰ kɨta deg ngãibe ĩn nõ, ĩn ngétel rod go tat al, ndɨ ndon kum deg kɨ tag lod kɨ kari pãbe. Deg kɨ titbe ĩn ngãibe ku juipgt'n adɨn kamd Krist.

¹¹ Kari na, kɨ i nda ta deg'n non nat kɨta ndɨ tujɨn bɔw ngon, kɨ kõ ngon, kɨ ngang tu. Ndɨ ndoond nya kɨ sumba kad ndoond al kɨtakad'n ngahn ne nar kɨ goɗobat al.

¹² Kɨ mad ku degt kɨ Kret, ad i ngendo ndil lod kɨ kɔsɨdɔd el an: Deg kɨ door lot kɨ Kret ĩn ngékeltakɨbal kɨndɔgndɔg, ĩn tit dãg kɨ mut kɨmajal, ĩn ngengẽg, ndan kamd dɔ nyat mad kɨɗang al, na dɔ nyasat kɨɗabe tã.

¹³ Ta loa'n el nõ i rota, kɨta 'nten, i tĩ roi kat i ndángdɨn, kɨtakad kadkam lod i kɨjaraw.

¹⁴ Kad turɨn go sukɨdag lo Juipg al, kad telɨn rod go mberkɨndagt lo deg'n ndɨ tɔrrɨn jid girr rotat al.

¹⁵ Nyag tube ĩn kɨ kar kɨta deg'n ĩn kɨ karnyang. Na ĩgɨn yerrɨn kɨ rod ho, ndɨ mbetɨn kadkam Krist ho ye, nya kɨ kar kɨtatɔd goto, kɨta hald, kɨ ta kɨ kamdt tu ĩn kɨyerr.

¹⁶ Deg kɨyerrg'n non ndɨ elɨn kɨ tɨga wakɨsɨ anan: N'gerɨn Luwah na kɨlaɗad i kɨmajal. Ĩn ngéɗanya kɨyerr, ĩn ngétel rod go tat al, asɨ ɗan kɨla mad kɨmaj al.