Teekɨtɨga 9 - Maktub Ta Kumkajir

Ɓut nyakulg tube kɨ kam dɔning Ejipt't oin

¹ Bɨraɓe el Moij an: And go Paraõt, ela an: Bɨraɓe Luwah lo Hebreg el an: I nya deg lom ad awɨn kɨtakad ɗan kɨlaɓer admɨn

² Ĩla i mbet nyad kad awɨn, na i hɔd kɨgog tɔ a ne,

³ oo ji Bɨraɓe a i dɔ nyakulgt loi kɨ kam mut kɨ dɔ sɨndagt kɨ dɔ korrogt kɨ dɔ lukumgt kɨ dɔ ɓut manggt kɨ dɔ ɓut batgt. A i yokoosɨ kɨmajal kɨbobe.

⁴ Bɨraɓe a nya ɓut nyakulg lo Israelag tadang kɨ ɓut nyakulg lo Ejiptiag, nya mad kɨɗa lo Israelag kaa oi al.

⁵ Bɨraɓe gang kaglo an: Loti Bɨraɓe a ɗa nya'n non kam dɔningt 'nten.

⁶ Loti got Bɨraɓe ɗa nya'n non ad ɓut nyakulg tube kɨ kam dɔning Ejipt't oin, na ɓut nyakulg lo Israelag kɨkɨɗa ka oi al.

⁷ Paraõ la kad n'oo, na oo kɨkɨɗa ku nyakulgt lo Israelag oi al. Na Paraõ ɗa dɔngang, nya deg ad awɨn al.

Dobaig tee ro degt kɨ dãg

⁸ Bɨraɓe el Moij kɨ Aarõ an: Ɔin buhoor purr ɗoosɨ jisɨ Kɨ Moij tɨnda tĩ kɨ dõ nõ Paraõt

⁹ A tel buning kɨ to letlet kɨdɔ dɔning Ejipt't tube, a i ngaw kɨ tee kɨ dobaig ro degt kɨ ro dãgt kɨ kam dɔning Ejipt kɨtaagbe.

¹⁰ Ɔin buhoor purr, na ɗàn nõ Paraõt. Moij tɨnda tĩ kɨ dõ, na tel ngaw kɨ tee kɨ dobaig ro degt kɨ ro dãgt.

¹¹ Mboolig asɨ ɗàn nõ Moijt al kɨta ngawg, kɨta ngawg i ro mbooligt kɨ ro Ejiptiagt tube.

¹² Bɨraɓe ad kam Paraõ kongkong kɨdɔt, na oo dɔ ta lo Moij kɨ Aarõ al Bɨraɓe elɨn Moij.

Kɔsɨg tuson kam dɔning Ejipt't

¹³ Bɨraɓe el Moij an: I ɓai dõ kɨsĩ ritit, i ɗà nõ Paraõt, ela an: Bɨraɓe Luwah lo Hebreg el an: I nya deg lom ad awɨn kɨtakad ɗan kɨlaɓer admɨn.

¹⁴ Kɨtɔ kaglot 'nten m'a m'la yokoosɨg lom tube kɨdɔit kɨ kɨdɔ ɓergt loi kɨ kɨdɔ degt loi, kɨtakad i gerɨn kɨmad kɨ titɨm be goto dɔningt kɨtaagbe.

¹⁵ Kɨtɔ tajigla neni m'la jim m'ndain kɨ deg loi kɨ yokoosɨg a ne, a ĩ kɨ nuj kɔ dɔningt.

¹⁶ Na M'nyai kɨ dɔi dõ, kɨtakad m'ɔjɨn tɔg lom, kɨtakad tɔm ko'n dɔningt kɨtaagbe.

¹⁷ Mbã tajigla i ndɨ tɔi dɔi kɨ dõ ndoorɨn deg lom kad i nyad ad awɨn al.

¹⁸ Oo loti dɔkàdt kɨ titbe m'a mad kɔsɨndiig kɨtag ngãi tuson, na kɔsɨndiig kɨ tit sia goto dɔning Ejipt't, lon ndan ne girra maɗi nu mbã tajigla.

¹⁹ Kɨtɔ 'nten ad tuɓan nyakulg loi kanangbe kɨ kuju kɨ nyag loi tube kɨ kam mut. Kɔsɨndii a tuso dɔ degt tube kɨ dɔ danggt tube kɨ kam mut. Ĩgɨn awɨn sed kuju al a ne, a oin kɔ.

²⁰ De'n ɓool ta lo Bɨraɓe ku degt lo Paraõ ad ɓerg lon kɨ nyakulg lon ãin kɨ kam kujgt.

²¹ Na de'n tur go ta lo Bɨraɓe al nya ɓerg lon kɨ nyakulg lon kam mut.

²² Bɨraɓe el Moij an: I la jii kɨ dõ kad kɔsɨndii tuso kɨdɔ dɔning Ejipt kɨtaagbe kɨ kɨdɔ degt kɨ kɨdɔ dãgt kɨ kɨdɔ mbikamgt kɨɗen kɨ kam ndɔɔt kɨ dɔning Ejipt kɨtaagbe

²³ Moij un kag tɔsɨ lon kɨ dõ, ad Bɨraɓe la ndáng ndii kɨ kɔsɨndii kɨ horr ad tuson dɔningt. Titbe la Bɨraɓe ad ndii edɨn kɨ kɔsɨ dɔ dɔning Ejipt't.

²⁴ Kɔsɨndii tuso, horr burɨna kɨ kɔsɨndii kɨtag ngãi. Nya kɨ titbe ɗa nya kam dɔning Ejipt nja kɨɗa al lon Ejiptiag ĩn ne girrdeg maɗi nu mbã tajigla.

²⁵ Kɔsɨndii ndah nyag tube kɨ kam mut, kam dɔning Ejipt't deg kɨ dãg tu. Kɔsɨndii nda mbikam kɨɗen kɨ kam mut, teet kag kɨɗen kɨ kam mut tɔ.

²⁶ Kam dɔning Gɔsent, lon Israelag ndɨnt kɨɗabe la, kɔsɨndii tusot al ye.

²⁷ Paraõ la ad kunɨn Moij kɨ Aarõ, eld an: Tajigla 'nten m'ɗa majal. Bɨraɓe ɗagoot, na mĩ kɨ deg lom kɨ ɗagootal.

²⁸ I kɔn Bɨraɓe kɨta ndángndii kɨtag kɨ kɔsɨndii nõ asɨ ta, m'a m'nyasɨ mad awɨn, a i ndin nẽ be gog al ta.

²⁹ Moij ela an: Lon m'a m'tee kam ɓet kɨtɨga ye, m'a m'ɔi jim kɨ dõ kɨ ro Bɨraɓet, ndángndii a nya tan, kɔsɨndii a tuso gog al ta, kɨtakad i gerɨn dɔning i lo Bɨraɓe.

³⁰ Na m'ger kad ĩ kɨ ɓerg loi a i ɓoolɨn Bɨraɓe al ɓaitɔ.

³¹ Nyẽ kɨ nyako kɨ tɔa i ɔrj tujɨn kɨta ɔrj yaɓɔl, nyẽ tɔ hutɨn.

³² Na ndah nyako gem kɨ tẽi al kɨta tɔgɨn al ɓaitɔ.

³³ Moij ɓai ro Paraõt, tee kam ɓebot kɨtɨga, ɔi jin kɨ dõ kɨ ro Bɨraɓet, ad ndángndii kɨ kɔsɨndii nyan tad, ndii ed dɔningt gog al ta.

³⁴ Lon Paraõ oo man ndii kɨ kɔsɨndii kɨ ndángndii nyan tad ye, ɗa majal dɔt kɨ tɔi, ad kama kongkong kɨdɔt, ĩn kɨ ɓerg lon.

³⁵ Kam Paraõ kongkong kɨdɔt, nya Israelag ad awɨn al Bɨraɓe elɨn kɨ ta Moij.