Teekɨtɨga 7 - Maktub Ta Kumkajir

¹ Bɨraɓe el Moij an: Oo m'ndai tit luwah mad takum Paraõt, na ngonkõi Aarõ a i ngekelta kɨ tait.

² A el nyag tube'n m'ndɨ m'ndai mbera, ngonkõi Aarõ tɔ a el Paraõ kad nya Israelag ad teen dɔningt loa kɔ.

³ Na m'a mad kam Paraõ kongkong, m'a mad nyakɔjg lom kɨ nyag kɨyaya lom bɨlan kɨdɔtdɔt kam dɔning Ejipt't.

⁴ Paraõ a oo dɔ ta losɨ al. Kamla m'a m'nda jim dɔ Ejipt't, m'a m'tee kɨ ɓut koosɨg lom kɨ deg lom, ad i Israelag kam dɔning Ejipt't kɔ kɨtakul nujkɔ kɨbobe kɨ m'gang dɔat.

⁵ Ejiptiag a gerɨn kad mĩ la mĩ Bɨraɓe ye, lon m'a m'la jim m'ndoorɨn Ejipt. M'a m'tee kɨ Israelag dandt kɔ.

⁶ Moij kɨ Aarõ ɗan tit'n Bɨraɓe ndadɨn mbera, ɗan titbe tɔ.

⁷ Ɓal Moij i dɔjijoo, na ɓal Aarõ i dɔjijoo gidaimɨta lon elɨn ne ta kɨ Paraõ.

Kag tɔsɨ lo Aarõ tel li

⁸ Bɨraɓe el Moij kɨ Aarõ an:

⁹ Lon Paraõ a elsɨ an: Ɔjɨn nya kɨyaya a ne, a el Aarõ an: Un kag tɔsɨ loi, i la ber nõ Paraõt kad tel li

¹⁰ Moij kɨ Aarõ andɨn go Paraõt, ɗan nya kɨ Bɨraɓe ndadɨn mbera nõ. Aarõ la kag tɔsɨ lon ber nõ Paraõt kɨ ɓerg loa, na tel li.

¹¹ Kamla Paraõ kun ngéterrg kɨ ngéyog, ad i mboolig kɨ dɔning Ejipt't, ĩn tɔ ɗan titbe kɨlag kɨtakul mboolig.

¹² Ĩn tube tɨlan kag tɔsɨg lod ber ad telɨn lig, na kagtɔsɨ lo Aarõ tur kag tɔsɨg lod.

¹³ Kam Paraõ kongkong kɨdɔt ad oo dɔ ta lo Moij kɨ Aarõ al. Tit'n Bɨraɓe elɨn.

Man bah tel mosɨ

¹⁴ Bɨraɓe el Moij an: Paraõ ɗa dɔngang ad mbet nya deg kad awɨn.

¹⁵ Aw kɨsĩ ro Paraõt, a tee kɨta kaw ta mant. I duba ɗa ta baht kad i ndɔda. A i un kag tɔsɨ kan tel li nõ jiit.

¹⁶ A el Paraõ an: Bɨraɓe Luwah lo Hebreg lam kɨ roit kad m'eli, i nya deg lom ad awɨn kad ɗan kɨlaɓer admɨn kam dɨlalot Na mbã tajigla i oo dɔ al.

¹⁷ Bɨraɓe el an: I kɨtakul 'nten a i germɨn, mĩ la mĩ Bɨraɓe ye. Oo m'a m'nda man bah kɨ kag tɔsɨ kɨ jimt kad tel mosɨ.

¹⁸ Kanjg kɨ kam baht a oin, bah a ot ndum, a tel kɨyerr ad Ejiptiag a ndigɨn kãi man nõ al.

¹⁹ Bɨraɓe el Moij an: El Aarõ titbe, un kag tɔsɨ loi, i la jii kɨdɔ mangt kɨ dang dang kɨ dɔning Ejipt, kɨ kɨdɔ bahgt lod, kɨ kɨdɔ ngan bahgt lod, kɨ kɨdɔ man kargt lod, kɨ kɨdɔ man danggt lod tube kad telɨn mosɨ. Mosɨ a i kam dɔning Ejipt't kɨtaagbe, kam ngogt kɨ kam jo hanjgt tu.

²⁰ Moij kɨ Aarõ ɗan tit'n Bɨraɓe ndadɨn mbera nõ. Aarõ un kag tɔsɨ kɨ dõ, nda'n man bah takum Paraõt kɨ takum ɓergt loa, ad man bah tube tel mosɨ.

²¹ Kanjg kɨ kam baht oin, bah ot ndum, Ejiptiag asɨ kãin man bah al kɨta mosɨ i kam dɔning Ejipt't kɨtaagbe.

²² Mboolig kɨ Ejipt't ɗan titbe kɨtakul kɨla mboolig lod, kɨlag lod kɨmund. Kam Paraõ kongkong kɨdɔt ad oo dɔ ta lod al tit'n Bɨraɓe elɨn nõ.

²³ Paraõ tel gidɨn ad'd na aw ɓe lon, tur go nyag'n non al tɔ.

²⁴ Ejiptiag tube wurɨn ɓe kad baht kad ngahn man kãit, kɨta asɨ kãin man bah al.

²⁵ Ndɔ tanãimɨta tɨga go ndɔt'n Bɨraɓe ndan bah gang.

Kãr ɗoosɨn dɔning kɨ Ejipt

²⁶ Bɨraɓe el Moij an: And go Paraõt, ela an: Bɨraɓe el an: I nya deg lom ad awɨn kad ɗan kɨlaɓer admɨn

²⁷ Ĩla i mbet nyad kad awɨn a ne, oo maj m'a mad dɔning loi kɨtaagbe ɗoosɨ kɨ kãrg.

²⁸ Bah a ɗoosɨ kɨ kãrg, a tee alɨn, a andɨn kam kujt loi, kam kujbiit kɨ dɔ tɨraɓiit, kam kujgt lo ɓerg loi, kɨ kam kujgt lo deg loi, kɨ dɔ mbahilgt loi kɨ kam ɓirgt loi.

²⁹ Kãrg a ɗen kɨdɔit ho kɨdɔ degt loi ho, kɨ kɨdɔ ɓergt loi tube.