Teekɨtɨga 6 - Maktub Ta Kumkajir

¹ Bɨraɓe el Moij an: A oo tajigla nya'n m'a m'ɗa kɨ Paraõ, kɨta kɨtakul ji kɨtɔg la a nyadɨn ad awɨn, kɨtakul ji kɨtɔg tɔ la a tuɓadɨn kɔ kam dɔningt lon. Luwah kun Moij kun kɨkõjoo.

Luwah un kɔn ad Moij kad n'tee kɨ Israelg ɓe ɓert

² Luwah elta Moij an: Mĩ Bɨraɓe.

³ Mĩ Luwah Ngetɔgtube, m'tee hɔi kɨ ro Abrahamt kɨ Isaak kɨ Jakob, na gerɨmɨn rodt kɨ tɔm kɨ Bɨraɓe al.

⁴ M'un kɔm m'ad'd mad to kɨɗubagt, m'a m'ad'd dɔning Kana, ad i dɔning kawd kɨ nja dõ, dɔning'n ndɨn mbaht.

⁵ M'oo dɔ tõ ɗusɨɗusɨ lo Israelag'n Ejiptiag ndɨ hɔnd bá kam kɨlaɓert, na m'ga dɔ kunkɔt lom.

⁶ Kɨtɔ 'nten el Israelag an: Mĩ Bɨraɓe, m'a m'tee sesɨ kɔ girr kɨlaɓert kɨkɔi lo Ejiptiag, m'a m'ɔrrsɨ kɔ kam ɗa ɓert lod, m'a m'ug m'ɔrrsɨ kɨ ji kɨ la kɨ dõ kɨ takɨgangg kɨbobe.

⁷ M'a m'taasɨ kɨ romt kad ĩn deg lom, m'a mĩ Luwah losɨ, a i gerɨn kad mĩ Bɨraɓe Luwah losɨ'n tee sesɨ kɔ girr kɨlaɓert kɨkɔi lo Ejiptiag.

⁸ M'a mad andɨn kam dɔningt'n m'ndan yo mad Abraham kɨ Isaak kɨ Jakob, m'a m'adsɨ nyakagɓet, mĩ Bɨraɓe.

⁹ Moij el Israelag titbe, na oon dɔ ta lo Moij al kɨta kamd il bɨrɨm kɨta kɨlaɓer kɨkõkõ.

¹⁰ Bɨraɓe el Moij an:

¹¹ Aw, i el Paraõ ngar kɨ Ejipt't kad nya Israelag ad teen kam dɔningt loa kɔ

¹² Moij turta takum Bɨraɓet an: Israelag oon dɔ ta lom al, titbãi Paraõ a oon dɔ ta lom mĩ'n tam ɔi dɔ keltat a?

¹³ Bɨraɓe elta kɨ Moij kɨ Aarõ, ndadɨn mber kɨta Israelag ho kɨta Paraõ ngar kɨ Ejipt't kad tee kɨ Israelag kɔ kam dɔning Ejipt't.

Ngaka Moij kɨ Aarõ

¹⁴ Ĩgɨn ten la in bɨrabɔwg lo ngékɨɓe lo bɔwdg. Ngan Ruben kɨdɨngã ngonderr Israel i Henok kɨ Palu kɨ Hesron kɨ Karmi, Ĩgɨnon la ĩn ngékɨɓe lo Ruben.

¹⁵ Ngan Simeõ kɨdɨngã ĩn Yemuel kɨ Yamin kɨ Ohad kɨ Yakin kɨ Sohar kɨ Sawul ngon kooj Kana mad kɨdẽ, Ĩgɨnon la ĩn ngékɨɓe lo Simeõ.

¹⁶ Ĩgɨn ten la ĩn tɔ ngan Lebi kɨdɨngã kɨgo koojdt: Gerson kɨ Kehat kɨ Merari. Ɓal'n Lebi ndɨn kɨ dɔn dõ i ɓu kɨdɔmɨta gidaitanaimɨta.

¹⁷ Ngan Gerson kɨdɨngã ĩn Libni kɨ Simei kɨgo girrkoojdt.

¹⁸ Ngan Kehat kɨdɨngã ĩn Amram kɨ Jisehar kɨ Hebrõ kɨ Ujiel. Ɓal'n Kehat ndɨn kɨ dɔn dõ i bu kɨdɔmɨta gidaimɨta.

¹⁹ Ngan Merari kɨdɨngã ĩn Makli kɨ Musi. Ĩgɨn non la ĩn ngékɨɓe lo Lebi kɨgo koojdt.

²⁰ Amram ta bãrin Jokebed nẽnt, ooj sia Aarõ kɨ Moij. Ɓal'n Amram ndɨn kɨ dɔn dõ i ɓu kɨdɔmɨta gidaitanaimɨta.

²¹ Ngan Jisehar kɨdɨngã ĩn Kore kɨ Nepeg kɨ Jikri.

²² Ngan Ujiel kɨdɨngã ĩn Misael kɨ El Japan kɨ Sitri.

²³ Aarõ taa Eliseba ngon Aminadab kõnan Nason nẽnt, ooj sia Nadab kɨ Abihu kɨ Eleajar kɨ Itamar.

²⁴ Ngan Kore kɨdɨngã ĩn Asir kɨ Elkana kɨ Abiasap ĩgɨn non la ĩn ngékɨɓe lo Kore.

²⁵ Eleajar ngon Aarõ ta kɨkɨɗa ku ngan kɨdẽgt lo Peltiel nẽnt, ngon kɨdẽ'n non ooj sia Pinẽas. Ĩgɨn non la ĩn bɨrabɔwg lo Lebiag kɨgo girrkoojdt.

²⁶ I Aarõ kɨ Moij nõ la Bɨraɓe eld an: I teen kɨ Israel kɔ kam dɔning Ejipt't kɨgo ɓut koosɨdt.

²⁷ I Ĩgɨnon la elɨn ta Paraõ ngar kɨ Ejipt kad teen kɨ Israelag kɔ dɔning Ejipt't ye. Ĩgɨn non i Moij kɨ Aarõ ka nõ.

Bɨraɓe la ta ji Moijt

²⁸ Ndɔt'n Bɨraɓe elta Moij kam dɔning Ejipt't ye,

²⁹ Bɨraɓe el Moij an: Mĩ Bɨraɓe. El Paraõ ngar kɨ Ejipt nyag tube kɨ m'ndɨ m'eli nõ

³⁰ Moij turta takum Bɨraɓet an: Mĩ'n tam ɔi dɔ keltat, titbãi Paraõ a oon dɔ ta lom a?