Teekɨtɨga 5 - Maktub Ta Kumkajir

Moij kɨ Aarõ elɨn ta kɨ Paraõ

¹ Goot gog Moij kɨ Aarõ aw elɨn Paraõ anan: Bɨraɓe Luwah lo Israelg el an: I nya deg lon ad aw ɗan nah kɨtɔm kam dɨlalot

² Paraõ tur an: Nõ i Bɨraɓe kad m'oo dɔ ndɨ ta loa kad m'nyan Israelg mad awɨn a? M'ger Bɨraɓe al, na m'a m'nya Israelg mad awɨn al tɔ.

³ Elɨn anan: Luwah lo Hebreg ndɔdj. Kɨ kɔi kɨ i nyàj ad j'aw, kɨ ndia ndɔ mɨta kam dɨlalot kad kɨ ja mosɨ kadkari jad Bɨraɓe Luwah loj, na ɓeta so dɔjt kɨ yokoosɨ ke kɨ kiyaɗɔɔ.

⁴ Ngar kɨ Ejipt't turd an: Moij kɨ Aarõ, kɨtɔɗi i nyan ne deg dõ dɔ kɨlagit lod a? Awɨn ta kɨlagt losɨ.

⁵ Paraõ el an: Oo tajigla deg'n non kɔrd i ngãi kɨ tɔi kam dɔningt 'nten, na adɨnd taan kò dɔ kɨlagt lod.

Ngar Paraõ ad kõ ngan Israel

⁶ Ndɔt'n non Paraõ ndamber bɨradɔg lo deg kɨ pajag lod, an:

⁷ Nẽbe kɨnõt a adɨn deg mũ kad ɗan ne brik tit kɨmaɗi al. Ad ĩn kɨɓeg aw ɔin mũ.

⁸ A i gangɨn kɔr brik dɔdt tit'n a ɗan ne maɗi, a ɔrrɨn kamt kɔ al, kɨta ĩn ngéngẽ. Kɨtɔ 'nten la kon ne anan: I nyàj ad j'aw kad kɨ ja mosɨ kadkari jad Luwah loj

⁹ Ad ndan kɨla kɨkɔi kɨ tɔi dɔ degt'n non, kad ɔrɨn rɔkɨ girrt, na kad kɨ turɨn go tag kɨbal al.

¹⁰ Bɨradɔg lo deg kɨ pajag lod teen, aw elɨn deg anan: Paraõ an: a adsɨn mũ al.

¹¹ Awɨn, ĩn kɨɓeg, i jan mũ lot'n a i ngahnt, kɨta a ɔrrɨn nya mad kɔ kam kɨlat losɨ al

¹² Deg tĩn na kɨ log tube kam dɔning Ejipt't kɨta kɔi bulmug gan ne got mũ.

¹³ Bɨradɔg ɔsɨnd anan: I tɔlɨn kɔn kɨlag losɨ, ndɔ kɨɗen tit kɨkete lon ĩn ne kɨ mũ.

¹⁴ Ndan pajag lo Israelag'n bɨradɔg lo Paraõ ndan dɔdt kɨ ndeh. Ndɨjend anan: Kɨtɔɗi i tɔlɨn ne kon kɨlaɓer losɨ kɨtaagbe ɓone al, na ɔrrɨn brik asɨ tit kɨ maɗi al tɔ a?

¹⁵ Na kɨbo dɔ kɨlat lo ngan Israelg ɗen ro Paraõt anan: Kɨtɔɗi i ɗan titbe kɨ ɓerg loi a?

¹⁶ Adɨn mũ ɓerg loi al, na eljɨn anan: Ɔrrɨn brik oo ndan ɓer Israelag, na ɗagootal i lo deg loi Ejiptiag ĩn kɨbeg.

¹⁷ Paraõ el an: Ĩn ngéngẽ, ĩn ngéngẽ Kɨtɔ 'nten la i ndɨ elɨn ne anan: I nyàj ad j'aw kɨ ja mosɨ kadkari jad Bɨraɓe.

¹⁸ Tajigla aw i ɗan kɨla kɨta a adsɨn mũ al, na a i adɨn kɔr brik tit kɨkete.

¹⁹ Pajag lo Israelag oon ad ĩn kam danggt lon elɨnd anan: Kɔr brik'n i ndɨ ɔrrɨn kɨndɔgndɔg a ɔrrɨn kamt kɔ al.

²⁰ Lon teen ro Paraõ kɨtɨga ye, ndɔdɨn Moij kɨ Aarõ, ɗa ngoond ɗobo.

²¹ Elɨnd anan: Kɨ Bɨraɓe nda kumɨn dɔsɨt, kɨ gangta, kɨta ĩla i teljɨn nya kɨyerr takum Paraõt kɨ takum ɓergt loa, i lan kiyaɗɔɔ jidt kad tɔljɨn ne kɔ ye.

Moij elta kɨ Luwah

²² Moij tel kɨ ro Bɨraɓet gog, el an: Bɨraɓe, kɨtɔɗi i ɗan majal kɨ deg'n non a? Kɨtɔɗi i lamɨn a?

²³ Go kawɨm kɨ ro Paraõt kɨtakad m'elta kam tɔit ye, Paraõ ɗa majal kɨ deg'n non, na ĩ, ɔrr deg loi kɔ al bat.