Teekɨtɨga 40 - Maktub Ta Kumkajir

Tɨlan kujkub ndɔdna kɨ Luwah ta nat

¹ Bɨraɓe el Moij an:

² Ndɔt kɨdasa lo nah kɨdasa i tɨla kujkub londɨ, kujkub ndɔdna kɨ Luwah ta nat.

³ A i nda sund najkɨma gid kubganglot.

⁴ A i ɗe kɨ tabɨl kamt, na a i ndah nyag dɔt kɨgoagoa. A i ɗe kɨ kag lambag, na a i ɗago bailambag loa.

⁵ A i nda dɨngɨr lɔr kɨta mbikam nõ sund najkɨmat, na a i ga kubkut tabit kand kam kujkub londɨt dõ.

⁶ A i nda dɨngɨr kadkari kɨlahorrt nõ tabit kand kam kujkub londɨt, kujkub ndɔdna kɨ Luwah.

⁷ A i nda baigirr kut gid njat mbɨna kujkub ndɔdnat kɨ Luwah kɨ dɨngɨr kadkari, a urr man tit.

⁸ A i tɨla palkubg nyag tube ta nat gugɨn dɔ natlo. A i ga kubkut lo kand kam natlot dõ.

⁹ A i un yib kurdɔt urɨn kujkub londɨ kɨ nyag kɨ kamt tube. A i ndaa kɔtko kɨɗa kɨ nyag tube kɨ kamt, kad i kɨjaɓat

¹⁰ A i wur yib dɨngɨr kadkari kɨlahorrt kɨ nyaɗakɨlaag tube. A i ndaa kɔtko kɨɗa, na dɨngɨr kadkari a i kɨjaɓat kɨtɔitɔi.

¹¹ A wur yib bai girr kutg ho, a i telan kɨjaɓat't.

¹² A i ɗe kɨ Aarõ kɨ ngana ta tabit kand kam kujkub ndɔdnat kɨ Luwah, na a i ndogd man.

¹³ A i la kubg kɨjaɓat ro Aarõt, a i wura yib, a i ndaa kɔtko kɨɗa kɨtakad ɗa kɨlaɓer adɨm kam kɨla jamosɨkadkarit.

¹⁴ A i ɗe kɨ ngana, na a i la kubg rodt.

¹⁵ A i wurd yib tit'n urɨn bɔwd kɨtakad ɗan kɨlaɓer admɨn kam kɨla jamosɨkadkarit Kur yib'n non a ad'd kɨla jamosɨkadkari mbãkɨnõt kɨ ngakat kɨ ngaka.

Moij ad ndan dɨngɨr kadkari

¹⁶ Moij ɗa titbe kɨgo nyagt tube'n Bɨraɓe ndaa mbera, titbe la ɗan ye.

¹⁷ Taa ne, kam naht kɨdasa lo ɓal kɨkõjoo, ndɔt kɨdasa, tɨlan kujkub londɨ ta nat.

¹⁸ Moij tɨla kujkub londɨ ta nat, ndah nyahɔag ber, na ɔsɨ barkag loa dõ, la kag kɨngalg tit, na ɔsɨ pilieg kɨ dõ.

¹⁹ Ga kub kutdɔ kuj londɨ dõ, na la nyakutdɔ kujkub'n non dõ dɔt, tit'n Bɨraɓe ndan mbera Moij.

²⁰ Kamla un bar mbalg najkɨma kɨndang nya dɔt, ndaa kam sundt, la kag kɨngalg kad sund, na ndah nyakutdɔ dɔ sund.

²¹ Un sund ɗen kam kujkub londɨt, na ga kub ganglo dõ utɨn sund najkɨma kɨ keme tit'n Bɨraɓe ndan mbera Moij.

²² Nda tabɨl kam kujkub ndɔdnat kɨ Luwah kad kujkub londɨ ko ɓodo nõ kubganglot.

²³ Nda kuɓɨr bɨna kɨ njɔra njɔra dɔt nõ Bɨraɓet, tit'n Bɨraɓe ndan mbera Moij.

²⁴ Nda kaglambag kam kujkub ndɔdnat kɨ Luwah sumba nõ tabɨl sew, kad kujkub londɨ ko dɔɔ.

²⁵ La horr bailambag nõ Bɨraɓet, tit'n Bɨraɓe ndan mbera Moij.

²⁶ Nda dɨngɨr lɔr kam kujkub ndɔdnat kɨ Luwah nõ kubganglot.

²⁷ La horr mbikam kɨ ɗa kɨ nõkagg kɨkootmbĩ, tit'n Bɨraɓe ndan mbera Moij.

²⁸ Ga kubkut tabit kand kam kujkub londɨt dõ.

²⁹ Nda dɨngɨr kadkari kɨlahorrt nõ tabit kand kam kujkub ndɔdnat kɨ Luwah, na la kadkari kɨlahorrt dɔt kɨ kadkari nduj ko tit'n Bɨraɓe nda'n mbera Moij.

³⁰ Nda bai tugo nja mbɨna kujkub ndɔdnat kɨ Luwah kɨ dɨngɨr kadkari, urr man kamt kɨta tugo ro.

³¹ Moij kɨ Aarõ kɨ ngana awɨn ta bai girrkut't nõ, tugon jid kɨ njad.

³² Lon a andɨn kam kujkub ndɔdnat kɨ Luwah a ndɔt'n kɨkad dɨngɨr kadkarit ye, a tugon rod tit'n Bɨraɓe ndan mbera Moij.

³³ Tɨla palkub lo natlo ta nat gugɨn dɔ kujkub londɨ kɨ dɨngɨr kadkari, na ga kubkut tabit kand kam natlot dõ. Titbe la Moij tɔlɨn kɔn kɨla ye.

Kunj Bɨraɓe kɨɗangeɗeng unj kam kujkub ndɔdnat kɨ Luwah

³⁴ Kilndii ut dɔ kujkub ndɔdna kɨ Luwah, na kunj Bɨraɓe kɨɗangeɗeng unj kam kujkub londɨt kɨtaagbe.

³⁵ Moij asɨ kand kam kujkub ndɔdnat kɨ Luwah al kɨta kilndii ndɨdɔt, na kunj Bɨraɓe kɨɗangeɗeng unj kam kujkub londɨ kɨtaagbe.

³⁶ Kaglo ndiadt tube, lon kilndii ɓai dɔ kujkub londɨt a ne, ngan Israelg tɔ a ɓai awɨn,

³⁷ na lon kilndii ɓai al a ne, ĩn tɔ a ɓai awɨn al mbã ndɔt'n kilndii ɓai kamtã.

³⁸ Kɨtɔ kilndii lo Bɨraɓe a ndɨ dɔ kujkub londɨt kàda, na horr a i kamt ndɔ takum ngékɨɓe lo Israel tube kaglo ndia mbaht lod tube.