Teekɨtɨga 4 - Maktub Ta Kumkajir

¹ Moij tur an: A admɨn kamd al, a oon ta lom al tɔ, kɨta a elɨn anan: Bɨraɓe tee hɔi kɨ romt al.

² Bɨraɓe ndɨjea an: Ɗi i jiit a? Moij tur an: Kag tɔsɨ.

³ Bɨraɓe el an: I la ningt Moij la kagtɔsɨ lon ningt, na kagtɔsɨ loa tel li. Moij ãi nõ lit'n non.

⁴ Bɨraɓe el Moij an: I la jii, i hɔn ɓonga Moij la jin hɔn ɓonga, na li tel kagtɔsɨ gog kam jiat.

⁵ I kɨtakad geri ne Bɨraɓe Luwah lo bɔwdg, Luwah lo Abraham, Luwah lo Isaak, Luwah lo Jakob'n tee hɔi kɨ roit.

⁶ Bɨraɓe ela gog tɔ an: I nda ji kadit. Moij nda jin kadɨnt, kamla ɔrr jin. Lon un jin a ne, banj ũ jiat ad jia ɔrr nda bung tit bul be

⁷ Bɨraɓe el an: a i la jii kadit gog Moij nda jin kadɨnt gog, na lon un jin gog a ne, jia tel to kari tit ndeg roa.

⁸ Luwah el an: A i titbe: Ĩla adin kamd al a ne, ke oon ndaa nyakɔj kɨdasa al kaa ne, maja a oon dɔ ta lo nyakɔj kɨkõjoo.

⁹ Na ĩla a adɨn kamd nyakɔj kɨjoo'n non, ke a oon dɔ ndii al a ne, ɔd man bah ũ ningt, na man bah'n ɔd ye, a tel mosɨ dɔningt.

Luwah kɔt Aarõ kad ɗa kɨla nat kɨ Moij

¹⁰ Moij el Bɨraɓe an: Bɨraɓe, mĩ ngegoosɨ kelta al, ke maɗi nu, ke tajigla lon elmɨn ta mĩ ɓer loi, kɨta tam ɔi ngãi ad m'elta ɔrr warang al.

¹¹ Bɨraɓe ela an: Nõ ɗa ta de a? Nõ tel de mbot, ke ngekelta jɨkjɨk, ke ngekoolo, ke mundo a? I mĩ Bɨraɓe ale?

¹² Kɨtɔ 'nten tajigla aw m'a mĩ nat kɨ tai, m'a m'ndooi nya'n a el.

¹³ Moij el an: Bɨraɓe, m'kɔi kɨ i la de mad kɨɗang

¹⁴ Kamla Bɨraɓe ɓawong kɨ Moij, el an: Ngonkõi Aarõ kɨ i Lebia i nõ ale? M'ger a asɨ kelta maj. Oo ĩ kɨɓe ndɨ ɗe kɨ n'ndɔdi. Lon a ooi ye, a ɗa ronel kamɨnt.

¹⁵ A ela ta, a i nda tag taat. Mĩ tɔ, m'a mĩ nat kɨ tai kɨ taa, na m'a m'ndoosɨ nya'n a i ɗan.

¹⁶ A i ngekelta deg kɨtɔi, a ga goot tai, na ĩ a i ga goot Luwah kɨtaa.

¹⁷ A un kag tɔsɨ 'nten jiit, a i ɗa'n nyakɔjg.

Moij tel kɨgog dɔning Ejipt't

¹⁸ Moij tel aw ro mumɨn Jetrot, ela an: M'kɔi kɨ i nyam adɨm m'tel m'aw ro ngankomt'n ndɨn dɔning Ejipt't, kɨtakad m'oo ke ndɨn kɨ dɔd dõ kari a? Jetro tur Moij an Aw kɨ kam kɨsokɨber

¹⁹ Bɨraɓe el Moij kam dɔning Madiãt an: Aw, i tel kɨ dɔning Ejipt gog kɨta ngesah tɔli tube oin kɔ.

²⁰ Moij ɔi nẽn kɨ nganɨn kɨdɨngã, ndad dɔ korrot, tel kɨgog dɔning Ejipt't. Un kag tɔsɨ lo Luwah jint.

²¹ Bɨraɓe el Moij an: Lon a i tel kɨ dɔning Ejipt gog ye, oo maj kad i ɗa nyag kɨyaya tube'n m'la jiit nõ Paraõt. Na m'a mad kama kongkong, a nya deg ad awɨn al.

²² A el Paraõ an: Bɨraɓe el an: Israel'n i ngonɨm, i ngonderɨm.

²³ M'eli kad i nya ngonɨm ad aw kɨtakad ɗa kɨlaɓer adɨm Na ĩla i mbet nyàa kad aw a ne, oo maj m'a m'tɔl ngonderi kɨdɨngã.

²⁴ Go kawat, Bɨraɓe ndɔd Moij lon hɔ lot kad'n ɓit, sah tɔla.

²⁵ Kamla Sepora un gaj mbal kɨ at pepep jan gaj ngonɨn kɨdɨngã na laa nja Moijt, el an: Rota ĩ ngawɨm kɨtakul mosɨ.

²⁶ Na Bɨraɓe nyàa. Kamla Sepora el an: Ngawɨm kɨtakul mosɨ kɨgo ɗob gaj kɨja.

²⁷ Bɨraɓe el Aarõ an: Aw kam dɨlalot kad i ndɔd Moij Aarõ aw ndɔd Moij kad mbalbot lo Luwah, ɗaa lapia njuta.

²⁸ Moij el Aarõ tag tube lo Bɨraɓe'n lan, kɨ nyakɔjg tube'n ndaa mber kad ɗa.

²⁹ Moij kɨ Aarõ awɨn, kawɨn kɨbog lo Israelag tube kɨnat.

³⁰ Aarõ eltag tube'n Bɨraɓe el Moij, na ɗa nyakɔjg takum degt.

³¹ Deg taan ta loa. Lon oon kad Bɨraɓe ɗe ro Israelagt, oo daiyog lod tɔ ye, ndɨn kɨ gojd ɔsɨn dɔd ber.