Teekɨtɨga 38 - Maktub Ta Kumkajir

Ɗan dɨngɨr kadkari kɨlahorrt

¹ Betsalel ɗa dɨngɨr kadkari kɨlahorrt kɨ kag akasia, ngala i metɨrjoo kɨ nusɨ, tata i metɨr joo kɨ nusɨ, ngala kɨ tata asɨn na, ngala kɨ dõ i metɨr kɨɗa kɨ nusɨ.

² Ɗà gajg dɔkumat kɨsɔɔ. Gajg'n non ĩn ro kɨɗa sia. Ut dɔ dɨngɨr kadkari kɨ ningakasɨ tube.

³ Ɗà nyaɗakɨlag tube kɨta dɨngɨr kadkari: Jog kɨ pelg kɨ tasag kɨ nyakɔsɨ dã kɨ ngan jo ndah horrg. Nyẽ ningakasɨ ɗan nyaɗakɨlaag tube.

⁴ Nyẽ ningakasɨ ɗan nya la yalhorr tit band be, na laa dan dɨngɨr kadkarit girr bɔgat kɨber.

⁵ Ɗà ninga kasɨ sɔɔ dɔkumat kɨsɔɔ to kɨta la kag kɨngalg.

⁶ Tɔsɨ kag akasia kɨ ngal joo, na ut gid'd kɨ ningakasɨ.

⁷ La kag kɨngalg kam ningagt kɨkad dɨngɨr kadkarit kɨta kunɨn kɨ dõ. Ɗà dɨngɨr kadkari kɨ barkag ad kama i bulo.

Ɗan baigirr kutg

⁸ Betsalel ɔi kutram ningakasɨg lo dekɨdẽg kɨ ndan dɔa nat, na kɨ tɔsɨ tabit kand kam kujkub ndɔdnat kɨ Luwah, lẽ ɗan bai kɨ njaa.

Ɗan natlo kɨta kujkub londɨ

⁹ Gang natlo. Gang kada ko ɓodot kɨ pal kub lẽg kɨ sɔl lom lom kɨɓew asɨ metɨr dɔmi bu.

¹⁰ Kagndog i dɔjoo kɨ nya hɔd ningakasɨ dɔjoo tɔ. Kongg lo kagndog kɨ sordg ĩn kɨ ɗa kɨ larjã.

¹¹ Ɗà titbe kɨta kada ko dɔɔ tɔ ad i pal kubg kɨ ngald i metɨr dɔmi kɨ kagndogg dɔjoo, kɨ nyahɔd ningakasɨ dɔjoo. Kongg lo kagndog'n non kɨ sordg ĩn larjã.

¹² Ɗà titbe kɨta kada ko lokudkàdt tɔ ad i pal kubg kɨ ngald i metɨr dɔmi kɨ kagndog kɨlah kɨ nyahɔd kɨlah tɔ. Kongg lo kagndog'n non kɨ sordg ĩn larjã.

¹³ Tat kad natlo ko loɓakàdt i metɨr dɔmi.

¹⁴ Pal kubg ko bɔgt kɨɗa ngald i metɨr kɨlah gidaimi kɨ kagndog mɨta kɨ nyahɔd mɨta tɔ.

¹⁵ Ko bɔgt kɨmad i titbe tɔ, ko nu kɨ ko ne tabit kand kam natlot pal kubg kɨ ngald i metɨr tanãimɨta kɨ nusɨ kɨ kagndog mɨta kɨ nyahɔd mɨta tɔ.

¹⁶ Pal kubg tube'n gugɨn dɔ natlo ĩn kɨ ɗa kɨ lẽ kɨ sɔl lom lom kɨɓew.

¹⁷ Nyahɔ kagndogg ĩn ningakasɨ, kongg lo kagndog kɨ sordg ĩn larjã, tasomd ĩn kɨ kut dɔ kɨ larjã. Kagndog kɨta gug dɔ natlo'n non tube'n kɨ la nat kɨ sorkag kɨ ɗa kɨ larjã.

¹⁸ Kubkut tabit kɨta lo kand kam natlot i kɨla lo ngegoosɨ kɔsɨ kɨɗa nyan. Ɗà kɨ kɨllakub kɨkil musɨmusɨ kɨ kɨkɨre wor wor kɨ kɨkɨre pirɨr kɨ lẽ kɨ sɔl lom lom kɨɓew. Ngala i metɨr kɨlah, ngala kɨ dõ i metɨr i joo kɨ nusɨ tit kɨ tat pal kubg lo natlo.

¹⁹ Kagndog loa i sɔɔ, nyahɔd kɨ ɗa kɨningakasɨ i sɔɔ tɔ. Kongg lod ĩn kɨ ɗa kɨ larjã, utɨn dɔ tasomd kɨ sordg kɨ larjã.

²⁰ Kagg kɨta dɔ kɨla hɔ pilie kujkub londɨ kɨ kagg kɨta dɔ kɨla hɔ kagndog natlo ĩn kɨ ɗa kɨ ningakasɨ.

Kɔr nyag'n ɗan ne kujkub londɨ

²¹ Kɔr nyag'n tɨdan kɨta kujkub londɨ, ad i kujkub najkɨma laten: Tit'n Itamar, ngon Aarõ ngejanyamosɨkadkari, tɨdan kɨgo mberkɨndat lo Moij kɨta kɨlaɓer lo Lebiag.

²² Betsalel, ngon Uri kɨdɨngã, ngon Hur, ko girr Judat, ɗa nyag tube'n Bɨraɓe nda mbera Moij.

²³ Ngeɗasia i Oholiab, ngon Ahisamak kɨdɨngã ko girr Dant, i ngetɔsɨ mbal kɨ ngegoosɨ kɨla kɨ ngekɔsɨ ja kɨɗanya kɨ kɨllakub kɨkil musɨmusɨ kɨ kɨkɨre wor wor kɨ kɨkɨre pirɨr kɨ lẽ kɨ sɔl lom lom kɨɓew.

²⁴ Lɔr tube kɨ ɗan ne kɨla lot kɨjaɓat ad i lɔr kadkari, kɔra i 877 kɨlo kɨ 300 gram.

²⁵ Larjã lo ĩgɨn tɨdand ku ngékawnat ye, asɨ 3 017 kɨlo kɨ 750 gram.

²⁶ Deg kɨ 603 550 kɨ ɓald i dɔjoo ke tɔi dɔjoo'n tɨdan ye dekɨɗen kadt ad larjã gram.

²⁷ Kɔdg nyẽn kɨlo larjã 3 000 kɨta ɗan nyahɔ kag lo lo kɨjaɓat kɨ kɨ lo kubganglo kɨ kerme. Ad kɨlo 30 asɨ ɗa nyahɔ kag 100,

²⁸ kɨ kɨlo 17 kɨ 750 gram'n nãi ye ɗan ne kong kɨta kagg, utɨn dɔ tasomd, na ɗan sordg tɔ.

²⁹ Kɔr ningakasɨ kadkari lo ngan Israel: 2 124 kɨlo.

³⁰ Ɗan ne nyahɔg kɨta tabit kand kam kujkub ndɔdnat kɨ Luwah, kɨ dɨngɨr kadkari ningakasɨ, kɨ nya la yalhorr ningakasɨ, kɨ nyaɗakɨlag tube lo dɨngɨr kadkari,

³¹ kɨ nyahɔg lo natlo kɨ gug dɔa, kɨ nyahɔg lo tabit kand kam natlot, kɨ kagg tube kɨta dɔ kɨla hɔ kag kujkub londɨ kɨ kagg tube kɨta dɔ kɨla hɔ kagndog natlo gug dɔa.