Teekɨtɨga 37 - Maktub Ta Kumkajir

Ɗan sund najkɨma

¹ Kamla Betsalel ɗa sund kɨ kag akasia, ngala i metɨr jo kɨ nusɨ, tata i metɨr kɨɗa kɨ nusɨ, ngala kɨ dõ i metɨr kɨɗa kɨ nusɨ.

² Ut kaga kɨ lɔr kɨjanjoi, ut kaga kokamt kɨ gida tu, na ɗa nyapare lɔr gugɨn ta bɔga.

³ Nyẽ lɔr ɗan ningag sɔɔ, ndad dɔ kumat kɨsɔɔ. Ningag joo i kadt ko kɨɗa, na ningag joo i kadt ko mad tɔ.

⁴ Tɔsɨ kag akasia, ut gid'd kɨ lɔr.

⁵ La kag kɨ ngal kam ningagt'n non kad ton sund.

⁶ Un lɔr kɨjanjoi ɗan nyakutdɔ, ngala i metɨr kɨɗa kɨ nusɨ, tata i metɨr kɨɗa.

⁷ Ɗà serub joo kɨ lɔr, ɗad kɨ lɔr kɨ ndah dɔ taat kɨjoo.

⁸ Ɗà serub kɨɗa dɔ taat kɨkɨɗa, kɨ serub kɨmad dɔ taat kɨmad. Un gaj lɔr kɨɗa ɗan nyakutdɔ kɨ serubg dɔ taat kɨjoo kad i ro kɨɗa.

⁹ Kerubg'n non, bɔgd i kɨ sɨra kɨ dõ, utɨn dɔ nyakutdɔ'n non kɨ bɔgd, takumd sumba na sew, takumd i kɨ ga kɨ ber kɨdɔ nyakutdɔt.

Ɗan tabɨl

¹⁰ Betsalel ɗa tabɨl kɨ kag akasia, ngala i metɨr kɨɗa, tata i nusɨ metɨr, ngala kɨ dõ i metɨr kɨɗa.

¹¹ Ut dɔ kaga kɨ lɔr kɨ janjoi, ɗa lɔr nyapare gugɨn ta bɔga.

¹² Ɗà nyapare kadat tɔ, tata asɨ kɨ tat daji de. Ɗà taa kɨ lɔr nyapare gugɨn dɔa tɔ.

¹³ Ɗà ninga lɔrg sɔɔ kɨta tabɨl'n non, nda ningag dɔkumat kɨsɔɔ kad njaat kɨsɔɔ.

¹⁴ Ningag'n non in nderbe kɨ nyapare kada, kɨta lakag kɨngalg tit kɨta kunɨn tabɨl kɨ dõ.

¹⁵ Tɔsɨ kag akasia kɨngalg, ut gid'd kɨ lɔr, kɨta ton tabɨl.

¹⁶ Un lɔr kɨjanjoi ɗan nyaɗakɨlag dɔ tabɨlt, ad i tasag kɨ ngan baig kɨ galg kɨ kopg kɨta kadkari nyakãi kɨ kũ kɔ.

Ɗan lamba

¹⁷ Betsalel ɗa kag lambag kɨ lɔr kɨjanjoi. Ɗà lambag'n non kɨ lɔr kɨ nda, girra kɨ kaga kɨ baiag kɨ dɔgorag kɨ hutag tube, ĩn kɨkɨɗa.

¹⁸ Dɔjig kɨbojidet teen kad kag lambagt, dɔj mɨta teen kadat kɨkɨɗa, na dɔj mɨta teen kadat kɨmad tɔ.

¹⁹ Kam dɔjt kɨkɨɗa ɗa ngan baig mɨta tit hut amand be, dɔgor kɨɗa ta hut't kɨkɨɗa. Kam dɔjt kɨmad ɗa ngan baig mɨta tit hut amand be, dɔgor kɨɗa ta hut't kɨkɨɗa. Ɗà titbe kɨ dɔj kɨbojidet 'nten kad kag lambagt'n non.

²⁰ Kam kag lambagt'n non ɗa ngan baig sɔɔ tit hut amand be nat kɨ dɔgorag kɨ hutag.

²¹ Dɔgor kɨɗa i girr dɔjt kɨjoo, i ro kɨɗa, na dɔgor kɨɗa i girr dɔjt kɨjoo, i ro kɨɗa, kamla dɔgor kɨɗa i girr dɔjt kɨjoo, i ro kɨɗa tɔ. Dɔjig kɨbojidet 'nten kad kag lambat ĩn titbe tɔ.

²² Dɔgorag kɨ dɔjiag'n non kɨ kag lamba tu i ro kɨɗa, i lɔr kɨjanjoi kɨndah dɔa kɨtaagbe.

²³ Ɗà bai lambag loa tanãimɨta, kɨ nya tɔl horrag, kɨjoo buhoorag, kɨ lɔr kɨjanjoi.

²⁴ Un nar lɔr kɨjanjoi kɨɗa ɗan kag lambag kɨ nyaɗakɨlaag tu.

Dɨngɨr mbikam kɨkootmbĩ

²⁵ Ɗà dɨngɨr mad kɨta lahor nduj mbikam kɨ kag akasia. Ngala i metɨr kɨɗa, tata i nusɨ metɨr, ngala kɨ tata asɨn na, ngala kɨ dõ i metɨr kɨɗa joo. Gaj dɨngɨr'n non i ro kɨɗa sia.

²⁶ Ut dɔ kaga kɨ lɔr kɨjanjoi ad i dɔa kɨ kada, gug dɔa kɨ gaja kamla ɗa lɔr nyapare gugɨn dɔ bɔga.

²⁷ Ɗà ninga lɔrg joo girr nyaparet'n non bɔg kadat kɨjoo, ɗad kadat kɨjoo kɨta la kag kɨngalg kamt kɨta kunɨn.

²⁸ Tɔsɨ kag akasia kɨ ngal joo ut gid'd kɨ lɔr.

Ɗan yib dɔt kɨ mbikam kɨkootmbĩ

²⁹ Ɗà yib kurdɔt kɨjaɓat. Ɔi nõkagg kɨkootmbĩ ɗan mbikam kɨjanjoi kɨ bur nat kɨgo goosɨ ngeɗaa.