Teekɨtɨga 35 - Maktub Ta Kumkajir

Ta lo ngomgo ndɔ kɨkõtanãimɨta

¹ Moij kun Israelag ngékawna tube kɨnat, eld an: Nyag 'nten la Bɨraɓe ndasɨ mbera kad i ɗan:

² A i ɗan kɨla ndɔ kɨbojidet, na ndɔ kɨkõtanãimɨta a i ndɔ kɨjaɓat kɨtɔsɨ ad i ndɔ taakò kɨ nda kɔtko kɨɗa kɨta Bɨraɓe. De'n a ɗa kɨla ndɔt'n non a ne, a tɔlɨna kɔ.

³ A i ɗan horr kam londɨsɨt mad ndɔ taakòt al.

Israelag ɗen kɨ kadkari adɨn Bɨraɓe kɨta ɗa kuj ndub Luwah

⁴ Moij elta Israelag ngékawna tube an: Tag'n Bɨraɓe nda mbera la teen:

⁵ Ɔin nyag kam nyagt losɨ adɨn Bɨraɓe kadkarit. De'n kama ndig a ne, kɨ ɗe kɨ kadkari ad Bɨraɓe: Lɔr kɨ larjã kɨ ningakasɨ

⁶ kɨ kɨla kub kɨkil musɨmusɨ kɨ kɨkɨre wor wor kɨ kɨkɨre pirɨr, kɨ lẽ kɨ sɔl lom lom kɨɓew, kɨ bĩ bĩã,

⁷ kɨ ndar bal batg kɨnda kɔl, kɨ ndar hangg kɨ kam mant, kɨ kag akasia,

⁸ kɨ yib kɨta lambag, kɨ nõkagg kɨta ɗago yib kurdɔt, kɨ kɨta nduj mbikam kɨkootmbĩ,

⁹ kɨ medkɔsɨ oniksg, kɨ medkɔsɨg kɨ gatd i ngãi kɨta nda kam epodt kɨ kam yakutdɔ gut tɔ.

Nyag kɨdandang kɨta kujkub londɨ

¹⁰ Kɨ dekɨdɨngãg tube kɨ ngeterrkam ɗe ɗan nyag tube'n Bɨraɓe nda mbera,

¹¹ ad i kujkub londɨ kɨ kubkut kada, kɨ kubkutdɔa, kɨ ningag loa, kɨ barkagg loa, kɨ kag kɨngalg loa, kɨ pilieg loa kɨ nyahɔdg,

¹² kɨ sund kɨ kag kɨngalg loa kɨ nyakutdɔa, kɨ kubganglo,

¹³ kɨ tabɨl kɨ kag kɨngalg loa kɨ nyaɗakɨlaa tube kɨ kuɓɨr bɨna kɨnda nõt,

¹⁴ kɨ kag nda lambag to kɨta kunj kɨ nyaɗa kɨlaag, kɨ bai lambag loa kɨ yiba,

¹⁵ kɨ dɨngɨr mbikam kɨ kag kɨngalg loa, kɨ yib kurdɔt, kɨ nduj mbikam kɨkootmbĩ, kɨ kubkut tabit kand kam kujkub londɨt,

¹⁶ kɨ dɨngɨr kadkari kɨlahorrt, kɨ nya la yalhorr loa kɨ ningakasɨ, Kɨ kag kɨngalg loa kɨ nyaɗakɨlaa tube, kɨ bai girr kutg.

¹⁷ Kɨ pal kubg kɨta natlo, kɨ kagndog loa kɨ nyahɔdg, kɨ kubkut lo kand natlot,

¹⁸ kɨ kagg kɨta dɔ kɨla hɔ pilie kujkub londɨ, kɨ kagg kɨta dɔ kɨla hɔ kagndog lo natlo lo kɨllag

¹⁹ kɨ kubg kɨ joo'n majmaj kɨta ɗa kɨlaɓer kam lot kɨjaɓat ad i kubg kɨjaɓat kɨta Aarõ ngejanyamosɨkadkari, kɨ kubg kɨta ngana kɨta ɗan ne kɨlaɓer kam kɨla jamosɨkadkarit.

Deg ɗen kɨ kadkari adɨn Bɨraɓe

²⁰ Israelag ngékawna tube ɓain ro Moijt teen tɨga.

²¹ Deg tube'n geen, kɨ deg tube'n kamd ndig ɗen kɨ kadkari adɨn Bɨraɓe kɨta kɨla kujkub ndɔdna kɨ Luwah kɨta kɨlaɓer loa tube, kɨ kɨta kubg kɨjaɓat.

²² Deg ɗen, kɨdɨngãg kɨ kɨdẽg, ĩgɨn kamd ndig tube, ɗen kɨ ningag kɨ ninga mbig kɨ ninga kɔsɨdɔnyag, kɨ ninga jig, kɨ nya lɔrg kɨ dang dang, dekɨɗen la kadkari lɔr lon kɨ nda kɔtko kɨɗa ad Bɨraɓe.

²³ Deg tube'n ndɨn kɨ kɨla kub kɨkil musɨmusɨ, kɨ kɨkɨre wor wor kɨ kɨkɨre pirɨr, kɨ lẽ kɨ sɔl lom lom kɨɓew, kɨ bĩ bĩã, kɨ ndar bal batg kɨnda kɔl, kɨ ndar hangg kɨ kam mant ɗen ne.

²⁴ Deg tube ndig lan kadkari larjã kɨ ningakasɨ, unɨn kadkari lod ɗen ne adɨn Bɨraɓe. Tubeg'n awɨn kɨ kag akasia kɨ asɨ ɗan nya mad kɨta kɨla'n non ɗen ne.

²⁵ Dekɨdẽ ngéterrkamg tube ɓewɨn kɨla kub kɨ jid kamla ɔin kɨla kubg kɨ ɓewɨn non ɗen ne, ad i kɨla kub kɨkil musɨmusɨ kɨ kɨkɨre wor wor kɨ kɨkɨre pirɨr, kɨ lẽ kɨ sɔl lom lom.

²⁶ Dekɨdẽg tube'n kamd ge na ĩn kɨ goosɨ ye, ɓewɨn bĩ bĩãg.

²⁷ Mbaiɓeg ɗen kɨ medkɔsɨ oniksg kɨ medkɔsɨg kɨta nda kam epodt, kɨ kɨta yakutdɔ gu

²⁸ kɨ nõkagg kɨkootmbĩ, kɨ yib kɨta lamba kɨ kɨta yib kurdɔt kɨ kɨta nduj mbikam kɨkootmbĩ.

²⁹ Israelag tube, kɨdɨngãg kɨ kɨdẽg'n kamd ndig kad ɗen kɨ nyag kɨta kɨla tube'n Bɨraɓe ndad mbera kɨtakul Moij kad ɗan ye, ɗen kɨ kadkari kamndig adɨn Bɨraɓe.

Bɨraɓe kun Betsalel kɨ Oholiab kad ɗan kuj

³⁰ Moij el Israelag an: Oon Bɨraɓe kun Betsalel, ngon Uri kɨdɨngã ngon Hur ko girr Judat, kɨ tɔa,

³¹ na ɗoosa kɨ Ndil Luwah kɨ terr kɨ terrkam kɨ nyager kɨ goosɨ ɗa kɨla tube,

³² kɨtakad ɗan kɨla kɨ dang dang ad i kɨla lɔr kɨ kɨla Larjã kɨ kɨla ningakasɨ,

³³ kad tɔsɨn medkɔsɨg kɨta ndad kam nyahɔdt, kad tɔsɨn kag, na kad ɗan kɨlag tube.

³⁴ Luwah nda kamat kad ndoo deg nat kɨ Oholiab, ngon Ahisamak ko girr Dant.

³⁵ Luwah ɗoosɨd kɨ terrkam kad ɗan kɨla tube, ad i kɨlag tɔsɨ mbal kɨ goosɨ ɗa kɨla kɨ dang dang, kɨ kurnya, kɨ jo kub kɨ kɨla kɨkil musɨmusɨ kɨ kɨkɨre wor wor kɨ kɨkɨre pirɨr kɨ lẽ kɨ sɔl lom lom, kɨtakad gerɨn go ɗa kɨla kɨ dang dang, kad ĩn ngegoosɨ kɨla tɔ.