Teekɨtɨga 33 - Maktub Ta Kumkajir

Bɨraɓe mbet kaw sed

¹ Bɨraɓe el Moij an: Aw, i ɓai nẽ be ĩn kɨ deg'n i tee sed kam dɔning Ejipt't kɨtɨga, aw sed kam dɔningt'n m'unɨn kɔm kɨ yokɨnda mad Abraham kɨ Isaak kɨ Jakob m'an: M'a mad kohsɨ dɔning'n non.

² M'a m'la malaika nõit, m'a m'tuɓa Kanag kɨ Amoriag kɨ Hetiag kɨ Perejiag kɨ Hebiag kɨ Jebusiag.

³ I ɓai aw kam dɔningt'n mba kɨ tej ãint tit bah be M'a m'aw sesɨ al, na ɓeta m'a nujsɨ kɔ dɔ ɗobt kɨta ĩn deg kɨ ngéngɨra kɨ gosɨ.

⁴ Lon deg oon hoita kɨmajal'n non ye, hɔn ndo, de mad kɨ la nyaparero ront goto.

⁵ Kɨtɔ Bɨraɓe el Moij kete an: El Israelag titbe, ĩn deg kɨ ngégɨrra kɨ gosɨ. Ĩla m'a m'aw sesɨ dãsɨt kaglo tẽbe a ne, m'a m'nujsɨ kɔ. Kɨtɔ teen tajigla, ɔrrɨn nyaparero rosɨt kɔ na m'a m'oo nya'n m'a m'ɗa sesɨ.

⁶ Nõbe kad mbalbo Horebt Israelag ngĩn nyaparero rodt.

Kujkub ndɔdna kɨ Luwah

⁷ Moij a un kujkub, na tɨlaa ta nat tɨga gid lo hɔlondɨt kɨɗen kɨ a teent, sãi kɨ lo hɔlondɨ, na ndah tɔa kujkub ndɔdna kɨ Luwah. Kamla ĩgɨn a sahn Bɨraɓe a ne, a tee awɨn ta kujkub ndɔdnat kɨ Luwah tɨga gid lo hɔlondɨ.

⁸ Lon Moij a tee kad kɨ n'aw kam kujkubt ye, deg tube a ɓain, na dekɨɗen a ɗa ta kujkubt lon, a oo go Moij mbã kad andɨn kam kujkubt.

⁹ Lon Moij a and kam kujkubt ye, pilie kilndii a ɗisɨ, a ɗa ta kujkubt, na Bɨraɓe a elta kɨ Moij.

¹⁰ Deg tube a oon pilie kilndii kɨ ɗa ta kujkubt, na deg tube a ɓain dõ, a ɔsɨn dɔd ber, dekɨɗen ta kujkubt lon.

¹¹ Bɨraɓe a elta Moij takumat, tit'n de a elɨn ta kɨ namɨn be. Kamla Moij a tel kɨ kam lo hɔlondɨt gog, na ɓer loa kɨbasa Jojue ngon Nun a tee kam kujkubt kɨtɨga al.

Moij kɔ Bɨraɓe kamla Bɨraɓe ndia sed tit kɨkete be

¹² Moij el Bɨraɓe an: Oo elɨm an: Ɔrr deg'n ɗan ta ɗob aw sed, na adɨm m'ger ĩn a i laa nat sem al, na ĩ el an: I gerɨm kɨ tɔm, m'ngaa maj takumit tɔ.

¹³ Kɨtɔ 'nten tajigla, m'kɔi, ĩla m'ngaa maj takumit a ne, kɨ adɨm m'ger goɗobg loi kɨtakad m'geri, na kɨ m'ngaa maj takumit. Oo kad deg'n ɗan ĩn deg loi.

¹⁴ Bɨraɓe el an: Mĩ kɨdɔm, m'a m'aw nat sei, na m'a mad i taakò.

¹⁵ Moij ela an: Ĩla ĩ kɨdɔi a aw sem al a ne, ot kad kɨ ɓai nẽ be

¹⁶ Titbãi a gerɨn ne kad m'ngaa maj takumit, mĩ kɨ deg loi a? A i kɨtakul kawi nat sed. Kɨtɔ 'nten la mĩ kɨ deg loi, jĩn tadang kɨ ndeg deg tube kɨ dɔningt.

¹⁷ Bɨraɓe el Moij an: M'a m'ɗa nyan el nõ tɔ, kɨta i ngah majkurr takum'mt, na m'geri kɨ tɔi.

¹⁸ Moij el an: M'kɔi kɨ ɔjɨm kunji kɨɗangeɗeng.

¹⁹ Bɨraɓe tur an: M'a mad maj lom tube tɔi nõit, m'a m'la mber tɔ Bɨraɓe nõit, m'a m'ookumtondo lo de'n m'ndig kookumtondo loa, na m'a m'ɔj kõkam de'n m'ndig koja kõkam.

²⁰ Bɨraɓe el an: Asɨ koo takum'm al kɨta de asɨ koom, na ndɨ kɨ dɔn dõ al.

²¹ Bɨraɓe el an: Oo lo mad i kadɨmt, a i ɗa dɔ mbalt,

²² na lon kunjɨm kɨɗangeɗeng a tɔi a ne, m'a m'ndai kam bulombalt mad, m'a m'ut dɔi kɨ jim mbã kad m'tɔin.

²³ Kamla m'a m'ɔrr jim kɔ, a oo gidm, na a asɨ koo takum'm al. Moij tɔsɨ bar mbal joo tit kɨkete nõ kamla Bɨraɓe ndang tag lon dɔt gog.