Teekɨtɨga 3 - Maktub Ta Kumkajir

Luwah kun Moij

¹ Moij ndɨ ngom ɓut nyakulg lo mumɨn Jetro, ngejanyamosɨkadkari kɨ dɔning Madiãt. Moij aw kɨ ɓut nyakulg, tɔi sed kam dɨlalot mbã tee Horeb, mbalbo lo Luwah.

² Malaika lo Bɨraɓe tee hɔi kɨ roat kam ndõhorrt, duu ngart mad, Moij oo ngar'n non i horr tube, na horr õ ngar al.

³ Moij el an: M'a m'tɔ m'aw m'oo nyakoo kɨ yan non, ke titbãi horr õ ngar'n non al a?

⁴ Bɨraɓe oo kad Moij ndɨ tɔ aw kɨ n'oo. Luwah ko kuna du ngart'n non, an: Moij, Moij. Moij tur an: Mĩ ne.

⁵ Luwah el an: Ot ndɔt kɨ nẽ be, i ɔrr sa njait kɔ kɨta lon i duba i ɗat ye, i ning kɨjaɓat.

⁶ El tɔ an: Mĩ Luwah lo bɔwi, Luwah lo Abraham, Luwah lo Isaak, Luwah lo Jakob. Moij ya takumɨn kɨta ɓool koo Luwah kɨ kumɨn.

⁷ Bɨraɓe el an: Rota m'oo daiyog lo girrdeg lom kam dɔning Ejipt't, m'oo ko lod'n kon kɨ dɔ bɨradɔdgt, m'ger kõ lod.

⁸ M'ɗisɨ kɨta tee sed kɔ ji Ejiptiagt, kad m'ɓai sed dɔningt 'nten kɔ kad m'aw sed dɔningt mad kɨmaj kɨ tat ngãi, ad i dɔning'n mba kɨ tej ãint tit bah be kam logt'n Kananag kɨ Hetiag kɨ Amoriag kɨ Perejiag kɨ Hebiag kɨ Jebusiag ndɨnt.

⁹ Oo ndɨ ko lo Israelag tee romt, na m'oo dakum ndo'n Ejiptiag dan kumd ndo tɔ.

¹⁰ Tajigla aw, m'a m'lai ro Paraõt kad i tee kɨ girrdeg lom Israelag kɔ kam dɔning Ejipt't.

Luwah tee kɨ tɔn ad Moij oo

¹¹ Moij el Luwah an: Mĩ nõ kad m'aw ro Paraõt, m'tee kɨ Israelag kɔ kam dɔning Ejipt't a?

¹² Luwah el an: Rota m'a mĩ nat sei. 'Nten la i najkɨma roit kad i ger mĩ la m'lai ye: Lon a i tee kɨ girrdeg'n non kam dɔning Ejipt't kɔ a ne, a i ɗan kɨlaɓer adɨn Luwah dɔ mbalbot'n ɗan.

Luwah da tɔn Moij

¹³ Moij el Luwah an: Lon m'a m'tee ro Israelagt ye, m'a m'eld m'an: Luwah lo bɔwsɨg la lam kɨ rosɨt, ĩn tɔ a ndɨjemɨn, ke tɔa i nõ a? Ye m'a m'turd m'an ɗi a?

¹⁴ Luwah el Moij an: Mĩ la i mĩ. El dɔt an: Titbe la a elɨn Israelag, ĩn hã tɔa i mĩ lam kɨ rosɨt.

¹⁵ Luwah el Moij gog tɔ an: Titbe la a i el Israelag; Bɨraɓe Luwah lo bɔwsɨg, Luwah lo Abraham, Luwah lo Isaak, Luwah lo Jakob lam kɨ rosɨt. 'Nten la i tɔm mbãkɨnõt, kɨ tɔm 'nten a i gaan ne dɔmt kɨ ngakat kɨ ngaka.

¹⁶ Aw, i kaw kɨbog lo Israel kɨnat, eld an: Bɨraɓe Luwah lo bɔwsɨg, Luwah lo Abraham kɨ Isaak kɨ Jakob tee hɔi kɨromt, an: Rota m'ɗe rosɨt, m'oo nya'n deg ɗan sesɨ dɔning Ejipt.

¹⁷ M'el m'an m'a m'ɔrrsɨ kam daiyot kɨ dɔning Ejipt't kɔ. M'a m'aw sesɨ dɔningt lo Kanag kɨ Hetiag kɨ Amoriag kɨ Perejiag kɨ Hebiag kɨ Jebusiag, kam dɔningt'n mba kɨ tej ãint tit bah be.

¹⁸ A oon dɔ ndii, ĩ kɨ kɨbog lo Israel a awɨn ro ngart kɨ Ejipt, a elɨna anan: Bɨraɓe Luwah lo Hebreg ndɔdj. Kɨ kɔi kɨ i nyàj ad j'aw kɨ ndia ndɔ mɨta kam dɨlalot kɨtakad kɨ ja mosɨ kadkarig jad Bɨraɓe Luwah loj.

¹⁹ M'ger kad ngar kɨ Ejipt't a nyasɨ ad awɨn al, ke kɨ lo ngetɔgt.

²⁰ M'a m'la jim, m'ndan Ejipt kɨ nyag kɨyaya lom tube'n m'a m'ɗa dandt. Go nyagt'n non a nyasɨ ad awɨn.

²¹ M'a mad deg'n non ngahn maj takum Ejiptiagt. A i titbe: Lon a i awɨn, a awɨn jisɨ kari al.

²² Ke dekɨdẽ kɨɗen a ndɨje madɓen, ke mbah kɨ ndɨ kam kujt lon nya larjã kɨ nya lɔrg kɨ kubg, a i lan ro ngansɨgt kɨdɨngã kɨ kɨdẽ, titbe a i taan ne nyag lo Ejiptiag.