Teekɨtɨga 2 - Maktub Ta Kumkajir

Kooj Moij

¹ De mad kɨ girr Lebi taa ngon Lebi mad kɨdẽ nẽnt.

² Dekɨdẽ'n non nden ngon, ooj kɨdɨngã. Ooa i ngon kɨ roa maj ye, ya dɔa nah mɨta.

³ Lon dum kad ya dɔa ye, un jàng mad, tĩya kama kɨ nyatĩya nya ho kɨ gudrõ ho, la ngon kamt, ndaan dan wayabgt kad baht.

⁴ Ngonkõa kɨdẽ duba ɗa sãi kɨtakad n'oo ger nya'n a ɗa nya.

⁵ Ngon Paraõ kɨdẽ aw ta baht kɨta ndoog man. Mand madag ndian kad baht. Oo jàng dan wayabgt, la ɓer lon kɨdẽ kad un.

⁶ Tee ta jàng na oo ngon. I ngon kɨdɨngã, to nõ. Ta õ kama kɨtaa, ad el an: 'Nten i ngon Hebre mad.

⁷ Kamla ngonkõa kɨdẽ el ngon Paraõ kɨdẽ an: I ndig kad m'aw m'kun kondo mad ku dekɨdẽ Hebregt, kɨtakad mba ngon 'nten a?

⁸ Ngon Paraõ kɨdẽ ela an: Aw Ngon kɨdẽ aw kun kõ ngon.

⁹ Ngon Paraõ kɨdẽ ela an: Un ngon 'nten aw sia, i tɔa adɨm Mĩ tɔ m'a m'adi nar bajii. Dekɨdẽ un ngon, tɔa.

¹⁰ Lon ngon tɔg ye, aw sia ro ngon Paraõt kɨdẽ, ad tel ngona. Nda tɔa Moij, el an: Kɨtɔ m'ɔrra kam mant.

Moij ãi kɨ dɔning Madiãt

¹¹ Lon Moij tɔg gang ye, ndɔ mad tee aw ro ngankõngt oo kɨlag lod kɨkõkõ, na oo Ejiptia mad ɗa nda Hebre mad kɨɗa ku ngankõngt.

¹² Nɔl lo ko nu kɨ ko nẽ. Lon oo de mad al ye, tɔl Ejiptia'n non, na yaro nina kam gart.

¹³ Loti got tee, na oo Hebreg joo ɗa ɗɔɔn na. El de'n ɗagootal nõ an: Kɨtɔɗi i ndan nami a?

¹⁴ De'n non tur an: Nõ ndai ngekõɓe kɨ ngegangta dɔjt a? Oo an a i tɔlɨm tit'n i tɔlɨn Ejiptia'n non a? Ɓool ɗa Moij ad el kamɨnt an: Rota nya'n non i kɨ ger oi.

¹⁵ Lon Paraõ oo hoi nya'n non ye, sah kɨ n'tɔl Moij. Na Moij ãi kɔ takum Paraõt, aw ndɨ dɔning Madiãt, ndɨ ber ta bulomant mad.

¹⁶ Ngejamosɨ kadkari kɨ dɔning Madiãt aw kɨ nganɨn kɨdẽ tanãimɨta. Ɗen kɨta kɔd man, ad man ɗoosɨ nyakãi man kɨtakad nyakulg lo bɔwd ãin.

¹⁷ Ngékulbatg ɗe tuɓand kɔ, kamla Moij ɓai dõ ɗa sed, ad man ɓut nyakulg lod ãin.

¹⁸ Lon tel ɗen kɨ ro bɔwd Rewelt, bɔwd ndɨjed an: Ɗi ɗa nya ad i telɨn ne kanangbe ɓone a?

¹⁹ Turɨn anan: Ejiptia mad aj'j ji ngékulbatgt, mbã ɔd man kɨtatɔj, ad man ɓut nyakulg ãin.

²⁰ Ndɨje nganɨn kɨdẽ an: I ɗah a? Kɨtɔɗi i nyan ne de'n non gog a? I kunɨna ad sanya.

²¹ Kam Moij ndig ndɨ kɨ de'n non, ĩ tɔ ada ngonɨn kɨdẽ Sepora nẽat.

²² Ooj ngon kɨdɨngã, Moij ndah tɔa Gersom kɨta el an: Mĩ ngehɔlondɨ kam dɔning mbaht.

Luwah kɔt Moij kad tee kɨ girrdeg lon kam ɓe ɓert

²³ Lon kaglo tɔi ngãibe ye, ngar kɨ Ejipt't oi. Israelag tõn ɗusɨɗusɨ girr kɨlaɓert kɨkõ ad kon. Ko lod girr kɨlaɓert kɨkõ aw mbã kɨ dõ, tee ro Luwaht.

²⁴ Luwah oo dɔ tõ ɗusɨɗusɨ lod ad kama gah dɔ kunkɔt lon'n un ad Abraham kɨ Isaak kɨ Jakob.

²⁵ Luwah nda kumɨn dɔ Israelagt ad ta õ kama.