Teekɨtɨga 12 - Maktub Ta Kumkajir

Pakɨ lo Bɨraɓe

¹ Bɨraɓe el Moij kɨ Aarõ kam dɔning Ejipt't an:

² Nah 'nten a i nah kɨdasa bang ku nahgt kɨtɔsɨ, a i nah kɨdasa bang lo ɓal kɨtɔsɨ.

³ El Israelag ngékawna tube an: Ndɔ kɨkõkɨlah lo nah'n ɗan a unɨn kõ bat kɨ girrkooj kɨɗen, kõ bat kɨɗa kɨta ngékɨɓe lo dekɨɗen.

⁴ Ĩla kɔr ngékɨɓe lo de mad asɨ kõ bat kɨɗa al, kamla de'n non kɨ madɓen kɨ nderbe a unɨn kõ bat kɨɗa kɨgo kɔr degt. A i tɨdan deg kɨgo sa kõ bat'tn dekɨɗen a sa.

⁵ Ngon bat losɨ a i kɨkanj nya mad ɗaa, kɨdɨngã kɨ ɓal kɨɗa. A i hɔna ku batgt ke ku bĩãgt.

⁶ A i ngomɨna mbã ndɔ kɨkõkɨlah gidaisɔɔ lo nah'n ɗan. Israelag ngékawna tube a tɔlɨn batg lod dɔj losɔlt.

⁷ A unɨn mosɨd, a ɔdɨn ne kag ta kujt kɨjoo, kɨ kag kɨ dosɨt dõ ta kujt, ad i kuj kɨ a san dã ngan batg'n non tit.

⁸ Ndɔt'n non ndɔ a san dã ngan batg kɨ tɨnga horro, a san nat kɨ kuɓɨr bɨna kɨkanj berrkasɨ kɨ mbikamg kɨ at.

⁹ A i san kari al, a i ndirrɨn kam mant al tɔ, na a i tɨngan horro ta tɨnga kɨ dɔa kɨ njaa kɨ nyag kɨ kamat.

¹⁰ A i nyan ndega mbã loti dɔt al, na ĩla ndega a nãi mbã loti a ne, a i lan horr dɔt.

¹¹ Lon a i sana a ne, a i dɔn ɓɔsɨ, a i lan sag njasɨt, a i hɔn kag tɔsɨ jisɨt, a i san kɨdõt. I Pakɨ lo Bɨraɓe.

¹² Kɨtɔ ndɔt'n non ndɔ m'a m'tɔi kam dɔning Ejipt't. M'a m'tɔl nganderg tube kɨ kam dɔning Ejipt, deg ho dãg ho tu, m'a m'tɔl kõ takɨgangg lom kɨdɔ luwahgt kɨ Ejipt tube, mĩ la mĩ Bɨraɓe ye.

¹³ Mosɨ a i nyamanaj kɨtɔsɨ kɨdɔ kujgt'n i ndɨnt. Lon m'a m'oo mosɨ a ne, m'a m'tɔi dɔsɨt dõ, yokoosɨ mad kɨkad nujsɨ kɔ goto, lon m'a m'ndan dɔning Ejipt.

¹⁴ Ndɔ'n non a i ndɔ ga kam dɔt kɨtɔsɨ, a i ngomɨna kad i nah lo Bɨraɓe ngakat kɨ ngaka, ĩn tube a i ngomɨna mberkɨndat mbãkɨnõt.

Ɗà nah kuɓɨr bɨna kɨkanj berrkasɨ

¹⁵ Ndɔ tanãimɨta a i san kuɓɨr bɨna kɨkanj berrkasɨ. Ndɔ kɨdasa bang a ɔrrɨn berrkasɨ kam kujgt losɨ tube kɔ, kɨta dekɨɗen'n a sa kuɓɨr bɨna kɨ ɗa kɨ berrkasɨ ndɔt kɨdasa mbã ndɔt kɨkõtanãimɨta a ne, a goto kɔ kam Israelt.

¹⁶ Ndɔ kɨdasa a i kaw na kɨjaɓat, ndɔ kɨkõtanãimɨta a i kawɨn na kɨjaɓat tɔ. A ɗan kɨla mad kam ndɔgt'n non al, na koo go nyasa lo dekɨɗen tã.

¹⁷ A i ngomɨn go nah kuɓɨr bɨna kɨkanj berrkasɨ, kɨta kam ndɔt'n non bang la m'tee kɨ bahkad koosɨg losɨ kɔ dɔning Ejipt't. Kɨtɔ 'nten a i ngomɨn go ndɔ'n non ngakat kɨ ngaka kɨgo mberkɨndat mbãkɨnõt.

¹⁸ Kam naht kɨdasa, kɨ ndɔ kɨkõkɨlah gidaisɔɔ lo nah'n non lokɨsɔle a i san kuɓɨr bɨna kɨkanj berrkasɨ mbã ndɔ kɨkõdɔjoo gidaikɨɗa lo nah'n non lokɨsɔle.

¹⁹ Ndɔ tanãimɨta, a ngahn berrkasɨ kam kujgt losɨ al, na de'n a sanya mad kɨ berrkasɨ i kamt a ne, a goto kɔ dan ngékawnat lo Israelagt, ke mbah, ke de kɨ kooj ɓe.

²⁰ Nya'n berrkasɨ i tit a i san al. Kam kujgt losɨ tube a i san kuɓɨr bɨna kɨkanj berrkasɨ.

Ɗago nyasa kɨta ɗa nah Pakɨ

²¹ Kamla Moij ad kunɨn kɨbog lo Israel tube kɨ ront, eld an: Aw i kɔtɨn ngan batg kɨgo kɔr degt kɨ ɓe losɨ, i jan kɔd Pakɨt

²² Goot gog a unɨn dɔj kag hisop, a i lan taa kam mosɨt kɨ kam tasat, a ɔdɨn kag ta kujt kɨ dõ kɨ kag ta kuj kɨjoo kɨ mosɨ kɨ kam tasat. De kɨɗa kɨ a tee kam kujt lon kɨtɨga kete nõ lokɨtit goto.

²³ Kɨtɔ Bɨraɓe a tɔi kad tɔl Ejiptiag, na lon a oo mosɨ dɔ kag lẽto ta kujt kɨ dõ kɨ dɔ kag ta kujt kɨjoo a ne, Bɨraɓe a tɔi dõ ta kujt, a nya ngenuj deg ad and kujgt losɨ kad tɔlsɨ al.

²⁴ A i ngomɨn go nya 'nten kad i mberkɨnda kɨtɔsɨ kɨ ngansɨg mbãkɨnõt.

²⁵ Lon a i teen dɔningt'n Bɨraɓe a adsɨ kɨgo kunkɔt lon, a i ngomɨn go kɨlaɓer 'nten nyabelɓet.

²⁶ Lon ngansɨg a ndɨjesɨn anan: Nyabelɓe 'nten girra i ɗi a?

²⁷ A i turɨn anan: I kadkari Pakɨ kɨjakɔ lo Bɨraɓe, ĩn tɔi dõ dɔ kujgt lo Israelag kam dɔning Ejipt lon tɔlɨn Ejiptiag, na ajɨn ngékɨɓe loj. Kamla deg ndɨn kɨ gojd ɔsɨn dɔd ningt.

²⁸ Israelag awɨn, ɗan Bɨraɓe ndan mbera Moij kɨ Aarõ, ɗan titbe.

Nganderg kɨ dɔning Ejipt oin

²⁹ Danlot ndɔ Bɨraɓe tɔl nganderg kam dɔning Ejipt tube, mba girra dɔ ngonderr Paraõt'n ɓet a ndɨ dɔ pong kõɓet loa mbã kɨ dɔ ngonderr de dangait kɨ dɔ ngander nyakulgt tube.

³⁰ Paraõ ɓai ndɔ, ĩ kɨ ɓerg lon kɨ Ejiptiag tube. Nõ kɨ kɨ na mbĩ i kam dɔning Ejipt't, kuj mad kɨ de oi tit al, goto.

³¹ Paraõ ad kunɨn Moij kɨ Aarõ nõ, eld an: I ɓain, i teen kɔ ku degt lom, ĩn kɨ Israelag, aw i ɗan kɨlaɓer adɨn Bɨraɓe tit'n elɨn ne nõ

³² A ɔin ɓut batg losɨ kɨ ɓut mangg losɨ tit'n i elɨn ne nõ, awɨn, na i njangɨn dɔm tɔ

³³ Ejiptiag ɔsɨn deg kad tuɓan Israelag kɔ dɔningt kanangbe, kɨta elɨn anan: Titbe al a ne, j'a j'oi tube.

³⁴ Deg unɨn nduj lod kɨ lɔi na ɓai al ɓaitɔ, dɔn nduj kɨ lɔi kam kubgt lod ndan bɔgdt.

³⁵ Israelag ɗan tit'n Moij eldɨn kete, ad ndɨjen Ejiptiag nya larjãg kɨ nya lɔrg kɨ kubg.

³⁶ Bɨraɓe ad deg ngahn maj takum Ejiptiagt, ĩn tɔ adɨnd nyag'n ndɨjen. Titbe la Israelag taan ne nyag lo Ejiptiag ye.

Israelag teen dɔning Ejipt kɨtɨga

³⁷ Israelag ɓain ɓebo Ramsest awɨn Sukot't. Dekɨdɨngãg ngenda kɨ njad asɨn dub ɓukɨbojidet kɨkanj tɨda dekɨdẽg kɨ ngang kɨ bɨgag.

³⁸ Bahkad Koosɨdeg kɨ girrd i dang dang ɓai awɨn nat sed tɔ, kɨ ɓut batg kɨ ɓut mangg, ad i nyakulg kɨngãi.

³⁹ Ɗan nyasa kɨkanj berrkasɨ kɨ nduj kɨ lɔi'n ɗen ne ko dɔning Ejipt't, kɨta nduj kɨ lɔi'n non ɓai al ɓaitɔ kɨta i kɨkanj berrkasɨ, kɨta tuɓand dɔning Ejipt't kɔ, asɨ ndɨ kɔkɨ gog al, asɨ ɗan go nyasa kɨta ɗob al tɔ.

⁴⁰ Kaglo ndɨ Israelag mbah dɔning Ejipt i ɓal ɓusɔɔ kɨdɔmɨta.

⁴¹ Na dɔboi ɓal kɨ ɓusɔɔ kɨdɔmɨta, ndɔat nõ bang la, bahkad koosɨg lo Bɨraɓe tube teen kam dɔning Ejipt't kɨtɨga ye.

Go ɗob ɗa nah Pakɨ

⁴² Ndɔt'n Bɨraɓe ndɨ dɔgt kɨta tee kɨ Israelag kam dɔning Ejipt't kɨtɨga. Ndɔ'n non a i lo Bɨraɓe kad Israelag ngomɨn go kɨ ngakat kɨ ngaka.

Mberkɨnda kɨta ɗa nah Pakɨ

⁴³ Bɨraɓe el Moij kɨ Aarõ an: 'Nten la i mberkɨnda kɨta Pakɨ ye: Mbah mad kɨɗa kaa sa al.

⁴⁴ Ɓer kɨɗen kɨ ndugona kɨ nar, a i jaa gaj, kamla a sa ye.

⁴⁵ Dedɔɓe ke ngeɗakɨla nar a sa al.

⁴⁶ A i san kam kujt kɨkɨɗa tã, a unɨn nya mad kam dãt'n non teen ne kam kujt kɨtɨga al, a i tetɨn kɨngaa kɨɗa al tɔ

⁴⁷ Israelag ngékawna tube a ngomɨn go Pakɨ.

⁴⁸ Lon mbah mad ndɨ sei, na ndig ngomgo Pakɨ lo Bɨraɓe a ne, ad jan gaj dekɨdɨngãg kɨ ɓe loa tube, kamla kad kɨ ndɔt na kɨ ngomgo ye. A i tit kɨ de kɨ kooj ɓe be, na de kɨkanj jagaj kɨɗa kaa sa al.

⁴⁹ Mberkɨnda i kɨɗa kɨta de kɨ kooj ɓe, ke kɨta mbah kɨ nda ɓe dãsɨt.

⁵⁰ Israelag tube ɗan tit'n Bɨraɓe ndan mbera Moij kɨ Aarõ. Titbe la ɗan ne ye.

⁵¹ Ndɔt'n non bang la Bɨraɓe tee kɨ Israelag kam dɔning Ejipt't kɨtɨga kɨgo ɓut koosɨgt lod ye.