Teekɨtɨga 1 - Maktub Ta Kumkajir

Daiyog lo Israelg dɔning Ejipt't

¹ Tɔ ngan Israel'n awɨn dɔning Ejipt't nat kɨ bɔwd Jakob, tɔ dekɨɗen kɨ ngékɨɓe lon laten:

² Ruben kɨ Simeõ kɨ Lebi kɨ Juda

³ kɨ Isakar kɨ Jabulon kɨ Benjami

⁴ kɨ Dan kɨ Neptali kɨ Gad kɨ Ajer.

⁵ Ngan Jakob kɨ ngakaa tube kɔrd i dɔtanãimɨta. Jojep i dɔning Ejipt't kete oi.

⁶ Jojep kɨ ngankõn kɨdɨngã tube kɨ deg'n oojɨnd kaglot'n non tube oin.

⁷ Ngan Israelg oojɨn na ngãi, ĩn Koosɨdeg, bɨlan kɨdɔtdɔt, telɨn ngétɔg ngãi kɨ tɔi, ad dɔning'n non ɗoosɨ kɨ Israelag.

⁸ Ngar mad kɨkij ɓai õɓe dɔning Ejipt't, na ngar'n non ger Jojep al.

⁹ El deg lon an: Oon, Israelag, kɔrd i ngãi tɔi loj, tɔgd tɔij tɔ.

¹⁰ Ad j'aw kɨ ɗan sed kɨgo kumtɔgt, na ɓeta bɨlan kɨdɔtdɔt. Lon ɗɔɔ mad a ɓai a ne, a ndan rod nat kɨ madngétajg, a ɗɔɔn sej, na a teen dɔningt loj kɔ.

¹¹ Kɨtɔ 'nten ndan ne bɨradɔg lo kɨlaɓer dɔdt, kɨtakad dan rod ndo kɨ kɨlag kɨkõkõ. Titbe la ɗan ne ɓebog kɨ Piton kɨ Ramses kad ĩn ɓe mbõ nyag kɨnat kɨta Paraõ.

¹² Na ke dan kumd ndo kɨ dɔtdɔt kaa ne, ngan Israel'n bɨlan kɨdɔtdɔt, tĩn na kɨ log taan log tube. Ad kam Ejiptiag dad ta pa dɔ ngan Israelt.

¹³ Kɨtɔ 'nten adɨn Israelag ɗan kɨlaɓer kɨkõkõ.

¹⁴ Na deg kɨ Ejipt't adɨn ro Israel'ng tod ngãi, ndan kɨla kɨngang dɔdt ad ɗan kɨla ɓa bɔrr kɨ kɔrr brik kɨ kɨlaɓer kɨɗen kɨ kam ndɔɔt. Ndan kɨlag kɨkõkõ tube dɔdt kɨkanj kookumtondo.

Ngar Paraõ da kum ngan Israel'ng ndo

¹⁵ Ngar kɨ Ejipt't elta kɨ dekɨdẽ ngégoosɨ kooj ngang lo Hebreg, kɨkɨɗa tɔa i Sipra, kɨmad tɔa i Puwa.

¹⁶ Eld an: Lon i ndɨ ɗan kɨla kooj ngang lo dekɨdẽ Hebreg, na oond ndɨn dɔ komber kooj ngont ye, ĩla ooj kɨdɨngã a ne, i tɔlɨna kɔ, na ĩla a ooj kɨdẽ a ne, i nyana kumkajir.

¹⁷ Na dekɨdẽ ngégoosɨ kooj ngang'n non ɓoolɨn Luwah ad ɗan tit'n ngar kɨ Ejipt't ndan mbera al, ad nyan ngan kɨdɨngãg kumkajir.

¹⁸ Ngar kɨ Ejipt't ad kunɨn dekɨdẽ ngégoosɨ kooj ngang ndɨjed an: Kɨtɔɗi i ɗan ne nya 'nten, ad i nyan ngan kɨdɨngãg kumkajir a?

¹⁹ Dekɨdẽ ngégoosɨ kooj ngang turɨn Paraõ anan: Kɨtɔ dekɨdẽ Hebreg ɗa kɨ dekɨdẽ Ejiptiag al, ĩn dekɨdẽ kɨwasɨg, ad oojɨn ngang kete oi lon dekɨdẽ ngégoosɨ kooj ngang teen ne rodt al ɓaitɔ.

²⁰ Luwah ɗa maj kɨ dekɨdẽg ngégoosɨ kooj ngang'n non, ad deg bɨlan kɨdɔtdɔt, telɨn ngétɔg ngãi kɨ tɔi.

²¹ Kɨtɔ ɓoolɨn dekɨdẽg ngégoosɨ kooj ngang'n non ɓoolɨn Luwah ye, Luwah ad'd ngang tɔ.

²² Kamla Paraõ ndamber deg lon tube an: Ngon kɨdɨngã kɨɗen kɨ Hebreg oojɨna a ne, a i lana kɔ kam baht, na ngon kɨdẽ kɨɗen a i nyana kumkajir.