Soponi 3 - Maktub Ta Kumkajir

Takɨgang dɔ Jerusalemt

¹ Beto lo ɓebo kɨ ngetõɗɔɔ kɨ ngeyerr, ɓebo kɨ ngeɗa ngetɔg dɔ degt.

² Tel ron go tat al ho, taa ndakɔj al ho, ɓakul Bɨraɓe al ho, ndɔt kɨro Luwaht lon al tɔ.

³ Mbaiɓeg loa kɨ kamat ĩn tubog kɨ ngeko, ngégangtag loa ĩn bisɨkolog kɨ teen lokɨsɔle na nyan nya mad adɨn loti dɔt al.

⁴ Ngékelta kɨ ta Luwaht loa ĩn deg kɨ kɨlaɗad majal ngéɗanya kɨ la rosɔl dɔ kɨlat'n sumba kad ɗan, ngéjanyamosɨ loa yerrɨn kɨ lo kɨjaɓat, tɔin dɔ mberkɨnda.

⁵ Bɨraɓe, i kɨdene sew kamat, ɗa nya kɨgoot al nja kɨɗa al. Ndɔ kɨɗen kɨsĩ la gangta lon kɨtɨga bijalo kɨɗen nya ta al na de kɨdenesew al ta, roa a sɔla al.

⁶ M'nuj girrdeg, kel Bɨraɓe M'nuj kujngomdɔɓeg lod Ad telɨn gootɓe kɨ de gotot, Ɓebog lod ngendɨt goto tɔ.

⁷ Kamla m'el m'an: Rota, ĩla ɓebo ɓool ndilɨm Na telron go mberkɨndagt lom a ne, M'a m'nuj londɨ loa al na ndakɔjg tube'n m'ɔj kad m'ɗa sia ye a teen dɔat al Na deg ngendɨt a ɓain kɨsĩ ritit kad awɨn kɨ ketekete kam nyaɗadt kɨmajal.

Bɨraɓe tel kɨ ndeg Israelag kɨnãi

⁸ Kɨtɔ 'nten, i ngomɨn, kel Bɨraɓe, ndɔ'n m'a m'ɓai kɨta ta nyatetɗɔɔ kɨta kɔjtaɗam i kɨta kaw girrdeg kɨnat, kɨ kaw kõɓeg kɨnat kad m'ũ wong lom dɔdt, wong lom kɨtɨngabil tube kɨta horr wong lom a õ dɔning kɨtaagbe.

⁹ Kamla m'a mad takel deg tel kɨkarnyang kɨtakad tube a kon kɨdɔ tɔ Bɨraɓet na ɗan ɓer adɨna kɨ kam kɨkɨɗa.

¹⁰ Ko gid bahgt kɨ Etiopi nu ngekɔsɨ dɔd ber nomt, kɨ tĩn na, a ɗen kɨ kadkari admɨn.

¹¹ Ndɔt'n non, girrdeg lom Rosɔl a ɗai al kɨta kɨlaɗai kɨ majalg tube'n i ɗa ndoorɨm, M'a m'ɔrr Ĩgɨn ɗan dɔngang kɨ ronel kamit kɔ na a i ga buro dɔ mbalt lom kɨjaɓat gog al ta.

¹² M'a m'nya deg kɨtõ kɨ ngésɔldɔ kamit Ĩgɨn ɓan kul tɔ Bɨraɓe.

¹³ Ndeg deg'n nãin Israelt a ɗan majal al a elɨn takɨbal al, a unɨn ndõnd kɨta kelta kɨ lo goolt al ta. A san nya, a taan kò, na de mad i ngendad ɓoolt goto.

¹⁴ Ɔsɨ pa, ngon kɨdẽ kɨ Siõ i ko kɨ wi, Israel, i ɗa kamnda kɨ ronel kɨ kami kɨtaagbe, ngon kɨdẽ kɨ Jerusalem.

¹⁵ Bɨraɓe ɔrr takɨgang dɔit, tuɓa madngétai kɔ Ngar kɨ Israel, ad i Bɨraɓe, i dãsɨt, a i ɓool majal gog al ta.

¹⁶ Ndɔt'n non a elɨn Jerusalem anan: Ot ɓool ĩ Siõ, ad jii oi yelel al.

¹⁷ Bɨraɓe Luwah loi i nat sei i Ngetɔg, a aji, roa a nela sei kɨdumbit. A ad i ndɨ lom kam tart lon, a ɗa ronel dɔit kɨ pa kɨkɔsɨ.

¹⁸ Tit kɨ kam ndɔ ɗa nahgt Bɨraɓe el an: M'a m'ɔsɨ nya kɨmajal dɔit kɔ kad rosɔl so dɔit al.

¹⁹ Kaglot'n non m'a m'nda m'ɔj deg tube'n dan kumi ndo m'a maj mootg, ĩgɨn tuɓand kɔ ye, m'a m'kawd kɨnat. M'a mad tɔ deg lom ko kam dɔninggt tube, a ndubɨn tɔd kam logt'n kete rod sɔld tit.

²⁰ Kaglot'n non m'a m'tel sesɨ kɨɓe kaglot'n non m'a m'kawsɨ kɨnat. M'a m'adsɨ telɨn nyatɔko kɨ nya ndub ku girrdegt tube kɨdɔningt lon m'a m'ɔrrsɨ ɓeɓert. Lon m'a m'telɨn kɨdeg'n hɔnd ɓert kɨɓe takumsɨt, kel Bɨraɓe.