Soponi 2 - Maktub Ta Kumkajir

Kunɨn deg kɨ tɔrrɨn ndid

¹ I kawɨn na kɨnat, I nderɨn girr rosɨ ĩn girrdeg kɨkanj rosɔl

² kete lon mberkɨnda tee al ɓaitɔ, na ndɔ lo Bɨraɓe tɔi tit tisa al. Kete lon wong lo Bɨraɓe kɨtal sokɨr so dɔsɨt al ɓaitɔ, kete lon ndɔ wong lo Bɨraɓe hursɨ rukɨ al ɓaitɔ

³ I sahn go Bɨraɓe, ĩn kɨsayelel tube kɨdɔningt Ĩgɨn hɔ ɗan nya kɨdenesew takumat. I sahn go nyaɗa kɨdenesew kɨ hal kɨsayelel; maja a yan rosɨ kam ndɔ wongt lo Bɨraɓe.

⁴ Kɨtɔ a tĩ i nyan Gaja kɔ, Askalon a tel gootɓe a tuɓan Asdod lon kàd ɗan de'n ɓet, a retɨn Ekrõ kɨ ngɨraag be.

Takɨgang dɔ girrdegt

⁵ Beto lo ngendɨ kad bahbot, in girrdeg lo Kretiag, Bɨraɓe elta ndoorsɨn, ĩ Kana dɔning lo Pilistiag, m'a m'nuj mbã, ngendɨ kamit kɨɗa kaa a goto.

⁶ Ĩn log kɨkad bahbot, a ĩn lo kul nyag kɨ londɨ ngéngombatg kɨ loto nyakulg.

⁷ Kad bahbo'n non a i londɨ kɨta ndeg ngékɨɓe lo Juda kɨnãi, nu la a ulɨndt ye, a taan kò lokɨsɔle kam kujgt kɨ Askalon kɨta Bɨraɓe Luwah lod a ga kamɨn dɔdt na a tel sed gog ɓeɓert.

⁸ M'oo dɔ kid lo Moab kɨ taj nya ho ho lo Amoniag lon tajɨn ne deg lom na ɓain dõ ndoorɨn ɗobning lod.

⁹ Kɨtɔ 'nten, tit'n m'ndɨn kɨ dɔm dõ, kel Bɨraɓe Ngekoosɨg, Luwah lo Israel: Moab a tel tit Sodom kɨ Amoniag titɨn kɨ Gomor. A i lo ɓa ngar kɨ holɓe kat kɨ gootɓe mbãkɨnõt. Ndeg deg lom kɨ nãin a tirɨn nya lod pur na ndeg girrdeg lom kɨ nãin a õn nduba lod.

¹⁰ Nyag 'nten a ɗad kɨta kɔj ro lod kɨta kidɨn deg lo Bɨraɓe Ngekoosɨg tɔin dɔd kɨ dõ ndoorɨnd ne.

¹¹ Bɨraɓe a ɗa sed nya kɨkootɓool kɨta a nuj yog kɨ dɔningt tube na dekɨɗen a ɔsɨ dɔn ber nõat kam dɔningt lon mbã kɨ doorlogt lo girrdeg tube.

¹² Ĩn deg kɨ Etiopi tɔ, a tɔlsɨn kɨ kiyaɗɔɔ lom.

¹³ Bɨraɓe a la jin kɔtko ɓodo, nujɨn Asiri, a tel Ninib gotɓe, ad tut kurum tit dɨlalo.

¹⁴ Ɓut nyakulg a ton kamat kɨ dãg kɨ dang dang, yel kɔig kɨ ndur a hɔn londɨ dɔ piliegt loa ndi mad ko kɨ buro kujg, nuj a tɔ ɗig tabitgt kɨta a ngĩn plapõ kɨ ɗa kɨ kag sedɨr kɔ.

¹⁵ Ĩn non la i ɓebo'n la i ɓebo kɨ ngeɗa ronel in ndɨ lom, na el kamit an: Mĩ kɨɗabe, kɨ mad goto na mĩ tã, Titbãi tel gootɓe, londɨ dãg kɨ mut. Dekɨɗen'n a tɔi kadat a ne a kɔr ngol na a yee jin.