Soponi 1 - Maktub Ta Kumkajir

Ndɔ lo Bɨraɓe ndɨ ɗe

¹ Ta lo Bɨraɓe'n ɗe ro Soponit ngon Kusɨ, ngon Gedalia, ngon Amaria, ngon Ejekias, kam ndɔgt lo Josias ngon Amon, ngar kɨ Juda.

² M'a m'nuj nyag tube kɨdɔningt kɔ, kel Bɨraɓe.

³ M'a m'nuj deg kɨ dãg, m'a m'nuj yelg kɨ dõ kɨ kanjg kɨbahbot nyag kɨ ngégagigt nat kɨ ngéɗamajal. M'a m'nuj deg kɨdɔningt kɔ, kel Bɨraɓe.

⁴ M'a m'la jim m'ndoorɨn Juda kɨ ngéndɨ Jerusalem tube m'a m'nuj deg lo Baal kɨ nãin lot'n ɗan kɔ nat kɨ kɨta ngejanyamosɨ kɨ ngeɗayog loa

⁵ Ĩgɨn ɔsɨn dɔd ber nõ koosɨgt kɨ dɔrãt dɔ kujgt. Ĩgɨn ɔsɨn dɔd ber kɨ yokɨnda kam tɔ Bɨraɓet kɨ yokɨnda kam tɔ ngart lod

⁶ Ĩgɨn tɔrrɨn rod kɨgog ro Bɨraɓet, sahn go Bɨraɓe al, ndɨjena ta al tɔ.

⁷ I ndɨ goi mbo nõ Bɨraɓe Luwaht kɨta ndɔ lo Bɨraɓe i nderbe, Bɨraɓe ɗago nya kɨjakɔ, kunɨn mbahg lon.

⁸ A i titbe ndɔ jakɔ nyat lo Bɨraɓe; m'a m'nda m'ɔj mbaiɓeg kɨ ngan ngar kɨ tube'n lan kubg kɨmbah rodt.

⁹ Ndɔt'n non m'a m'gangta dɔ degt'n ɓain bal dɔ ɗig tabit kujt, ĩgɨn ɗoosɨn kuj lo nged kɨ nyaɗa kɨlo ngetɔgt kɨ ndokum

¹⁰ Ndɔt'n non, kel Bɨraɓe, a oon dɔ kah ndi mad kɨbo takuj kanjgt, a oon dɔ wi ko bɔgɓet mad kɨ kah nujkɔ kɨbobe ko dɔ mbalgt.

¹¹ Udɨn wi, ĩn ngéndɨ bɔgɓet lo ngétɔsɨbir kɨta ngéɗagatg tube oin, tube'n mbɔjɨn nar arjã ĩn kɨnuj kɔ.

¹² Ndɔt'n non m'a m'ndio kam Jerusalemt kɨ horr lamba jimt, m'a m'nda m'ɔj ngendɨt lom, ĩgɨn ndɨ elɨn kamdt anan: Bɨraɓe a ɗa maj ke majal al.

¹³ Nyamajg lod a telɨn nyatetɗɔɔ na a nujɨn kujg lod kɔ A ɗan kuj, na a ndɨnt al, a hɔn dĩ nduu kam ndɔɔt na a ãin mana al.

Ndɔ wong kɨbobe

¹⁴ Ndɔ kɨbo lo Bɨraɓe i nderbe ndɨ ɗe kanangbe. Deg a kont kɨ nõ kumdt de kɨngang a nõn nõ kɨkatbang.

¹⁵ Ndɔ'n non i ndɔ wong, i ndɔ kamkɔl kɨ jarobãi, i ndɔ nuj kɨ tuj, i ndɔ til kɨ lo kɨ diw kirir i ndɔ kilndii kɨ til kɨdiw kirir.

¹⁶ Ndɔ kun tow kɨ ndɔ kũ yel ɗɔɔ dɔ ɓebog kɨngang kɨ kujngomdɔ ɓeg.

¹⁷ M'a mad jarobãi ɗe dɔ degt kad ndian tit mundog be kɨta ɗan majal ndoorɨn ne Bɨraɓe. A ũn mosɨd kɔ tit buning be kɨ nind tit kĩ be.

¹⁸ Nar arjã ke nar ɔr lod a asɨ kajd al, kam ndɔ wongt lo Bɨraɓe na horr jàng loa a õ dɔning tube kɨta a nuj ngéndɨ dɔningt tube kanangbe.