Rut 4 - Maktub Ta Kumkajir

Boaj taa Rut nẽnt

¹ Boaj al dɔ pong gangtat na ndɨt. Oo de kɨ asɨ badɔ nyanduba'n Boaj elta loa kete ndɨ tɔi, na Boaj ela an: I dɨba nẽbe. De'n non dibat na ndɨ ber.

² Boaj kɔt deg kɨlah ku kɨbogt kɨ kam ɓet na eld an: I ndɨn ber nẽbe. Ndɨn ber.

³ Kamla el de kɨ asɨ badɔ nyanduba an: Naomi in ɓai dɔning Moabt tel kɨ ɓe la ndig ndugo gaj dɔning lo Elimelek kɨ ngonkõj kɔ ye.

⁴ M'ɔj kammt kɨ m'ɔrri hoia na m'eli: Maj kad i ndugo sia nõ degt'n ndɨn kɨ kɨnõ kɨbogt lo deg. Ĩla i ndig badɔa a ne, i badɔ, na ĩla i ndig badɔa al a ne, el i tɔm wakɨsɨ kad m'ger. Kɨtɔ de kɨɗang kɨ asɨ badɔ dɔning'n non goto, na ĩ tã, na mĩ la mĩ goit ye. Tur an: M'a m'badɔ.

⁵ Boaj el an: Kam ndɔt'n ɓet a ndugo ndɔɔ ji Naomit a ne, i ndugo nat kɨ Rut dekɨdẽ kɨ Moab, nẽ ngekoi, kɨtakad tɔ ngekoi ko dɔ nyandubat lon.

⁶ Na de kɨ asɨ kad badɔ nyanduba ye, tur an: M'asɨ ndugo kɨlomt al, na ɓeta m'tuj nyanduba lom. Maj kad i badɔ i gan gootɨm kɨta m'asɨ kad m'badɔ al.

⁷ Nyabelɓe lo Israelag maɗi i titbe nyabadɔ ke nya kɨmbelna, kad nyag tube ton kɨ ɗubagt ye, de kɨɗa a ɔrr sa njant ad madɓen'n non la, i nyamanaj ku Israelagt.

⁸ De kɨ asɨ badɔ nyanduba el Boaj an: Ĩ kɨɓe i ndugo. De'n non ɔrr sa kɨ njant.

⁹ Kamla Boaj el kɨbog kɨ deg tube an: Ɓone ĩn ngémanaj dɔ nyagt tube kɨ m'ndugo ji Naomit'n i lo Elimelek kɨ Kiljon kɨ Maklon tu.

¹⁰ Titbe tɔ m'ndugo Rut dekɨdẽ kɨ Moab nẽmt, in maɗi i nẽ Maklon kɨtakad tɔ ngekoi kon dɔ nyandubat lon kad tɔ ngekoi goto ku ngankõngt al, ke kam ɓe koojat al tɔ. Ĩn ngémanaj dɔt ɓone.

¹¹ Deg tube'n ndɨn ta pong gangtat kɨ kɨbog elɨn anan: Jĩ ngémanaj dɔt, kɨ Bɨraɓe ad dekɨdẽ kɨ a ɗe kuju loi i tit Rasel kɨ Lea ĩn tujoo oojɨn ngang'n telɨn girrdeg lo Israela, kad maj urri kam Epratat kɨ tɔi ko kam Betlehemt.

¹² Kɨ ngakai'n Bɨraɓe a adi kɨtakul ngon kɨ mand'n ɗan adɨn ngékɨɓe loi taan na kɨ ngékɨɓe lo Peres'n Tamar ooja ad Juda.

¹³ Titbe la Boaj taan Rut nẽnt, aw roat. Bɨraɓe ada ndan ngon, na ooj kɨdɨngã.

¹⁴ Dekɨdẽg elɨn Naomi anan: Kɔsɨgon kɨdɔ Bɨraɓet'n ɔgi ngebadɔ al. Ad tɔa ko kam Israelt.

¹⁵ Ngon'n non a sɔl kami, a i ngengomi dɔ bɨgait kɨta mumi kɨdẽ kɨ ngetari la ooja ye. Maj tɔi ngan kɨdɨngãg tanãimɨta kɨ tɔi.

¹⁶ Naomi un ngon nda kadɨnt, na ngoma.

¹⁷ Madɓeag kɨdẽ ndan tɔa anan: Ooj ngon kɨdɨngã ad Naomi. Kunɨn tɔa Obed, ĩla i bɔw Jese kɨ bɔw Dabid.

¹⁸ Ĩgɨn non la ĩn ngaka Peres ye. Peres ooj Hesron,

¹⁹ Hesron ooj Ram, Ram ooj Aminadab.

²⁰ Aminadab ooj Nason, Nason ooj Salomõ

²¹ Salomõ ooj Boaj, Boaj ooj Obed,

²² Obed ooj Jese, na Jese ooj Dabid.