Rut 3 - Maktub Ta Kumkajir

Boaj un kɔn ad Rut

¹ Kamla ndɔ mad Naomi el mumɨn kɨdẽ an: Ngonɨm, sumba kad m'sah lo kɨmaj mad i ndɨt kɨ kamkɨ sokɨber kɨ ronel.

² I ger kad Boaj'n nyài adi i ɓur nyako kam ndɔɔt lon sed ngékɨlaɓerg lon kɨdẽg ye, i nooj'j ale? Kam ndɔt'n ɗan ɓet a to nyako lon kɨ dɔ gar ndah nyakot.

³ I tugo roi, i wur roi kɨ yib, i la kub loi kɨmaj, na aw ta gar ndah nyakot. Ad de'n non geri al, mbã ad sa ho, ãin ho kamtã.

⁴ Lon a ɓai aw kad'n to ber a ne, oo lon a tot nõ maj, kamla i ndɔt kɨroat, un kub kɨ dɔ njaat kɨ dõ i tot. Ĩ kɨɓe kɨdɔn a ɔji nya'n sumba kad i ɗa.

⁵ Rut tura an: Nyag tube'n elɨm taa m'a m'ɗa.

⁶ Ɓai, aw ta gar ndah nyakot, na ɗa nyag tube'n muma kɨdẽ ela kad ɗa.

⁷ Lon Boaj sa ho, ãi ho ye, kama nela ad aw to ber lot'n mbõn nyako tit. Rut tɔi yereng, un kub kɔ dɔ njaat, na to ber.

⁸ Danlot taa ne, lon Boaj tel ron ye, ur yiuyiu, kɨta ngah dekɨdẽ mad to njant.

⁹ Ndɨjea an: Ĩ nõ a? Tura an: Mĩ Rut, ɓer loi kɨdẽ, kɨta 'nten i la kub loi dɔ ɓert loi kɨdẽ kɨta ĩ kɨkɨɗa ku ngebadɔt ho.

¹⁰ Boaj el an: Ngonɨm, kɨ Bɨraɓe njang dɔi, nyaɗakɨro loi kɨdɔboit m'ãi naj tɔi kɨlaɗai kɨdasa kɨta i sah go basag kɨ ngéndog, ke basag kɨ ngémajg al, na i ɗe romt mi kɨ bɨga tã.

¹¹ Tajigla ngonɨm, i ɓool al, m'a m'ɗa nyag tube'n eltaa m'adi, kɨta deg kɨbog tube kam ɓet lom gerɨn ĩ, dekɨdẽ kɨro.

¹² Rota, m'asɨ kad m'badɔ nyanduba, na de mad kɨbo tɔim ndɨ nõ ɓaitɔ.

¹³ I ɓi nẽbe ndɔ la 'nten. Loti kɨsĩ, ĩla kama ndig ɗa sei kɨgo nyandubat loi a ne, maj kad ɗa ho, ĩla ndig ɗa sei titbe al a ne, rota tit'n Bɨraɓe ndɨn kɨdɔn dõ, mĩ kɨdɔm m'a m'ɗa sei, I ɓi nẽbe mbã loti.

¹⁴ To ningt nja Boajt mbã loti, na ɓai kɨ girr log lon lo tɨja roi asɨ kad de oo de gera al ɓaitɔ, kɨta Boaj el an: Maj kad deg gerɨn ta ɗe dekɨdẽ nẽbe ta gar ndah nyakot al.

¹⁵ Ela ta ɓaitɔ an: Adɨm ta kub kɨbo kɨ i la dɔit, na i hɔ taa nõ maj. Ĩ tɔ hɔ ta kub ho, na Boaj mbɔj nyako ɔrj kilo kɨlah gidaimi kamla ada, ndah dɔat na aw be.

¹⁶ Rut tel kɨ ro mumɨnt, na muma ndɨjea an: I ĩ a ngonɨm? Rut ɔrra go nyag tube kɨ de'n non ɗa kɨtatɔa.

¹⁷ Ela an: Mbɔj nyako ɔrj kilo kɨlah gidaimi adɨm kɨta elɨm an: A i tel kɨ ji kari kɨ ro mumit al.

¹⁸ Kamla Naomi el an: Ngonɨm, i ndɨ labe, ngoo kad kɨ ger go ɗob kɨ titbãi nya'n ten a ɗan nya. De'n non a taakò al mbã tɔlkon nya 'nten ɓone.