Rut 2 - Maktub Ta Kumkajir

Rut ɓur goot nyako kam ndɔɔt lo Boaj

¹ Ngonkõ ngaw Naomi mad i nõ, i de kɨbo kɨ ngenyamaj. Tɔa i Boaj, i nooj Elimelek.

² Rut dekɨdẽ kɨ Moab el Naomi an: M'kɔi, i nyam ad m'aw m'ɓur nyako kam ndɔɔt lo de'n m'a m'ngaa maj takumat. Tura an: Ngonɨm kɨdẽ aw.

³ Titbe Rut aw ɓur kam ndɔɔt, go ngéjanyakot, na aw kam ndɔɔt lo Boaj'n i nooj Elimelek nõ.

⁴ Kaglo sĩ, Boaj ɓai Betlehem ɗe, na el ngéjanyako an: Kɨ Bɨraɓe i nat sesɨ. Turɨna anan: Kɨ Bɨraɓe njang dɔi.

⁵ Boaj ndɨje ɓer lon'n ndaa dɔ ngéɗakɨla ja nya kot an: Dekɨdẽ kɨmand'n ɗan i nõ a?

⁶ Ɓer loa'n ndaa dɔ ngéjanyakot ye tur an: I dekɨdẽ kɨ Moab'n ɗen nat kɨ Naomi ko dɔning Moabt.

⁷ Ndɨjem an: I nyam ad m'ɓur nyako, kad m'kaw nyako kɨ tuso go ngejaat nat lo kɨɗa. Lon ɗe kɨsĩ, mbã tajigla ɗa kɨ njan dõ, na ndɨ kam kuj taakò ngonsĩ al.

⁸ Boaj el Rut an: Ngonɨm, oo dɔ ta lom. Ot kaw ɓur nya kam ndɔɔt lo de mad kɨɗang, ot kaw lo mad kɨsãi ho, i ndɨ nat kɨ ngékɨlaɓerg lom kɨdẽ.

⁹ I nda kumi dɔ ndɔɔt'n ɗa jan nyako tit, na i ndulo god. M'ɔj ɓerg lom kad ɔdɨn al, na ĩla kɨnda man ɗai a ne, aw ta jomant'n basag ɗa ɔdɨn mant nõ.

¹⁰ Kamla Rut so ber kɨ takumɨn kɨ ningt el Boaj an: Titbãi m'ngaa maj takumit, ad i ga kami dɔmt, mĩn kɨ mĩ dekɨdẽ kɨmbah a?

¹¹ Boaj tura an: Deg ɔrrmɨn hoi nyag kɨmaj tube'n i ɗa kɨ mumi kɨdẽ go koi ngawit nu, kɨ nyan i nya bɔwi kɨ kõi kɨ dɔning kooji, na i ɗe dɔningt lo girrdeg kɨ i ger kete al.

¹² Kɨ Bɨraɓe bá kɨlaɗai, kɨ nyabaji loi kɨtaagbe i kokɨro Bɨraɓe Luwaht lo Israel'n i ɗe yaroi girr bɔgat nõ.

¹³ Rut el an: Ad m'ngaa maj takumit geem, kɨta i sɔl kamm, na elta kɨmaj kɨ ɓer loi kɨdẽ, ke neni mĩ kɨkɨɗa ku ngékɨlaɓergt loi kɨdẽ al.

¹⁴ Lon kaglo sanya asɨ ye, Boaj el Rut an: I ndɔt kɨ rojt so, na i sa sej nya, un kuɓɨr bɨna, ɔdɨn tã. Ndɨ ber kad ngéjanyakot. Adɨna kum nyako kɨndaw. Sa ndan na ngom ndega.

¹⁵ Lon ɓai aw kad ɓur nyako ye, Boaj ndamber ngékɨlaɓerg lon an: I nyan adɨna ɓur nyako kɨnãi kadat, na ot kelɨn ta dɔt.

¹⁶ I tɔrrɨn dɔ nyako madg kam sɨnga nyakot, nyan ad tuson ber ada ɓur na ot ndangɨna.

¹⁷ Kɨtɔ 'nten la Rut ɓurɨn nyako mbã kad ud, ɔi ɔrj ɗoosɨ njang kɨbo kɨɗa, kamla nda nyako ɔrj'n non.

¹⁸ Ngah kuma asɨ tat, na ɔi kum nyako ɔrj telɨn kɨ ɓe, aw da mumɨn nyako'n ɓur. Kamla Rut un ndeg nyasa kɨnãi ad mumɨm.

¹⁹ Muma ela an: Ɓone i aw ɓur nyako ko ɗah a? I ɗa kɨla ko ɗah a? Kɨ maj urr de'n hɔi kɨront nõ. Ɔj mumɨn de'n ɗa sia kɨla, ela an: Tɔ de'n m'ɗa sia kɨla ɓone i Boaj.

²⁰ Naomi el mumɨn an: Kɨ majkurr lo Bɨraɓe i dɔat, Bɨraɓe'n nya ta kɔj kamkẽ lon ngékumkajɨrg kɨ ngékoig al. Naomi el mumɨn an: De'n non i nooj'j, i kɨkɨɗa ku ngebadɔjt.

²¹ Rut dekɨdẽ kɨ Moab el an: Boaj elɨm an: I ndɨ nat kɨ ngékɨlaɓerg lom mbã kaglo ja nyako tɨgan.

²² Naomi el mumɨn Rut an: Ngonɨm maj kad aw nat kɨ ngékɨlaɓer loa kɨdẽ kad de ndɔdi kam ndɔɔt mad kɨɗang al.

²³ Titbe Rut ndɨ nat kɨ ngékɨlaɓer lo Boaj kɨdẽ mbã jan nyako ɔrj kɨ gem tube tɨgan, na hɔlondɨt nat kɨ mumɨn.